Almatyda otbasylyq qundylyqtardy dáriptep, ónegeli shańyraqtardy kópshilikke úlgi etýge baǵyttalǵan «Mereili otbasy» baiqaýynyń qalalyq kezeńi aiaqtaldy. Biyl Almaty qalasy atalǵan ulttyq konkýrsqa 12-ret qatysyp otyr, dep habarlaidy dalanews.kz.
Jeńimpazdardy marapattaý saltanatyna qalanyń segiz aýdanynda ótken irikteý kezeńderiniń jeńimpazdary qatysyp, estelik jáne aqshalai syilyqtarmen marapattaldy. Almaty qalasynyń jeńimpazy Bilial otbasy boldy. Endi olar Astana qalasynda ótetin respýblikalyq baiqaýdyń jeńimpazdaryn marapattaý rásimine qatysady.
Biylǵy baiqaýda ádil qazylar quramynda bolǵan Almaty qalalyq qoǵamdyq keńesiniń múshesi Marat Qalimoldin irikteý asa joǵary deńgeide ótkenin aitty:
– Jalpy 262 ótinim tústi. Aýdandarda birinshi kezeń ótip, qalalyq kezeńge ár aýdannan eki otbasy qatysty. «Mereili otbasy» – elimizdegi asa mańyzdy, qoǵam úshin kókeikesti máselelerdiń birin kóteretin erekshe baiqaý. Otbasylyq qundylyqtardy saqtaý men dáripteýde mundai sharalardyń orny bólek. Tálimi men tárbiesi mol, ónegeli otbasylardyń jeńiske jetip, halyqqa úlgi bolýy – baiqaýdyń basty mańyzy, – dedi ol.
«Mereili otbasy» baiqaýynyń mundai igi bastamalary berekeli shańyraqtardyń ónegesin nasihattap qana qoimai, jas urpaqqa otbasynyń qadirin uǵyndyrýǵa jáne qoǵamdaǵy otbasylyq qundylyqtardy odan ári nyǵaitýǵa yqpal etedi.
