Talǵarda bir top adamnyń qolynan ajal qushqan Sherzat Bolattyń isinde esimi birneshe ret atalǵan atyshýly Hasan Qasymbaev qazaqstandyqtarǵa úndeý jasady. Túrli derekkóz ony "Hýtor" bandasynyń basshysy dep kórsetken edi. Alaida Qasymbaev álemjelide tarap jatqan aqparattardyń jalǵan ekenin ári ózine jala jabylyp jatqanyn alǵa tartty, dep habarlaidy Dalanews.kz.
Qasymbaevtyń sózinshe, jelide taralǵan jalǵan aqparat otbasyna aýyr tiip jatyr.
“Qurmetti qazaq eli! Birneshe kúnnen beri áleýmettik jelide tarap jatqan aqparattaǵy Qasymbaev Hasan degen - men. Talǵarda bolǵan qaiǵyly oqiǵa, Sherzat degen balanyń qazasyna, týǵan-týysqandaryna, áke-sheshesine qaiǵyryp kóńil aitamyn. Árine, qiyn. Eshqaisymyzdyń basymyzǵa bermesin. Men de ákemin. Bala tárbielep, ósirip otyrmyn.
Bizdiń otbasymyzǵa da ońai bolyp turǵan joq. Qansha kúnnen beri uiqy joq. Jalǵan aqparat meniń jáne otbasymnyń mazasyn qashyrdy”, – dedi ol.
Qasymbaev eshqandai qylmystyq topqa qatysy joq ekenin atap ótti jáne qylmyskerler tiisti jazasyn alatynyna senim bildirdi.
“Banda, OPG dep jatyr, ondaiǵa esh qatysym joq. Zań aldynda eshqandai másele bolmaǵan, sottalmaǵanmyn. Árine, inisi sottalǵan dep aityp jatyr. Inim 2017 jyldan beri jazasyn ótep jatyr. Sondyqtan jalǵan aqparat taratpaýlaryńyzdy suraimyn.
Advokat jaldadym, jalǵan aqparat taratqan tulǵalardyń bárin zań boiynsha jaýap berýin suraimyn. Men týraly aitylyp jatqan aqparat kóp, zań boiynsha aryzdaryn jazsyn. Qylmyskerler ustalyp, zań boiynsha jazalaryn alady dep oilaimyn”, – dedi ol úndeýinde.
Eske salaiyq, kúni keshe Hasan Qasymbaev óziniń ar-namysy men abyroiyn qorǵaý maqsatynda marqum balanyń ákesine jáne taǵy basqa tulǵalarǵa qarsy aryz daiyndap, Talǵar aýdandyq sotyna tapsyrǵanyn habarlaǵan edik.
Hasannyń aitýynsha, onyń atyna taǵylǵan aiyptar men qoǵamdaǵy áńgimeler shyndyqqa janaspaidy. Ol qarapaiym turmystyq tóbelesti uiymdasqan qylmystyq toptardyń arasyndaǵy qaqtyǵys retinde kórsetýge tyrysyp jatyr degen pikirde.
Kasymbaevtyń pikirinshe, ony atyshýly qylmystyq toppen bailanystyrý negizsiz. Álgi aryzda ol eshqashan kisi óltirýge qatysty jastardy kórmegenin, bilmegenin jáne olardyń áreketterine eshqandai qatysy joq ekenin málimdegen.
Hasan kez kelgen qoǵamdyq alańda, tipti BAQ arqyly óziniń kinásizdigin dáleldeýge daiyn ekenin basa aitqan. Onyń oiynsha, bul oqiǵa qarapaiym turmystyq janjal bolǵan, biraq ony ádeii burmalap, úlken qylmystyq astar qosyp, onyń atyna kir keltirmekshi.
Buǵan deiin BAQ betteri men álemjelide marqum Sherzat pen onyń otbasyna shabýyl jasaǵan bir top buzaqynyń "Hýtor" atty jergilikti bandymen bailanysy bar degen aqpar taraǵan edi. Birneshe derekkóz toptyń tóbe basynda Hasan esimdi azamattyń turǵanyn jazǵan.
Almaty oblystyq politsiia departamenti Sherzattyń ólimine kúdikti retinde ustalǵan jeti adamnyń uiymdasqan qylmystyq esh qatysy joǵyn jetkizgen.
Sonymen qatar Rysqulov aýylynyń 60-qa jýyq turǵyny Hasandy qaralap jatqandarǵa jáne aýyldaryna til tigizip jatqandarǵa úndeý joldaǵan edi.
Olar alyp-qashpa áńgimelerdi joqqa shyǵardy.
"Bizdiń aýyl úshin óte qiyn jaǵdai boldy. Eń aldymen marqum Sherzattyń otbasyna qaiǵyryp kóńil aitamyz. "Bir qumalaq, bir qaryn maidy shiritedi" dep beker aitpaǵan. Aýyr bolǵannan keiin osy taqyryp tóńireginde neshe túrli aqparat taraýda. Aýylymyz shaǵyn bolǵanymen, óte uiymshyl ekenin aitqymyz keledi. Sý tasqyny kezinde kómek berý úshin úsh kúnniń ishinde 2,5 million teńge jinap, óz qolymmen tabystaǵanmyn. Qańtar oqiǵasy kezinde de búkil Talǵar únsiz jatqan kezde osy aýyldyń jigitteri bireý-mireý kirip ketpesin dep kezek-kezek kúzetti. Buny búkil halyq estigen shyǵar, bizge eshkim osylai áreket etińder dep buiryq bergen joq.
Bul – aýylymyzdyń uiymshyldyǵy. Taiaqtyń eki ushy bolady. Bizdiń aýylymyzǵa qatysty jaman sózderdiń aitylmaýyn suraimyz. Ártúrli pikir aita bermei, quqyq qorǵaý organdaryna aryzdaryn jazsyn, teksersin. Teksermei jatsa, shýlatsyn. Úide otyryp, anaý aitty, mynaý aitty degen sózderdi doǵarý kerek", - deidi aýyl turǵyndary.
Olardyń sózinshe, atyshýly Hasan - kópke kómegin tigizip júrgen azamat.
"Hasan kerisinshe, osy aýyldyń birligi men tirligine shapqylap júr. Mektepke de, meshitke de aqshalai kómektesip keledi. Osyndai azamatty qaralap, Sherzat marqumnyń isi aidalada qaldy. Odan ósh ala almai júrgenderdiń áreketine uqsaidy. Iá, onyń inisi túrmede otyrǵan shyǵar. Al onyń jeke basyna til tigizýge bolmaidy. Oǵan da aýyr tiip jatyr. Dálel bar ma, kelińder, ustap berińder. Ary qarai quqyq qorǵaý organdary ózderi sheshedi. Qazir bireýdi otyz adamǵa jaman deseń, rasymen jaman bolyp qalady. Sol úshin alyp-qashpa áńgimelerdi doǵaraiyq. Ár nárseniń shegi bar. Buny estigen búkil aýyl jylap jatyr. Bul sumdyq jaǵdai boldy", - dep qosty olar.
