قازاقستاندا پەداگوگتەردى باعالاۋ جۇيەسى تولىق قايتا قارالىپ جاتىر. وقۋ-اعارتۋ مينيسترلىگى مۇعالىمدەردى بۇرىنعىداي ەسەپ پەن فورمالدى كورسەتكىشتەر ارقىلى ەمەس، ناقتى ناتيجە بويىنشا باعالاۋعا كوشپەك، دەپ حابارلايدى Dala News.
بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە ۆيسە-مينيستر شىنار اقپاروۆا مالىمدەدى.
جاڭا مودەل پيلوتتىق رەجيمدە ەنگىزىلۋدە جانە ول ءبىلىم بەرۋ جۇيەسىندەگى ەڭ داۋلى ءارى ۇزاق جىلدار بويى سىنالىپ كەلگەن ماسەلەلەردىڭ ءبىرىن وزگەرتۋدى كوزدەيدى. ياعني، ءمۇعالىم جۇمىسىنىڭ تيىمدىلىگى ەندى قاعازباستىلىقپەن ەمەس، وقۋشىعا اسەرىمەن ولشەنەدى.
«پەداگوگ-مودەراتور ساناتى ءۇشىن اشىق ساباقتار سانى ەداۋىر قىسقارتىلادى: بۇرىن جىل سايىن 5 ساباق وتكىزۋ كوزدەلسە، ەندى اتتەستاتتاۋ كەزەڭى ىشىندە بارلىعى 4 اشىق ساباق وتكىزۋ جەتكىلىكتى بولادى. بىلىكتىلىكتى ارتتىرۋ كۋرستارىنىڭ كولەمى 72 ساعاتتان 36 ساعاتقا دەيىن قىسقارتىلادى. پەداگوگتىڭ ءبىلىم بەرۋ ۇيىمى دەڭگەيىندە شىعارماشىلىق توپتارىنا، جوبالارعا قاتىسۋى تالاپ ەتىلەدى. ءبىلىم بەرۋ ۇيىمىندا سىنىپ ساعاتتارىن نەمەسە سىنىپتان تىس ءىس-شارالاردى وتكىزۋ تالابى ەنگىزىلەدى»، – دەدى ۆيسە-مينيستر.
مينيسترلىك بۇل وزگەرىستەر تەك ءبىر ساناتپەن شەكتەلمەيتىنىن اتاپ ءوتتى. پەداگوگ-ساراپشى، پەداگوگ-زەرتتەۋشى جانە پەداگوگ-شەبەر دەڭگەيلەرىنە دە ۇقساس تالاپتار قايتا قارالىپ جاتىر.
باستى وزگەرىستىڭ ءبىرى – اتتەستاتتاۋ جۇيەسىنىڭ تولىق سيفرلاندىرىلۋى. بارلىق پروسەسس «ۇستاز» پلاتفورماسى ارقىلى جۇرگىزىلەدى. وندا ءمۇعالىمنىڭ ەڭبەك ءوتىلى، كاسىبي جەتىستىكتەرى، سەرتيفيكاتتارى مەن پورتفوليوسى اۆتوماتتى تۇردە قالىپتاسادى. بۇل قۇجات اينالىمىن قىسقارتىپ، مۇعالىمدەردىڭ ۋاقىتىن ەسەپ بەرۋگە ەمەس، وقىتۋ پروسەسىنە باعىتتاۋعا مۇمكىندىك بەرەدى.
ۆيسە-مينيستردىڭ ايتۋىنشا، جاڭا جۇيە تەك قارجىلىق ىنتالاندىرۋ قۇرالى ەمەس.
«اتتەستاتتاۋ تەك قوسىمشا قارجىلىق ىنتالاندىرۋ قۇرالى ەمەس، ەڭ الدىمەن پەداگوگ قىزمەتىنىڭ ساپاسىن ءادىل باعالاۋ تەتىگى رەتىندە قاراستىرىلىپ وتىر. سونىمەن بىرگە اتتەستاتتاۋ پەداگوگتىڭ نەگىزگى قىزمەتىنە كەدەرگى كەلتىرمەي، ونى قولدايتىن جۇيە رەتىندە قالىپتاستىرىلادى، ياعني پەداگوگتىڭ ۋاقىتى ارتىق ەسەپتىلىككە ەمەس، وقۋشىمەن جۇمىسقا باعىتتالۋى قامتاماسىز ەتىلەدى»، – دەدى اقپاروۆا.
بۇل باستاما سوڭعى جىلدارى ءبىلىم سالاسىندا جۇرگىزىلىپ جاتقان جالپى رەفورمالاردىڭ جالعاسى. بۇعان دەيىن دە مينيسترلىك مۇعالىمدەردىڭ جۇكتەمەسىن ازايتۋ، قاعازباستىلىقتى قىسقارتۋ جانە كاسىبي دامۋدى كۇشەيتۋ باعىتىندا ءبىرقاتار وزگەرىس ەنگىزگەنىن مالىمدەگەن. 
سونىمەن قاتار جاڭا تالاپتار پەداگوگ ماماندىعىنا ءتۇسۋ كەزەڭىنەن باستاپ كۇشەيتىلىپ جاتىر. ەندى پەداگوگيكالىق ماماندىقتارعا قابىلداۋ ءۇشىن شەكتى بالل 75-كە دەيىن كوتەرىلگەن. بۇعان قوسا، تەك تەستكە تاۋەلدىلىك ازايىپ، ارنايى ەمتيحانداردى قامتيتىن ارالاس باعالاۋ جۇيەسى ەنگىزىلمەك.
مينيسترلىك ءمۇعالىم مارتەبەسىن ارتتىرۋ باعىتىندا الەۋمەتتىك قولداۋ شارالارى دا جالعاسىپ جاتقانىن ايتادى. سوڭعى جىلدارى مەكتەپ مۇعالىمدەرىنىڭ جالاقىسى ەكى ەسەگە وسكەن، ال مەكتەپكە دەيىنگى ۇيىم پەداگوگتەرىنىڭ تابىسى 30 پايىزعا ارتقان. دەمالىس ۇزاقتىعى 56 كۇنگە دەيىن كوبەيگەن. وسى وزگەرىستەردىڭ ناتيجەسىندە پەداگوگتەردىڭ 95 پايىزى ءوز ماماندىعىنا قاناعاتتاناتىنىن بىلدىرگەن.
جالپى، ۇسىنىلىپ وتىرعان جاڭا مودەل ءبىلىم جۇيەسىندە پاراديگمالىق وزگەرىس رەتىندە باعالانۋدا. ەگەر بۇرىن ءمۇعالىمنىڭ جۇمىسى ەسەپ پەن فورمالدى تالاپتارعا تاۋەلدى بولسا، ەندى نەگىزگى نازار ناقتى ناتيجەگە، وقۋشىنىڭ دامۋىنا جانە ءبىلىم ساپاسىنا اۋدارىلادى.
الايدا ساراپشىلار بۇل رەفورمانىڭ قالاي ىسكە اساتىنى شەشۋشى فاكتور بولاتىنىن اتاپ وتەدى. سەبەبى تالاپتاردى جەڭىلدەتۋ مەن باعالاۋ ءتاسىلىن وزگەرتۋ – ءبىر بولەك، ال ونى ءادىل جانە ءتيىمدى جۇزەگە اسىرۋ – مۇلدە باسقا ماسەلە.
