«Mereili otbasy» ulttyq baiqaýy Taldyqorǵanda osymen altynshy ret uiymdastyrylyp otyr.
Sharanyń maqsaty – otbasynda ózara kelisim men rýhani syilastyqty nyǵaitý. Bir shańyraq astyndaǵy berekeli ómir súrýdiń mańyzdylyǵyn arttyrý. Kópultty elimiz úshin mundai sharanyń máni zor. Biylǵy oblystyq baiqaýǵa barlyǵy 36 otbasy qatysyp, baǵyn synady.
Igi sharanyń shymyldyǵyn Almaty oblysy ákiminiń orynbasary Aqan Jylqyshybaiuly ashty.
«Otbasy degenimiz, ol – ár adamnyń jylylyq pen meiirimge toly kieli besigi, qasietti shańyraǵy. Bizdiń Jetisý jerinde ǵasyrlar boiy urpaq sabaqtastyǵy jarasymdy jalǵasyn taýyp keledi. El ishinde qurmetke bólengen, ardaqty, ónegeli otbasylar barshylyq. Sondyqtan jyl ótken saiyn «Mereili otbasy» baiqaýynyń máni artyp keledi. Búgingi baiqaýǵa qatysyp, dara shyqqan otbasylardy – Jetisý jeriniń, Qazaq eliniń maqtanyshy dep bilemin. Baiqaý jeńimpazdaryn shyn júrekten quttyqtaimyn. Elimizdiń táýelsizdigi tuǵyrly, shańyraǵy biik, keregesi keń bolsyn», – degen jyly lebizin bildirip, baiqaý jeńimpazdaryn marapattady.
«Mereili otbasy» ulttyq baiqaýynyń oblystyq kezeńinde úshinshi orynǵa úsh otbasy ie boldy. Olar:
Eńbekshiqazaq aýdanynan Álimbekovter otbasy. Álimbekov Quljabai ómiriniń sońyna deiin mal sharýashylyǵymen ainalysqan. Otanasy Tursynbaeva Azizhan «Altyn alqa» iegeri, «Veteran trýda» medali, «Materinskaia slava» ordeni, «Mat geroinia» medaldarymen nagradttalǵan. Otbasynda 7 ul, 2 qyz, 31 nemere, 21 shóbere bar.
Ekinshi otbasy Kegen aýdanynan kelgen – Áldibekovter. Áshirbek ata soǵys kezinde tylda eren eńbek kórsetken. Zeinetke shyqqan soń aýyl aqsaqaldarynyń tóraǵasy, oblystyq, aýdandyq, aýyldyq sharalardyń basy-qasynda júrip keledi. Adal eńbegi úshin 10 ret merekelik medal, «Tyl jáne eńbek ardageri» ordenimen, 5 ret aýdandyq, oblystyq «Qurmet» ordenimen, sonymen qatar Respýblikalyq ardagerler keńesiniń «Qurmet» gramotasymen marapattaldy. Jary Ábdihalyqova Jumagúl apa ekeýi 6 ul, 4 qyz ósirip, jetkizgen.
Úshinshi oryndy ielengen úshinshi otbasy –- Talǵardan kelgen Kúshbaevtar áýleti. Marat pen Gúlnáz jas ta bolsa qiyndyqtan qoryqpai, bala sanyn shektemei, kópke úlgi bolyp kele jatqan otbasy. Olar 10 bala ósirip, tárbieleýde. On birinshi bala aǵymdaǵy jyly dúniege keledi dep kútýde.
«Mereili otbasy» ulttyq baiqaýynyń aimaqtyq kezeńinde ekinshi oryndy úsh otbasy jeńip aldy.
Birinshi otbasy Jambyl aýdanynan – Sembievter. Otbasynda 3 ul, 7 qyz tatý-tátti ósip keledi.
Kelesi ekinshi oryn iegeri Eskeldi aýdanynan – Qasenovter otbasy. Aitbai Qasenov «Eskeldi aýdanynyń Qurmetti azamaty». Otanasy Kúntái «Pobeda» ujymsharynda qyzylshashy bolyp jumys istegen. Otbasynda 6 ul, 6 qyz tárbielenýde.
