قازاقستان حالقىنىڭ تىلدەرى كۇنى تاتۋلىق پەن تۇراقتىلىقتى، ىنتىماق پەن بىرلىكتى تۋ ەتكەن جۇزدەن اسا ۇلتتار مەن ۇلىستار مەكەن ەتكەن ەگەمەن ەلىمىز ءۇشىن ماڭىزدى مەرەكە. وسىعان دەيىن 22 قىركۇيەكتە اتاپ وتىلگەن مەرەكەنىڭ 5 قىركۇيەككە اۋىسقاندىعى تاريحي ماڭىزعا يە. ويتكەنى، اتاۋلى كۇن قازاق ادەبيەتىنىڭ نەگىزىن قالاۋشى، قازاق حالقىنىڭ تاعدىرى مەن ءتىلىنىڭ بولاشاعى ءۇشىن كۇرەسكەن، الاش ارىسى، ۇلت ۇستازى احمەت بايتۇرسىن ۇلىنىڭ تۋعان كۇنىمەن تۇسپاس-تۇس كەلۋدە، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ءتىل ساياساتىن ىسكە اسىرۋ، مەملەكەتتىك ءتىلدىڭ قولدانۋ اياسىن كەڭەيتۋ، ءتىل مادەنيەتىن كوتەرۋ ماقساتىندا جەتىساي اۋدانى مادەنيەت، تىلدەردى دامىتۋ، دەنە شىنىقتىرۋ جانە سپورت ءبولىمىنىڭ «تىلدەردى وقىتۋ جانە دامىتۋ ورتالىعى» كمم ۇيىمداستىرۋىمەن «جەتىساي» مادەنيەت ۇيىندە «مەملەكەتتىك ءتىل – قازاقستان حالقىن بىرىكتىرەتىن ءتىل» تاقىرىبىندا مەرەكەلىك ءىس-شارا بولىپ ءوتتى.
جيىنعا اۋدان اكىمدىگى اپپاراتىنىڭ باسشىسى ەسەنكەلدى الدانيازوۆ پەن اۋداندىق مادەنيەت، تىلدەردى دامىتۋ، دەنە شىنىقتىرۋ جانە سپورت ءبولىمىنىڭ باسشىسى ەركەبۇلىن سەيدالييەۆ، «تىلدەردى وقىتۋ جانە دامىتۋ ورتالىعى» كمم ديرەكتورى قۇرمانبەك رىسماحانوۆ پەن تۇركىستان وبلىستىق تاجىك ەتنو-مادەني بىرلەستىگىنىڭ ءتوراعاسى يۋلداش سۇلتانوۆ، ءتىل جاناشىرلارى مەن اۋدان تۇرعىندارى قاتىستى.
«ءتىل – كەز-كەلگەن ۇلت پەن حالىقتىڭ، جالپى ادامزاتتىڭ نەگىزگى قاتىناس قۇرالى. ءتىلسىز ءومىر ءسۇرۋ مۇمكىن ەمەس. «ۇلتتى جويام دەسەڭ، اۋەلى تىلىنەن باستا» دەگەن ويدىڭ استارىندا تەرەڭ ماعىنا جاتىر. راسىمەن حالقىمىزدىڭ، ءدىنىمىز بەن ءدىلىمىزدىڭ نەگىزگى ءتۇپ قازىعى، ول – ءبىزدىڭ انا ءتىلىمىز. ءتىلىمىز بەن ۇلتىمىزدىڭ جويىلماۋىنىڭ جولىندا قانشاما جاننىڭ قۇربان بولعانىن ەسكەرسەك، انا ءتىلىمىز بەن اتا داستۇرىمىزگە سالعىرت قاراۋعا ەشبىرىمىزدىڭ قۇقىعىمىز جوق ەكەنىن اڭعارامىز. انا ءتىلىمىزدىڭ دامۋى جولىندا ايانباي ەڭبەك ەتىپ جۇرگەن ءتىل جاناشىرلارىنا العىسىمىز ەرەكشە.
اۋدانىمىزدا تۇراتىن ۇلتتار مەن ۇلىستاردىڭ، ءتۇرلى ەتنوس وكىلدەرىنىڭ بىرلىگى مەن ىنتىماعىنا دانەكەر بولىپ جۇرگەن اقساقالدارىمىزعا دا ءوز ريزاشىلىعىمدى بىلدىرەمىن. «تىلگە قۇرمەت – ەلگە قۇرمەت». بارشاڭىزدى مەملەكەتتىك ءتىلدى قۇرمەتتەي وتىرىپ ونى جەتىك ۇيرەنۋگە شاقىرامىن» دەدى ەسەنكەلدى ءاشىرحان ۇلى.
قۇتتىقتاۋ ءسوز سوڭىندا ءبىر توپ ءتىل جاناشىرلارىنا اۋدان اكىمىنىڭ العىس حاتتارى مەن باعالى سىيلىقتار تابىستالدى. مەرەكەلىك جيىن بارىسىندا اۋداندىق مادەنيەت ءۇيى ونەرپازدارىنىڭ ورىنداۋىندا پاتريوتتىق اندەر شىرقالىپ، مىڭ بۇرالعان بيشىلەر ءتۇرلى ەتنوس وكىلدەرىنىڭ ءبيىن بيلەدى. كوپشىلىككە مەرەكەلىك كوڭىل-كۇي سىيلادى.
ءبىر توپ ءتىل ۇيرەنۋشىلەر مەن ستۋدەنتتەر الاش ارىستارىنىڭ انا ءتىلى تۋرالى ولەڭدەرىن مانەرلەپ وقىپ، جۇرشىلىقتى رۋحاني بايىتسا، اۋداندىق ورتالىقتاندىرىلعان كىتاپحانالار جۇيەسىنىڭ قىزمەتكەرلەرى «مەملەكەتتىك ءتىل – قازاقستان حالقىن بىرىكتىرەتىن ءتىل» اتتى كىتاپ كورمەسىن ۇيىمداستىردى.
