QR Básekelestikti qorǵaý jáne damytý agenttiginiń Atyraý oblysy boiynsha departamenti Atyraý munai óńdeý zaýytyna (AMÓZ) qatysty tergep-tekserýdi bastady. Oǵan munai óńdeýdiń taýar naryǵynda taýardy óndirý (ótkizý) kóleminiń jáne baǵasynyń dinamikasyna júrgizilgen taldaý sebep negiz, dep jazady Dalanews.kz.
"Júrgizilgen taldaý nátijeleri boiynsha departament 2021 jyldan 2023 jylǵa deiingi kezeńde ortasha baǵany 31%-ǵa ulǵaita otyryp, munai óńdeýge monopoliialyq joǵary baǵalardy belgileýde jáne qoldaýda kórsetilgen ústeme jaǵdaidy teris paidalaný belgilerin anyqtady", delingen 2025 jylǵy 29 qańtardaǵy BQDA habarlamasynda.
Monopoliialyq joǵary baǵany belgileý faktisi Qazaqstan Respýblikasynyń básekelestikti qorǵaý salasyndaǵy zańnamasyn yqtimal buzýshylyqtardy tergep-tekserý protsesinde aiqyndalatyny da naqtylanady.
Aita ketsek,ótken jyly áleýmettik jelide AMÓZ-degi jaǵdaiǵa qatysty shaǵymdar jariialanǵan bolatyn. Munda zaýyt basshysy qyzmetin atqarǵan Ǵalymjan Jýsanbaev ártúrli zańbuzýshylyq jasady dep aiyptalǵan. “QazMunaiGaz” bul máseleni zertteý úshin zaýytqa arnaiy komissiia jiberýge ýáde bergen. Nátijesinde, Jýsanbaev pen zaýyttyń bas injeneri Ádilet Shoshanbasov óz laýazymdarynan bosatylǵan.
2024 jyly 27 aqpanda Qarjylyq monitoring agenttigi AMÓZ basshylyǵyna qatysty qylmystyq is qozǵalǵanyn habarlady. Keiinirek Jýsanbaev kásiporynda sabotaj bolǵanyn aityp, ózi týraly aryzdaǵy málimetterdi joqqa shyǵardy. Sóitip 2024 jyldyń maýsymynda Atyraý munai óńdeý zaýytynyń eks-direktory sot sheshimimen jumysyna qaita oralǵan bolatyn.
