Halyqtyń súiikti sheneýnikteriniń qatarynda bolǵan qazirgi depýtat Ashat Aimaǵambetov bilim salasyna qatysty mańyzdy saýaldarǵa jaýap berdi,- dep habarlaidy Dalanews.kz.
Jýyrda Joǵary aýditorlyq palata Oqý-aǵartý ministrligine qatysty 16 mlrd teńge týraly aqparat jariialady. Ashat Aimaǵambetov bul týrasynda bylai deidi:
"Oqý-aǵartý ministrligin tekserdik, 16 mlrd teńge kitaptar boiynsha tiimsiz jumsalǵan" deidi. Qalai tiimsiz jumsaldy? "Kitaptardy merziminen buryn shyǵarǵan" deidi. 2021 jyly Álippeni qaitardyq. Tiptik oqý josparyna ózgeris engizdik. Ony Saýat ashý emes, Álippe dedik. Álippe degen tek aty ózgergen joq, onyń zaty ózgerdi, ádistemesi, balaǵa degen kózqaras ózgerdi. Ony ózgertkennen keiin, árine, Álippe degen jańa oqýlyq shyǵardyq. ...Ózin-ózi taný degen boldy, baǵdarlamadan ony alyp tastadyq. Osy ózgeristerdi kemshilik retinde aityp otyr. Biraq muǵalimderden "tiimdi sheshim be?" dep surasaq, meniń oiymsha, basym kópshiligi "tiimdi sheshim" deidi. Onda nege bulai aitamyz? Alypqashpa aqparat kóp. "Oibai" dep attandaityn aqparat siiaqty, 40, 400-500 mlrd dep jazyp qoiady. Biraq ony saraptai bilý kerek, nege, qalai bolǵanyn túsiný kerek. Bir jaǵynan sol aqparatty tekserýshi organdardyń ózderi de "jumys istep jatyrmyz, jalaqyny bosqa alyp jatqan joqpyz" degendi kórsetkisi keledi ǵoi. Sondai bir úlken aqparatty haip retinde bergen de derekter az emes. Ony bergennen keiin bizdiń halyqta da "bárin jep jatyr eken, bári quryp jatyr eken" degen oi paida bolady. Aqty aq, qarany qara deýimiz kerek", - dedi depýtat Adal Adam-ǵa bergen suhbatynda.
Bilim salasynda tiktoker, bloger muǵalim-direktorlar kóbeigeni qanshalyq durys? Depýtat saýalǵa bylai jaýap berdi:
"Ustazdyń beinesi, immidji, bedeli óte mańyzdy. Kúndelikti kúlkige, ázilge ainaldyryp jibersek, ne bolady? Rilstiń aty - rils. Árine, jumysty kórsetý kerek. Balalarmen jaqyn qarym-qatynas bolýy kerek te shyǵar. Biraq bári birdei anekdot aityp, bári birdei neshe túrli Instagram men TikTok-tyń trendterinen qalmaimyn dep júrgeni suraq týǵyzady. Sondyqtan ministrliktiń naqty ustanymy bolýy kerek. Men ózim ministrlikte jumys istegende, áriptesterim biledi, qatty qoldamaitynmyn, sondyqtan mundai másele qatty órshimegen siiaqty. Ár nárseniń reti bar. Kez kelgen nárseni rilsqa túsirip, Instagram-da jariialaý degendi túsinbeimin", - dedi ol.
Keiingi kezde jekemenshik mektep kóbeidi. Bul júie óz-ózin aqtap jatyr ma, álde biznes quraly ma?
"Bizde memlekettik mektepter de, jekemenshik mektepter de bar. Memlekettik mektepterdiń ózderinde bes saýsaq birdei emes deidi ǵoi. Olarda da óte sapaly bilim berip jatqan memlekettik mektepter bar, tipti jumysyn salǵyrt, óte tómen deńgeide uiymdastyryp jatqan mektepter de bar. Jekemenshik mektepterde de dál sondai. Óte myqty, jaqsy jumys istep jatqan mektepter bar. Sapasyz mektepter de bar. Sondyqtan sapaly, sapasyz mektep dep bólemin", - deidi ol.
