سۇحباتتا دوس كوشىم ناعىز ساياساتكەرلەر ۇندەمەي-اق ۇيدەي ءىس بىتىرەتىنىن العا تارتىپتى.
– ءقازىر كوپشىلىك كىم تەلەارنادا، الەۋمەتتىك جەلىدە كوپ سويلەسە سول ادام ساياساتپەن بەلسەندى تۇردە اينالىسىپ ءجۇر دەپ ويلايدى. ساياساتپەن اينالىسقىسى كەلگەن ادامدار دا وسى كوزقاراستى ۇستانادى.
ارينە، كەز كەلگەن ساياساتكەر حالىققا تانىمال بولۋى كەرەك. ءبىراق ساياساتكەر كوپشىلىكتى سوزىمەن ەمەس، ىسىمەن باۋراپ الۋ كەرەك قوي.
وسى تۇرعىدان العاندا مەن كوپ سويلەپ كوپشىلىكتىڭ كوزىنە تۇسكەندى قالمايمىن. ءيا، قازىرگى قوعامدىق ساياسي ومىردە اق بوز اتقا ءمىنىپ الىپ، جۇرتتىڭ الدىنا شىعىپ، سوڭىنان ەرتەتىن تۇلعالار بولادى.
ءبىراق، كەز كەلگەن ساياساتكەر الدىمەن ءوزىنىڭ ىسىمەن تانىلۋى كەرەك دەپ ەسەپتەيمىن، – دەپتى ساياساتكەر. وسى تۇستا جۋرنالسيت نارتاي ارالباي ۇلى:
– وسىعان دەيىن وتكەن پرەزيدەنت سايلاۋىندا ءسىز ۇندەمەي ءىس بىتىرەتىن ساياساتكەر، ال ءامىرجان قوسانوۆ اق بوز اتقا ءمىنىپ توپ باستايتىن ساياساتكەر بولدى ما؟ – دەپ سۇراق قويادى.
– وتكەن سايلاۋداعى ءامىرجاننىڭ اركەتىن قارسىلاستارىم بەتىمىزگە سالىق قىلىپ باسۋمەن كەلەدى. بۇل مەنىڭ قارسىلاستارىما جاقسى بولدى.
اشىعىن ايتساق، سول سايلاۋدا ءامىرجان قوساناوۆ پرەزيدەنتتىك ساياسي دوداعا قاتىسۋ ءۇشىن مەن باسقاراتىن «ۇلت تاعدىرى» قوعامدىق ۇيىمىن پايدالاندى.
ال قالعان سايلاۋ ناۋقانىن قالاي جۇرگىزەتىنىن، حالىققا نەندەي اڭگىمە ايتاتىنىن ءوزى شەشەتى. ويتكەنى ول ساياساتتىڭ قازانىندا 30 جىل قايناعان ازامات قوي. ىس-تاجىريبەسى جەتكىلىكتى.
سودان كەيىن تاعى ءبىر ەسكەرتەتىن جايت، «ۇلت تاعدىرى» قوزعالىسىنىڭ جينالىسىندا بۇل ماسەلەنى تالقىلاعانىمىزدا ۇيىمعا مۇشە ازاماتتار كەڭەسىپ، شەشىم قابىلدادى.
ەگەر سول كەزدە مەن ءامىرجان قوسانوۆتىڭ «ۇلت تاعدىرى» ۇيىمى اتىنان كانديدات رەتىندە سايلاۋعا تۇسۋىنە قارسىمىن» دەپ سۋىرىلىپ شىقسام دا، مەنىڭ ايتقانىم بولماس ەدى.
ءبىزدىڭ قوعام ءبىرىنشى باسشى نە ايتسا، سونىڭ ايتقانى زاڭ، تولىقتاي ورىندالادى دەپ ويلايدى. جالپى، بۇل كوزقاراس كەڭەس زامانىندا، ودان كەيىن نازاربايەۆ كەزەڭىندە مىزعىماستاي بولىپ ورنىقتى. وسى وي حالىقتىڭ ساناسىنا دا ءسىڭىپ كەتكەنى جاسىرىن ەمەس.
ءبىراق «ۇلت تاعدىرى» ۇيىمى ونداي ەمەس. مەن ول جەردە بار بولعانى باسشىمىن. مەنىڭ باسشى بولۋىم – بارلىق ماسەلە مەن ويلاعانداي بولادى دەگەندى بىلدىرمەيدى. ءبىزدىڭ بيلىكتەن ارتىقشىلىعىمىز دا وسىدا.
سوندىقتان حالىق مەنىڭ نازاربايەۆ، «ۇلت تاعدىرىنىڭ» «نۇر وتان» پارتياسى ەمەس ەكەنىن ءتۇسىنۋى كەرەك. «نۇر وتان» پارتياسىنىڭ جيىنىندا نازاربايەۆتىڭ ايتقانىن پارتيالاستارى ۇتىر-نۇكتەسىنە دەيىن ورىنداپ كەلگەنى بەلگىلى.
ءبىراق «ۇلت تاعدىرىنا» مۇشە ازاماتتاردىڭ ايتار ويى، پىكىرى بار. ولار مەنىڭ ايتقانىمەن جۇرمەيدى، – دەپ دوس كوشىم جاۋاپ بەرىپتى.
