Suhbatta Dos Kóshim naǵyz saiasatkerler úndemei-aq úidei is bitiretinin alǵa tartypty.
– Qazir kópshilik kim telearnada, áleýmettik jelide kóp sóilese sol adam saiasatpen belsendi túrde ainalysyp júr dep oilaidy. Saiasatpen ainalysqysy kelgen adamdar da osy kózqarasty ustanady.
Árine, kez kelgen saiasatker halyqqa tanymal bolýy kerek. Biraq saiasatker kópshilikti sózimen emes, isimen baýrap alý kerek qoi.
Osy turǵydan alǵanda men kóp sóilep kópshiliktiń kózine túskendi qalmaimyn. Iá, qazirgi qoǵamdyq saiasi ómirde aq boz atqa minip alyp, jurttyń aldyna shyǵyp, sońynan ertetin tulǵalar bolady.
Biraq, kez kelgen saiasatker aldymen óziniń isimen tanylýy kerek dep esepteimin, – depti saiasatker. Osy tusta jýrnalsit Nartai Aralbaiuly:
– Osyǵan deiin ótken Prezident sailaýynda siz úndemei is bitiretin saiasatker, al Ámirjan Qosanov aq boz atqa minip top bastaityn saiasatker boldy ma? – dep suraq qoiady.
– Ótken sailaýdaǵy Ámirjannyń árketin qarsylastarym betimizge salyq qylyp basýmen keledi. Bul meniń qarsylastaryma jaqsy boldy.
Ashyǵyn aitsaq, sol sailaýda Ámirjan Qosanaov Prezidenttik saiasi dodaǵa qatysý úshin men basqaratyn «Ult taǵdyry» qoǵamdyq uiymyn paidalandy.
Al qalǵan sailaý naýqanyn qalai júrgizetinin, halyqqa nendei áńgime aitatynyn ózi shesheti. Óitkeni ol saiasattyń qazanynda 30 jyl qainaǵan azamat qoi. Is-tájiribesi jetkilikti.
Sodan keiin taǵy bir eskertetin jait, «Ult taǵdyry» qozǵalysynyń jinalysynda bul máseleni talqylaǵanymyzda uiymǵa múshe azamattar keńesip, sheshim qabyldady.
Eger sol kezde men Ámirjan Qosanovtyń «Ult taǵdyry» uiymy atynan kandidat retinde sailaýǵa túsýine qarsymyn» dep sýyrylyp shyqsam da, meniń aitqanym bolmas edi.
Bizdiń qoǵam birinshi basshy ne aitsa, sonyń aitqany zań, tolyqtai oryndalady dep oilaidy. Jalpy, bul kózqaras Keńes zamanynda, odan keiin Nazarbaev kezeńinde myzǵymastai bolyp ornyqty. Osy oi halyqtyń sanasyna da sińip ketkeni jasyryn emes.
Biraq «Ult taǵdyry» uiymy ondai emes. Men ol jerde bar bolǵany basshymyn. Meniń basshy bolýym – barlyq másele men oilaǵandai bolady degendi bildirmeidi. Bizdiń bilikten artyqshylyǵymyz da osyda.
Sondyqtan halyq meniń Nazarbaev, «Ult taǵdyrynyń» «Nur Otan» partiiasy emes ekenin túsinýi kerek. «Nur Otan» partiiasynyń jiynynda Nazarbaevtyń aitqanyn partiialastary útir-núktesine deiin oryndap kelgeni belgili.
Biraq «Ult taǵdyryna» múshe azamattardyń aitar oiy, pikiri bar. Olar meniń aitqanymen júrmeidi, – dep Dos Kóshim jaýap beripti.
