الماتى وبلىسىندا Lay’s قىتىرلاقتارىن وندىرەتىن PepsiCo زاۋىتىنىڭ قۇرىلىسى جالعاسىپ جاتىر. الايدا نىساندا زاڭبۇزۋشىلىق بولۋى مۇمكىن دەگەن اقپارات تارادى. قۇرىلىس الاڭىندا ەڭبەك ەتىپ جۇرگەن جۇمىسشىلاردىڭ ءبىرى زاۋىتقا جاۋاپتى مەردىگەر كومپانيانىڭ ەكولوگيالىق تالاپتاردى ورەسكەل بۇزىپ جاتقانىن مالىمدەدى، دەپ حابارلايدى Dalanews.kz.
ونىڭ سوزىنشە، «ناك نۇر استانا قۇرىلىس كومپانياسى» قۇرىلىس بارىسىندا پايدا بولعان قالدىقتاردى ارنايى تارتىپپەن جويماي، قازىلعان جەرگە كومىپ تاستاۋدا. بۇل ارەكەتتەردى ول بەينەجازبا ارقىلى دالەلدەۋگە تىرىسقان.
جۇمىسشى جاريالاعان ۆيدەودا كاماز جۇك كولىكتەرىنىڭ ەرىمەيتىن ءارى شىرىمەيتىن ءتۇرلى قوقىستى قۇرىلىس اۋماعىنا تاسىپ اكەلىپ، الدىن الا قازىلعان شۇڭقىرلارعا توگىپ جاتقانى كورىنەدى. كەيىن قوقىس كومىلگەن اۋماق توپىراقپەن تەگىستەلىپ، ەشقانداي ءىز قالدىرماي قايتا قالپىنا كەلتىرىلەدى.
«زاۋىتتان شىققان قوقىس. پاكەتتەر. ءشىرىپ جەرگە ءسىڭىپ كەتەتىن دە نارسە ەمەس. وسى شۇڭقىرعا اكەپ توگەدى، سوسىن بەتىن تەگىستەپ جاۋىپ تاستايدى. «ناك» نۇر استانا قۇرىلىس» سالىپ جاتقان، «پروراب» ەرجىگىت دەگەن ادام جاساتىپ جاتىر. ءوزى جاماعاتقا سىيلى، جۇماعا بارىپ جۇرگەن ادام. ىنتىماق اۋىلىنداعى جاعداي، قازىرگى الاتاۋ قالاسى. مەنى وسى ءۇشىن جۇمىستان شىعارىپ جىبەرەدى، كەپىلدىك بەرەم، ءبىراق ايتپاسقا بولمادى، جۇرەككە تىنىشتىق جوق. ءوزىڭ جەرىڭدى ءوزىڭ لاستاعانعا كىنالى سەزىنەسىڭ، شارا قولدانساڭىزدار»،- دەدى جۇمىسشى.
اۆتوردىڭ ايتۋىنشا، وسى جاعدايدى اشكەرەلەگەنى ءۇشىن ونى جۇمىستان شىعارۋ ءقاۋپى بار.
ايتا كەتەيىك، Lay’s قىتىرلاقتارىن شىعاراتىن زاۋىتتىڭ قۇرىلىسى 2024 جىلى باستالعان. كاسىپورىندى ىسكە قوسۋ بيىلعى ناۋرىز ايىنا جوسپارلانعان. قۇرىلىس جۇمىستارىنا مىڭداعان ادام تارتىلعان.
