«مەرەيلى وتباسى» ۇلتتىق بايقاۋى تالدىقورعاندا وسىمەن التىنشى رەت ۇيىمداستىرىلىپ وتىر.
شارانىڭ ماقساتى – وتباسىندا ءوزارا كەلىسىم مەن رۋحاني سىيلاستىقتى نىعايتۋ. ءبىر شاڭىراق استىنداعى بەرەكەلى ءومىر ءسۇرۋدىڭ ماڭىزدىلىعىن ارتتىرۋ. كوپۇلتتى ەلىمىز ءۇشىن مۇنداي شارانىڭ ءمانى زور. بيىلعى وبلىستىق بايقاۋعا بارلىعى 36 وتباسى قاتىسىپ، باعىن سىنادى.
يگى شارانىڭ شىمىلدىعىن الماتى وبلىسى اكىمىنىڭ ورىنباسارى اقان جىلقىشىباي ۇلى اشتى.
«وتباسى دەگەنىمىز، ول – ءار ادامنىڭ جىلىلىق پەن مەيىرىمگە تولى كيەلى بەسىگى، قاسيەتتى شاڭىراعى. ءبىزدىڭ جەتىسۋ جەرىندە عاسىرلار بويى ۇرپاق ساباقتاستىعى جاراسىمدى جالعاسىن تاۋىپ كەلەدى. ەل ىشىندە قۇرمەتكە بولەنگەن، ارداقتى، ونەگەلى وتباسىلار بارشىلىق. سوندىقتان جىل وتكەن سايىن «مەرەيلى وتباسى» بايقاۋىنىڭ ءمانى ارتىپ كەلەدى. بۇگىنگى بايقاۋعا قاتىسىپ، دارا شىققان وتباسىلاردى – جەتىسۋ جەرىنىڭ، قازاق ەلىنىڭ ماقتانىشى دەپ بىلەمىن. بايقاۋ جەڭىمپازدارىن شىن جۇرەكتەن قۇتتىقتايمىن. ەلىمىزدىڭ تاۋەلسىزدىگى تۇعىرلى، شاڭىراعى بيىك، كەرەگەسى كەڭ بولسىن»، – دەگەن جىلى لەبىزىن ءبىلدىرىپ، بايقاۋ جەڭىمپازدارىن ماراپاتتادى.
«مەرەيلى وتباسى» ۇلتتىق بايقاۋىنىڭ وبلىستىق كەزەڭىندە ءۇشىنشى ورىنعا ءۇش وتباسى يە بولدى. ولار:
ەڭبەكشىقازاق اۋدانىنان الىمبەكوۆتەر وتباسى. الىمبەكوۆ قۇلجاباي ءومىرىنىڭ سوڭىنا دەيىن مال شارۋاشىلىعىمەن اينالىسقان. وتاناسى تۇرسىنبايەۆا ازيزحان «التىن القا» يەگەرى، «ۆەتەران ترۋدا» مەدالى، «ماتەرينسكايا سلاۆا» وردەنى، «مات گەروينيا» مەدالدارىمەن ناگرادتتالعان. وتباسىندا 7 ۇل، 2 قىز، 31 نەمەرە، 21 شوبەرە بار.
ەكىنشى وتباسى كەگەن اۋدانىنان كەلگەن – الديبەكوۆتەر. اشىربەك اتا سوعىس كەزىندە تىلدا ەرەن ەڭبەك كورسەتكەن. زەينەتكە شىققان سوڭ اۋىل اقساقالدارىنىڭ ءتوراعاسى، وبلىستىق، اۋداندىق، اۋىلدىق شارالاردىڭ باسى-قاسىندا ءجۇرىپ كەلەدى. ادال ەڭبەگى ءۇشىن 10 رەت مەرەكەلىك مەدال، «تىل جانە ەڭبەك ارداگەرى» وردەنىمەن، 5 رەت اۋداندىق، وبلىستىق «قۇرمەت» وردەنىمەن، سونىمەن قاتار رەسپۋبليكالىق ارداگەرلەر كەڭەسىنىڭ «قۇرمەت» گراموتاسىمەن ماراپاتتالدى. جارى ءابدىحالىقوۆا جۇماگۇل اپا ەكەۋى 6 ۇل، 4 قىز ءوسىرىپ، جەتكىزگەن.
