Almatydaǵy moped júrgizýshileriniń 95%-y nómir men júrgizýshi kýáligin aldy, – dep habarlaidy Dalanews.kz.
Jańa zań kúshine engennen keiin Almatydaǵy mopedke bailanysty másele qalpyna kelgen. Resmi aqparatqa qaraǵanda, qazir moped aidaityndardyń 95%-y kóligin tirkeýden ótkizip, júrgizýshi kýáligin alyp úlgergen. Sondyqtan mopedin nómirsiz júrgizetinder burynǵydai emes, saiabyrsypty.
"2025 jyldyń 5 sáýirinen bastap kúshine engen jańa zańǵa bailanysty mopedterdiń barlyǵy tirkeýden ótip, memlekettik nómir, tehpasport, saqtandyrý polisin alýǵa tiis bolatyn. Endi arnaýly kýáligińiz bolsa ǵana mopedti júrgize alasyz, onsyz bolmaidy", - deidi Saltanat Ázirbek.
Eń kóp kezdesetin zań buzýshylyq:
- jol belgileriniń talabyn elemeý;
- tutas jolaqty kesip ótý;
- jolaqty aýystyrǵanda tutas syzyqty kesip ótý;
- kózdi qaryqtyratyn sham, talapqa sai kelmeitin dybys báseńdetkish siiaqty qural-saimandar salyp alý.
"Júrgizýshilerdiń kóbi shamyn aýystyrar kezde zaýyttan shyqqan shamy jóndi jarqyramaidy degendei ýáj aitady. Biraq arnaýly ruqsat bolmasa, sham men ózge de qural-saimandy óz betinshe sala berýge taǵy bolmaidy", - dep eskertti departament ókili.
5 sáýirden beri zań buzǵan osyndai 5000 mopedtiń iesi ákimshilik jaýapqa tartylyp, 2000 kólik aiyp turaǵyna qoiylǵan.
Ákimshilik politsiianyń aqparaty boiynsha osy ýaqytqa deiin Almatyda 15 myńnan asa moped tirkelipti.
Moped júrgizetinderdiń kóbi kýrer bolyp isteitin sheteldik azamattar ekenin de aityp otyr politsiia qyzmeti.
