Týrizm jáne sport ministrligi shahmatshy Bibisara Asaýbaevanyń Prezident Qasym-Jomart Toqaevqa joldaǵan úndeýinen keiin shuǵyl brifing ótkizip, sportshyny qarjylandyrý máselesine qatysty túsinikteme berdi, dep habarlaidy dalanews.kz.
Týrizm jáne sport vitse-ministri Serik Jaraspaevtyń aitýynsha, Bibisara Asaýbaevaǵa halyqaralyq jarystarǵa daiyndalý úshin memleket tarapynan qomaqty qarajat bólinip keledi.
Onyń sózinshe, 2025 jyly zańnamaǵa engizilgen ózgeristerge bailanysty shahmat olimpiadalyq sport túrleriniń qatarynan shyǵarylǵan. Soǵan sáikes tariftik tor qaita qaralyp, sportshynyń ailyq jalaqysy shamamen 1 million teńgeden 300 myń teńgege deiin tómendegen.
Soǵan qaramastan, ministrlik ókilderi sońǵy jyldary Bibisara Asaýbaevany daiyndaýǵa bólinetin qarjy kólemi artyp otyrǵanyn atap ótti. Vedomstvo málimetinshe, biyl ǵana halyqaralyq jarystarǵa daiyndyq úshin arnaiy qordan 100 million teńge bólingen. Al sońǵy úsh jylda sportshynyń daiyndyǵyna baǵyttalǵan qarajat kólemi 243 million teńgege jýyqtaǵan.
Serik Jaraspaev sondai-aq shahmatshyǵa berilgen II dárejeli «Barys» ordeniniń tabystalmaýyna qatysty pikir bildirdi.
«Bul marapat sportshyǵa áli jetken joq degen aqparat bar. Negizinde ol 8 naýryz merekesine orai Aqordada tapsyrylýy tiis edi. Alaida Bibisaranyń jarys kestesi tyǵyz bolǵandyqtan, is-sharaǵa qatysa almady. Elge oralǵannan keiin marapat mindetti túrde jeke tabystalady», – dedi ol.
Eske salaiyq, buǵan deiin álemniń birneshe dúrkin chempiony Bibisara Asaýbaeva Memleket basshysyna videoúndeý joldap, kásibi sportshylardy qoldaý máselesine nazar aýdarýdy suraǵan bolatyn. Shahmatshynyń aitýynsha, halyqaralyq jarystarǵa daiyndyq kezinde keibir shyǵyndardy ózi men ata-anasy kóterýge májbúr bolǵan.
