Májilis depýtaty Daniia Espaeva 2024 jylǵa arnalǵan respýblikalyq biýdjettiń oryndalý barysy týraly esep talqysynda Úkimettiń biýdjetti igerý isindegi kemshilikterin tizbektep atap ótti. Ol biýdjetti oryndaý barysynda jiberiletin olqylyqtardy depýtattar jyl saiyn kóteretinin, biraq odan kóńilge qonymdy nátije bola bermeitinin ókinishpen jetkizdi, dep habarlaidy Dalanews.kz.
"Jyl saiyn biýdjettiń oryndalýy memlekettik qaryzdyń ósimimen qatar júredi. 2024 jyly da osylai boldy. Memlekettik qaryz kólemi 2023 jylmen salystyrǵanda 17,2%-ǵa ósti", – dedi Espaeva.
Sonymen qatar ol biýdjet qarajatynyń tiimsiz jumsalýy óte joǵary deńgeide qalyptasyp otyrǵanyna nazar aýdartty.
"Mine, Joǵary aýditorlyq palatanyń málimetinshe, 2024 jyly biýdjet qarajaty men aktivteriniń tiimsiz paidalanylýy eki esege jýyq ósken. 2023 jyly bul kórsetkish 250,2 mlrd teńge bolsa, 2024 jyly ol 475 mlrd teńgege jetken. Al jalpy anyqtalǵan buzýshylyq kólemi 862 mlrd teńgeni qurap otyr (2023 jyly bul kórsetkish 523 mlrd teńge bolǵan). Buǵan qosa, 2024 jyly biýdjet rekordyq kólemde - 12 ret qaita qaralǵan, bul biýdjetti josparlaý sapasynyń tómendigin kórsetedi. Kvazimemlekettik sektorda da júieli máseleler saqtalyp otyr. Atap aitqanda, biýdjettik qarjyǵa táýeldilik pen qaryzdyq mindettemeler kóleminiń ulǵaiýda", – dep atap ótti depýtat.
Espaevanyń aitýynsha, 2024 jyly shamamen 92 mlrd teńge igerilmegen. Biýdjetti igermegender qatarynda Qarjy, Eńbek jáne halyqty áleýmettik qorǵaý, sondai-aq Kólik ministrlikteri aldyna jan salmaýda. Bul vedomstvolardyń árqaisysy 20 mlrd teńgeden astam qarjyny igere almaǵan.
"Joǵary aýditorlyq palatanyń esebine súiensek, biýdjettiń shyǵys bóliginde áleýmettik qoldaý, memlekettik qaryzǵa qyzmet kórsetý jáne óńirlerge qarjylyq kómek kórsetý siiaqty baǵyttar negizgi oryn alǵan. Kórip otyrǵanymyzdai, mundai shyǵyndar el ekonomikasyn damytýǵa baǵyttalmaǵan. 2024 jyly osy atalǵan máselelerge biýdjettiń kiris bóliginiń de oryndalmaýy qosyldy. Iaǵni salyqtyq, salyqtyq emes jáne transferttik túsimder tolyq oryndalmai, biýdjette shamamen 422 mlrd teńge tapshylyq qalyptasqan", – dep sózin qorytyndylady Daniia Espaeva.
Aita ketsek, búgin - 2025 jyl 19 mamyrda QR Májilisinde Qarjy jáne biýdjet komitetiniń keńeitilgen otyrysy ótti. Otyrys barysynda Joǵary aýditorlyq palatanyń múshesi Nurlan Nurjanov Úkimettiń 2024 jylǵy respýblikalyq biýdjettiń atqarylýy týraly esebine berilgen Joǵary aýditorlyq palata qorytyndysynyń negizgi baǵyttaryn tanystyrdy.