Ekinshi oryn alǵan úshinshi otbasy Alakól aýdanynan kelgen Zýevter otbasy. Alik pen Amansulý Kólbai aýylynyń aýylsharýashylyq jumystarynyń maitalmany. Olar 3 qyz, 3 uldy erjetkizip keledi.
«Mereili otbasy» ulttyq baiqaýynyń birinshi dárejeli diplomy eki otbasyǵa buiyrdy.
Balqash aýdanynan Qystaýbaevtar otbasy. Qystaýbaev Ábdijappar 1999 jyly «Oktiabrdiń 50 jyldyǵy» sovhozy bazasynda «Birlik» Aktsionerlik qoǵamyn qurǵan. Osy ujymda qazirgi tańda 330-dai adam eńbek etýde. 2018 jyly Birlik aýylynda eski qonaqúi ǵimaratyn jóndeýge, jattyǵý zalyn ashý jumystaryna 2 mln teńgege demeýshilik etken. Qandas baýyrlarymyzdy Mońǵoliia jáne Qaraqalpaqstan elinen elge tartyp, 50 otbasyn baspanamen jáne turaqty jumyspen qamtamasyz etti. 7 kópbalaly otbasyǵa 19 mln teńgege alynǵan 7 úidiń kiltin tabystady. Búginde Qazaq ulttyq agrarlyq ýniversitetiniń Qurmetti professory. Oblystyq máslihattyń Qurmetti depýtaty, oblys jáne Balqash aýdanynyń Qurmetti azamaty. Baqytty januia 3 ul, 1 qyz tárbielep, 10 nemereniń qyzyǵyn kórýde.
Birinshi oryn alǵan kelesi Kerbulaq aýdanynan Aqbasovtar otbasy. Aqbasov Baiasyl Erasyluly – aýylsharýashylyq óndiris kooperativiniń tóraǵasy. Jyl saiyn 4,5 mln-ǵa kópbalaly jáne turmysy tómen eki otbasyǵa úi satyp alyp beredi. Sonymen qatar búgingi kúnge deiin atalǵan otbasydaǵy 32 balaǵa 15 000 teńgeden kómek úlestirgen. 2 jyl qatarynan balalar kúnine orai, «Qýansa, bala qýansyn» sharasynda 1 mln 800 myń teńgege merekelik syilyqtar tabystady. Otanasy Aqbasova Ǵaliia Niiazqyzy 1979-2017 jyldarda Kerbulaq aýdanynda ustazdyq etken. 2019 jyldyń aqpan aiynda Elbasy Nursultan Ábishuly Nazarbaevtyń qatysýymen ótken «Áleýmettik qamqorlyqqa – 10 qadam» atty «Nur Otan» partiiasynyń XVIII sezinde kópbalaly analar atynan sóz sóiledi. Oqylǵan baiandama negizinde respýblika boiynsha 5 naýryz «Analar keńesi kúni» dep belgilendi. Búginde 3 ul, 2 qyz, 11 nemereni tárbielep ósirgen otbasy.
Marapattaý sońynda baiqaýǵa qatysqan otbasylar atynan Ǵaliia Aqbasova sóz sóilep, sharany uiymdastyrýshylarǵa alǵysyn arnady. «Qazaq ejelden bala tárbiesine erekshe kóńil bólgen. Ul-qyzynyń qaiyrymdy, kópshil bolyp ósýine mán bergen. Oblysymyzdyń ákimi Amandyq Batalovqa osyndai shara ótkizgeni úshin alǵys bildiremin. «Balany besikten, kelindi esikten» degen naqyl bar. Ósirgen balalarymyz sanaly bolsyn. Barlyq otbasynyń baqyty arta bersin», – dedi ol óz alǵysynda.
Aita keteiik, sharanyń jalǵasy respýblikalyq deńgeide ótkiziledi. Oǵan birinshi oryn alǵan eki otbasy da qatysady. Daýys berý SMS-habarlamalar jáne internet-resýrs arqyly interaktivti negizde júzege asady. Endeshe, oblys atynan shyǵatyn Qystaýbaevtar jáne Aqbasovtar otbasyna sáttilik demeý bolsyn demekpiz.
