Qazaqstanda jumys istep kelgen Tesla Education bilim berý ortalyǵyna qatysty ata-analardyń shaǵymy kóbeidi. Áleýmettik jelilerde ondaǵan video men jazba taralyp, kei ata-analar ortalyqty «alaiaqtyq shema qoldandy» dep aiyptap otyr. Aitýlarynsha, kompaniia 300-den astam ata-anamen uzaq merzimdi kelisimshartqa otyryp, aldyn ala tólem alǵanymen, bilim sapasy kútken deńgeide bolmaǵan, dep habarlaidy Dalanews.kz.
Ata-analardyń biri áleýmettik jelide oqý ordasyna shaǵymdanǵan.
"Tesla Education bilim berý ortalyǵynyń alaiaqtyq shemasyna qatysty shaǵymymdy aitqym keledi. Olar 300-den astam ata-anany aldady. Men de solardyń qataryndamyn. Kompaniia Instagram-daǵy target jarnama arqyly ata-analardy tartyp, bir-eki jyldyq kelisimshartqa otyrǵyzady. Kópshiligi bólip tóleýge kelisedi. Meniń balamnyń bir jyldyq oqý aqysy 660 myń teńge boldy. Biraq ýáde etilgen bilim sapasy múlde sáikes kelmedi. Maǵan olardyń oqytý deńgeii unamaǵandyqtan ári balamdy alystan tasyp júrý qolaisyz bolǵandyqtan, kelisimshartty buzýǵa májbúr boldym", – deidi ata-ana.
Shaǵym ieleri ortalyqtan aqshany qaitarý da qiyndyq týdyrǵanyn aitady.
Kópshilik shaǵymnan keiin Tesla Education kompaniiasynyń negizin qalaýshy Aidos Seksenáli resmi málimdeme jasap, ortalyqtyń jumysy ýaqytsha toqtatylatynyn habarlady.
Onyń aitýynsha, kompaniia aýyr qarjylyq qiyndyqqa tap bolǵan:
"Men – Aidos Melisuly Seksenáli, ortalyqtyń negizin qalaýshysymyn. Kompaniianyń qyzmetin ýaqytsha toqtatýǵa májbúr bolyp otyrmyz. Bul óte aýyr sheshim. Jyldar boiy balalarǵa sapaly jáne qaýipsiz orta qalyptastyrýǵa bar kúshimizdi saldyq. Ókinishke qarai, kompaniia úlken qarjylyq daǵdarysqa jáne kassalyq tapshylyqqa tap boldy. Bul jaǵdai ádeii jasalǵan áreket emes. Qatelikter boldy, biraq olardyń eshqaisysy qasaqana jasalmaǵan", – dedi ol.
Seksenáli barlyq tólemder tolyq qaitarylatynyn málimdedi:
"Klientter aldyndaǵy barlyq mindettemeler oryndalady. Qalǵan sabaqtarǵa tólengen qarajat tolyq kólemde qaitarylady. Bul ýaqyt alady, biraq ár somanyń qaitarylýyna jeke ózim jaýap beremin. Eshkim nazardan tys qalmaidy", – dedi ol.
Onyń aitýynsha, aqsha qaitarý protsesin baqylaý úshin ata-analarǵa jeke grafik pen habarlama júiesi ázirlenedi.
Negizin qalaýshy qyzmetkerlerdi de qorǵady.
"Ortalyqtyń barlyq qyzmetkerleri nusqaýlyq boiynsha jáne meniń tapsyrmalarymmen jumys istedi. Olar árdaiym ortalyqtyń adal ári turaqty qyzmet etýin qalady. Jaýapkershilikti óz moinymnan almaimyn", – dep atap ótti ol.