ءۇشىنشى ورىندى يەلەنگەن ءۇشىنشى وتباسى –- تالعاردان كەلگەن كۇشبايەۆتار اۋلەتى. مارات پەن گۇلناز جاس تا بولسا قيىندىقتان قورىقپاي، بالا سانىن شەكتەمەي، كوپكە ۇلگى بولىپ كەلە جاتقان وتباسى. ولار 10 بالا ءوسىرىپ، تاربيەلەۋدە. ون ءبىرىنشى بالا اعىمداعى جىلى دۇنيەگە كەلەدى دەپ كۇتۋدە.
«مەرەيلى وتباسى» ۇلتتىق بايقاۋىنىڭ ايماقتىق كەزەڭىندە ەكىنشى ورىندى ءۇش وتباسى جەڭىپ الدى.
ءبىرىنشى وتباسى جامبىل اۋدانىنان – سەمبييەۆتەر. وتباسىندا 3 ۇل، 7 قىز ءتاتۋ-تاتتى ءوسىپ كەلەدى.
كەلەسى ەكىنشى ورىن يەگەرى ەسكەلدى اۋدانىنان – قاسەنوۆتەر وتباسى. ايتباي قاسەنوۆ «ەسكەلدى اۋدانىنىڭ قۇرمەتتى ازاماتى». وتاناسى كۇنتاي «پوبەدا» ۇجىمشارىندا قىزىلشاشى بولىپ جۇمىس ىستەگەن. وتباسىندا 6 ۇل، 6 قىز تاربيەلەنۋدە.
ەكىنشى ورىن العان ءۇشىنشى وتباسى الاكول اۋدانىنان كەلگەن زۋيەۆتەر وتباسى. اليك پەن امانسۇلۋ كولباي اۋىلىنىڭ اۋىلشارۋاشىلىق جۇمىستارىنىڭ مايتالمانى. ولار 3 قىز، 3 ۇلدى ەرجەتكىزىپ كەلەدى.
«مەرەيلى وتباسى» ۇلتتىق بايقاۋىنىڭ ءبىرىنشى دارەجەلى ديپلومى ەكى وتباسىعا بۇيىردى.
بالقاش اۋدانىنان قىستاۋبايەۆتار وتباسى. قىستاۋبايەۆ ءابدىجاپپار 1999 جىلى «وكتيابردىڭ 50 جىلدىعى» سوۆحوزى بازاسىندا «بىرلىك» اكسيونەرلىك قوعامىن قۇرعان. وسى ۇجىمدا قازىرگى تاڭدا 330-داي ادام ەڭبەك ەتۋدە. 2018 جىلى بىرلىك اۋىلىندا ەسكى ءقوناقۇي عيماراتىن جوندەۋگە، جاتتىعۋ زالىن اشۋ جۇمىستارىنا 2 ملن تەڭگەگە دەمەۋشىلىك ەتكەن. قانداس باۋىرلارىمىزدى موڭعوليا جانە قاراقالپاقستان ەلىنەن ەلگە تارتىپ، 50 وتباسىن باسپانامەن جانە تۇراقتى جۇمىسپەن قامتاماسىز ەتتى. 7 كوپبالالى وتباسىعا 19 ملن تەڭگەگە الىنعان 7 ءۇيدىڭ كىلتىن تابىستادى. بۇگىندە قازاق ۇلتتىق اگرارلىق ۋنيۆەرسيتەتىنىڭ قۇرمەتتى پروفەسسورى. وبلىستىق ءماسليحاتتىڭ قۇرمەتتى دەپۋتاتى، وبلىس جانە بالقاش اۋدانىنىڭ قۇرمەتتى ازاماتى. باقىتتى جانۇيا 3 ۇل، 1 قىز تاربيەلەپ، 10 نەمەرەنىڭ قىزىعىن كورۋدە.
