ءماجىلىس دەپۋتاتى دانيا ەسپايەۆا 2024 جىلعا ارنالعان رەسپۋبليكالىق بيۋدجەتتىڭ ورىندالۋ بارىسى تۋرالى ەسەپ تالقىسىندا ۇكىمەتتىڭ بيۋدجەتتى يگەرۋ ىسىندەگى كەمشىلىكتەرىن تىزبەكتەپ اتاپ ءوتتى. ول بيۋدجەتتى ورىنداۋ بارىسىندا جىبەرىلەتىن ولقىلىقتاردى دەپۋتاتتار جىل سايىن كوتەرەتىنىن، ءبىراق ودان كوڭىلگە قونىمدى ناتيجە بولا بەرمەيتىنىن وكىنىشپەن جەتكىزدى، دەپ حابارلايدى Dalanews.kz.
"جىل سايىن بيۋدجەتتىڭ ورىندالۋى مەملەكەتتىك قارىزدىڭ وسىمىمەن قاتار جۇرەدى. 2024 جىلى دا وسىلاي بولدى. مەملەكەتتىك قارىز كولەمى 2023 جىلمەن سالىستىرعاندا 17،2%-عا ءوستى"، – دەدى ەسپايەۆا.
سونىمەن قاتار ول بيۋدجەت قاراجاتىنىڭ ءتيىمسىز جۇمسالۋى وتە جوعارى دەڭگەيدە قالىپتاسىپ وتىرعانىنا نازار اۋدارتتى.
"مىنە، جوعارى اۋديتورلىق پالاتانىڭ مالىمەتىنشە، 2024 جىلى بيۋدجەت قاراجاتى مەن اكتيۆتەرىنىڭ ءتيىمسىز پايدالانىلۋى ەكى ەسەگە جۋىق وسكەن. 2023 جىلى بۇل كورسەتكىش 250،2 ملرد تەڭگە بولسا، 2024 جىلى ول 475 ملرد تەڭگەگە جەتكەن. ال جالپى انىقتالعان بۇزۋشىلىق كولەمى 862 ملرد تەڭگەنى قۇراپ وتىر (2023 جىلى بۇل كورسەتكىش 523 ملرد تەڭگە بولعان). بۇعان قوسا، 2024 جىلى بيۋدجەت رەكوردىق كولەمدە - 12 رەت قايتا قارالعان، بۇل بيۋدجەتتى جوسپارلاۋ ساپاسىنىڭ تومەندىگىن كورسەتەدى. كۆازيمەملەكەتتىك سەكتوردا دا جۇيەلى ماسەلەلەر ساقتالىپ وتىر. اتاپ ايتقاندا، بيۋدجەتتىك قارجىعا تاۋەلدىلىك پەن قارىزدىق مىندەتتەمەلەر كولەمىنىڭ ۇلعايۋدا"، – دەپ اتاپ ءوتتى دەپۋتات.
ەسپايەۆانىڭ ايتۋىنشا، 2024 جىلى شامامەن 92 ملرد تەڭگە يگەرىلمەگەن. بيۋدجەتتى يگەرمەگەندەر قاتارىندا قارجى، ەڭبەك جانە حالىقتى الەۋمەتتىك قورعاۋ، سونداي-اق كولىك مينيسترلىكتەرى الدىنا جان سالماۋدا. بۇل ۆەدومستۆولاردىڭ ءارقايسىسى 20 ملرد تەڭگەدەن استام قارجىنى يگەرە الماعان.
"جوعارى اۋديتورلىق پالاتانىڭ ەسەبىنە سۇيەنسەك، بيۋدجەتتىڭ شىعىس بولىگىندە الەۋمەتتىك قولداۋ، مەملەكەتتىك قارىزعا قىزمەت كورسەتۋ جانە وڭىرلەرگە قارجىلىق كومەك كورسەتۋ سياقتى باعىتتار نەگىزگى ورىن العان. كورىپ وتىرعانىمىزداي، مۇنداي شىعىندار ەل ەكونوميكاسىن دامىتۋعا باعىتتالماعان. 2024 جىلى وسى اتالعان ماسەلەلەرگە بيۋدجەتتىڭ كىرىس بولىگىنىڭ دە ورىندالماۋى قوسىلدى. ياعني سالىقتىق، سالىقتىق ەمەس جانە ترانسفەرتتىك تۇسىمدەر تولىق ورىندالماي، بيۋدجەتتە شامامەن 422 ملرد تەڭگە تاپشىلىق قالىپتاسقان"، – دەپ ءسوزىن قورىتىندىلادى دانيا ەسپايەۆا.
ايتا كەتسەك، بۇگىن - 2025 جىل 19 مامىردا ق ر ماجىلىسىندە قارجى جانە بيۋدجەت كوميتەتىنىڭ كەڭەيتىلگەن وتىرىسى ءوتتى. وتىرىس بارىسىندا جوعارى اۋديتورلىق پالاتانىڭ مۇشەسى نۇرلان نۇرجانوۆ ۇكىمەتتىڭ 2024 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەبىنە بەرىلگەن جوعارى اۋديتورلىق پالاتا قورىتىندىسىنىڭ نەگىزگى باعىتتارىن تانىستىردى.
