Baqytjan Baijanov alǵashqy kúnderi ne úshin basqasha aiǵaqtar bergenin túsindirdi,- dep habarlaidy Dalanews.kz.
Baijanovtyń sózinshe, bastapqyda ol qorqyp turǵan.
"Al ekinshi ret meni ustaǵan kezde mende advokat boldy. Sol advokat maǵan "mynany aitpa, mynany aitpa" dedi. Sosyn jeltoqsan aiynda ol advokat Bishimbaevtyń advokattarymen aralasyp júrgenin túsindim. Sol úshin ol advokatty alyp tastadym.
Odan bólek, meniń aityp jatqanymnyń bári shyndyq. Sottalsam sottalyp keteiin, biraq men shyndyqty aitamyn", - deidi Baqytjan Baijanov.
Aita keteiik,Baqytjan Baijanovqa Qylmystyq kodekstiń eki baby boiynsha aityp taǵylǵan:
- 432-baby (asa aýyr qylmysty jasyryp qalý);
- 434-baby (asa aýyr qylmysty habarlamaý).
Buǵan deiin Baqytjan Baijanov málimdeme jasaǵan bolatyn. Baijanov qaiǵyly oqiǵa bolǵan kúni Saltanat Núkenovany birneshe ret kórgenin aitty. Ol Saltanat meiramhanaǵa buryn da jii kelgenin aitady. Baijanov gastroortalyqta 2022 jyldan beri direktor qyzmetin atqarǵan.
Artynsha Eks-ministr Qýandyq Bishimbaevqa qatysty sot otyrysynda Bishimbaevtyń týysy ári ekinshi aiyptalýshy Baqytjan Baijanov oqiǵa bolǵan tún týraly taǵy bir derekti aitty.
Buǵan deiin sot otyrysynda Baqytjan Baijanovtyń advokaty sotqa ótinish jasaǵan bolatyn. Onyń sózinshe, Baijanov Bishimbaevtan bólek otyrǵysy keletinin aitty.
"Bishimbaevty Baijanovtan alys otyrǵyzý qajet. Baijanov ózine qysym kórsetilip jatyr dep sanaidy. Olardyń arasynda kikiljiń bolyp jatyr. Tym quryǵanda erteńgi otyrysta Qýandyqtan aýlaq otyrsa bolar edi", - dedi Baijanovtyń advokaty.
Keiin muny Bishimbaevtyń inisi Baijanovtyń ózi de rastady.
"Ol maǵan jaýap berý kezinde "bylai ait, bylai ait" dep qysym kórsetip jatyr", - dedi Baijanov.
