Shymkentte Nurai Serikbaidyń ólimine qatysty qylmystyq is boiynsha sot protsesi jalǵasyp jatyr. Sot otyrysynda 11 qańtar kúni oqiǵa ornynda bolǵan kýáger Indira Berkinbaeva jaýap berdi, dep habarlaidy dalanews.kz.
Onyń aitýynsha, sol kúni jumystan úiine qaityp kele jatqanda eki úidiń arasynan aiqailaǵan daýysty estigen. Daýys shyqqan jaqqa jaqyndaǵanda, kólikterdiń arasynda jerde jatqan qyzdy jáne oqiǵa ornynan qashyp bara jatqan jigitti kórgen.
«Men oǵan: "Ne istep jatyrsyń? Qazir politsiia shaqyramyn!" dep aiqailadym. Sol kezde ol qaita burylyp kelip, qyzǵa taǵy 2-3 ret pyshaq suqty. Men eseńgirep qaldym, keiin úige qarai júgirip kettim. Menińshe, joldan ótip bara jatqan eki-úsh jigit politsiia shaqyrǵan bolýy múmkin», – dedi kýáger sotta.
Indira Berkinbaevanyń sózinshe, jigit qaita oralyp soqqy jasaǵan kezde Nurai úidiń mańynda shalqasynan qozǵalyssyz jatqan. Ol eshqandai dybys shyǵarmaǵan jáne kómek te suramaǵan. Advokattardyń qarańǵyda qarýdy qalai kórgeni týraly suraǵyna kýáger uzyn zattyń sulbasy anyq baiqalǵanyn aitty.
Sondai-aq ol keiin qyzy ekeýi jedel járdem kelgen kezde qaitadan oqiǵa ornyna baryp, ózine belgili barlyq málimetti politsiia qyzmetkerlerine jetkizgenin aitty. Kýáger sottalýshyny buǵan deiin múlde tanymaitynyn jáne qarańǵy bolǵandyqtan onyń túrin anyq kórip, este saqtai almaǵanyn jetkizdi.
