Almaty oblysynda Lay’s qytyrlaqtaryn óndiretin PepsiCo zaýytynyń qurylysy jalǵasyp jatyr. Alaida nysanda zańbuzýshylyq bolýy múmkin degen aqparat tarady. Qurylys alańynda eńbek etip júrgen jumysshylardyń biri zaýytqa jaýapty merdiger kompaniianyń ekologiialyq talaptardy óreskel buzyp jatqanyn málimdedi, dep habarlaidy Dalanews.kz.
Onyń sózinshe, «Nak Nur Astana Qurylys kompaniiasy» qurylys barysynda paida bolǵan qaldyqtardy arnaiy tártippen joimai, qazylǵan jerge kómip tastaýda. Bul áreketterdi ol beinejazba arqyly dáleldeýge tyrysqan.
Jumysshy jariialaǵan videoda KamAZ júk kólikteriniń erimeitin ári shirimeitin túrli qoqysty qurylys aýmaǵyna tasyp ákelip, aldyn ala qazylǵan shuńqyrlarǵa tógip jatqany kórinedi. Keiin qoqys kómilgen aýmaq topyraqpen tegistelip, eshqandai iz qaldyrmai qaita qalpyna keltiriledi.
«Zaýyttan shyqqan qoqys. Paketter. Shirip jerge sińip ketetin de nárse emes. Osy shuńqyrǵa ákep tógedi, sosyn betin tegistep jaýyp tastaidy. «NAK» Nur Astana Qurylys» salyp jatqan, «prorab» Erjigit degen adam jasatyp jatyr. Ózi jamaǵatqa syily, jumaǵa baryp júrgen adam. Yntymaq aýylyndaǵy jaǵdai, qazirgi Alataý qalasy. Meni osy úshin jumystan shyǵaryp jiberedi, kepildik berem, biraq aitpasqa bolmady, júrekke tynyshtyq joq. Óziń jerińdi óziń lastaǵanǵa kináli sezinesiń, shara qoldansańyzdar»,- dedi jumysshy.
Avtordyń aitýynsha, osy jaǵdaidy áshkerelegeni úshin ony jumystan shyǵarý qaýpi bar.
Aita keteiik, Lay’s qytyrlaqtaryn shyǵaratyn zaýyttyń qurylysy 2024 jyly bastalǵan. Kásiporyndy iske qosý biylǵy naýryz aiyna josparlanǵan. Qurylys jumystaryna myńdaǵan adam tartylǵan.