ءبىرىنشى ورىن العان كەلەسى كەربۇلاق اۋدانىنان اقباسوۆتار وتباسى. اقباسوۆ باياسىل ەراسىل ۇلى – اۋىلشارۋاشىلىق ءوندىرىس كووپەراتيۆىنىڭ ءتوراعاسى. جىل سايىن 4،5 ملن-عا كوپبالالى جانە تۇرمىسى تومەن ەكى وتباسىعا ءۇي ساتىپ الىپ بەرەدى. سونىمەن قاتار بۇگىنگى كۇنگە دەيىن اتالعان وتباسىداعى 32 بالاعا 15 000 تەڭگەدەن كومەك ۇلەستىرگەن. 2 جىل قاتارىنان بالالار كۇنىنە وراي، «قۋانسا، بالا قۋانسىن» شاراسىندا 1 ملن 800 مىڭ تەڭگەگە مەرەكەلىك سىيلىقتار تابىستادى. وتاناسى اقباسوۆا عاليا نياز قىزى 1979-2017 جىلداردا كەربۇلاق اۋدانىندا ۇستازدىق ەتكەن. 2019 جىلدىڭ اقپان ايىندا ەلباسى نۇرسۇلتان ءابىش ۇلى نازاربايەۆتىڭ قاتىسۋىمەن وتكەن «الەۋمەتتىك قامقورلىققا – 10 قادام» اتتى «نۇر وتان» پارتياسىنىڭ XVIII سەزىندە كوپبالالى انالار اتىنان ءسوز سويلەدى. وقىلعان بايانداما نەگىزىندە رەسپۋبليكا بويىنشا 5 ناۋرىز «انالار كەڭەسى كۇنى» دەپ بەلگىلەندى. بۇگىندە 3 ۇل، 2 قىز، 11 نەمەرەنى تاربيەلەپ وسىرگەن وتباسى.
ماراپاتتاۋ سوڭىندا بايقاۋعا قاتىسقان وتباسىلار اتىنان عاليا اقباسوۆا ءسوز سويلەپ، شارانى ۇيىمداستىرۋشىلارعا العىسىن ارنادى. «قازاق ەجەلدەن بالا تاربيەسىنە ەرەكشە كوڭىل بولگەن. ۇل-قىزىنىڭ قايىرىمدى، كوپشىل بولىپ وسۋىنە ءمان بەرگەن. وبلىسىمىزدىڭ اكىمى اماندىق باتالوۆقا وسىنداي شارا وتكىزگەنى ءۇشىن العىس بىلدىرەمىن. «بالانى بەسىكتەن، كەلىندى ەسىكتەن» دەگەن ناقىل بار. وسىرگەن بالالارىمىز سانالى بولسىن. بارلىق وتباسىنىڭ باقىتى ارتا بەرسىن»، – دەدى ول ءوز العىسىندا.
ايتا كەتەيىك، شارانىڭ جالعاسى رەسپۋبليكالىق دەڭگەيدە وتكىزىلەدى. وعان ءبىرىنشى ورىن العان ەكى وتباسى دا قاتىسادى. داۋىس بەرۋ سمس-حابارلامالار جانە ينتەرنەت-رەسۋرس ارقىلى ينتەراكتيۆتى نەگىزدە جۇزەگە اسادى. ەندەشە، وبلىس اتىنان شىعاتىن قىستاۋبايەۆتار جانە اقباسوۆتار وتباسىنا ساتتىلىك دەمەۋ بولسىن دەمەكپىز.
