Qazaqstan halqynyń tilderi kúni tatýlyq pen turaqtylyqty, yntymaq pen birlikti tý etken júzden asa ulttar men ulystar meken etken egemen elimiz úshin mańyzdy mereke. Osyǵan deiin 22 qyrkúiekte atap ótilgen merekeniń 5 qyrkúiekke aýysqandyǵy tarihi mańyzǵa ie. Óitkeni, ataýly kún qazaq ádebietiniń negizin qalaýshy, qazaq halqynyń taǵdyry men tiliniń bolashaǵy úshin kúresken, Alash arysy, ult ustazy Ahmet Baitursynulynyń týǵan kúnimen tuspas-tus kelýde, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Til saiasatyn iske asyrý, memlekettik tildiń qoldaný aiasyn keńeitý, til mádenietin kóterý maqsatynda Jetisai aýdany mádeniet, tilderdi damytý, dene shynyqtyrý jáne sport bóliminiń «Tilderdi oqytý jáne damytý ortalyǵy» KMM uiymdastyrýymen «Jetisai» mádeniet úiinde «Memlekettik til – Qazaqstan halqyn biriktiretin til» taqyrybynda merekelik is-shara bolyp ótti.
Jiynǵa aýdan ákimdigi apparatynyń basshysy Esenkeldi Aldaniiazov pen aýdandyq mádeniet, tilderdi damytý, dene shynyqtyrý jáne sport bóliminiń basshysy Erkebulyn Seidaliev, «Tilderdi oqytý jáne damytý ortalyǵy» KMM direktory Qurmanbek Rysmahanov pen Túrkistan oblystyq tájik etno-mádeni birlestiginiń tóraǵasy Iýldash Sultanov, til janashyrlary men aýdan turǵyndary qatysty.
«Til – kez-kelgen ult pen halyqtyń, jalpy adamzattyń negizgi qatynas quraly. Tilsiz ómir súrý múmkin emes. «Ultty joiam deseń, áýeli tilinen basta» degen oidyń astarynda tereń maǵyna jatyr. Rasymen halqymyzdyń, dinimiz ben dilimizdiń negizgi túp qazyǵy, ol – bizdiń ana tilimiz. Tilimiz ben ultymyzdyń joiylmaýynyń jolynda qanshama jannyń qurban bolǵanyn eskersek, ana tilimiz ben ata dástúrimizge salǵyrt qaraýǵa eshbirimizdiń quqyǵymyz joq ekenin ańǵaramyz. Ana tilimizdiń damýy jolynda aianbai eńbek etip júrgen til janashyrlaryna alǵysymyz erekshe.
Aýdanymyzda turatyn ulttar men ulystardyń, túrli etnos ókilderiniń birligi men yntymaǵyna dáneker bolyp júrgen aqsaqaldarymyzǵa da óz rizashylyǵymdy bildiremin. «Tilge qurmet – elge qurmet». Barshańyzdy memlekettik tildi qurmettei otyryp ony jetik úirenýge shaqyramyn» dedi Esenkeldi Áshirhanuly.
Quttyqtaý sóz sońynda bir top til janashyrlaryna aýdan ákiminiń alǵys hattary men baǵaly syilyqtar tabystaldy. Merekelik jiyn barysynda aýdandyq mádeniet úii ónerpazdarynyń oryndaýynda patriottyq ánder shyrqalyp, myń buralǵan bishiler túrli etnos ókilderiniń biin biledi. Kópshilikke merekelik kóńil-kúi syilady.
Bir top til úirenýshiler men stýdentter Alash arystarynyń ana tili týraly óleńderin mánerlep oqyp, jurshylyqty rýhani baiytsa, aýdandyq ortalyqtandyrylǵan kitaphanalar júiesiniń qyzmetkerleri «Memlekettik til – Qazaqstan halqyn biriktiretin til» atty kitap kórmesin uiymdastyrdy.
