«Jańa Qazaqstan» jaǵdaıynda, salyq ınspektorlary árbir mámilege bola sottasa berýin toqtatpaq. MKK-niń ortalyq apparaty jaǵdaıdyń ózgergeni týraly habarlap, barlyq aımaqtyq organdaryna hat jiberdi.
Hatta mámilelerdi jaramsyz dep taný týraly sotqa jiberiletin aryzdar boıynsha qoǵamdyq narazylyqqa baılanysty aksentti azamattyq sot isin júrgizýden salyqtyq tekserýlerge aýdarý kerektigi jazylady. Demek, endi salyq organdarynyń bıznespen sottasýy kúrt azaımaq. Onyń ornyna salyq ınspektorlary salyqty kóbirek óndirip alý boıynsha jumys isteýge kóshetini anyq.
Kezinde Nazarbaev klanynyń reıderleri Memlekettik kirister komıtetin májbúrlep, salyq ınspektorlarynyń kómegimen bıznespen sottasyp, oǵan problemalar týdyryp, artynan aktıvterdi bolmashy tıynǵa satyp alatyn. Osy arqyly kóptegen bıznes sol reıderleriniń qolyna ótti.
2020 jyldan beri «Atameken» kásipkerler palatasy, jeke bıznes, depýtattar osy máseleniń rettelýin surap kelgen edi. Biraz ýaqyt boıy Memlekettik kirister komıteti óz pozısıasyn «kóleńkeli ekonomıkamen kúresý» syltaýy arqyly qorǵap keldi. Komıtet málimeti boıynsha, 2019 jyly bıznes 2,8 trıllıon teńgeni bankterden qolma-qol aqsha retinde sheship alǵan.
Biraq, shot-faktýralar elektrondy formatqa aýystyrylǵaly beri, salyq komıteti úshin kameraldy baqylaý jeńildegenin eskerý kerek. Qazir Memlekettik kirister komıteti táýekelderdi aldyn-ala baqylaý júıesi arqyly jumys isteıdi. Baqylaý tetikteri jańarǵandyqtan, bıznespen jumys boıynsha algorıtmderdiń jańarýy da kóp kúttirmeıtin sharýa bolatyn. Memlekettik kirister komıteti bul jańalyqty biraz keshigip, 2024 jyly qabyldap otyr.
Salyq komıteti Memleket basshysy Qasym-Jomart Toqaevtyń tapsyrmasyn oryndaı ala ma? Úsh jyl buryn olarǵa servıstik modelge kóshý boıynsha tapsyrma berilgen bolatyn. Iaǵnı, halyqpen jáne bıznespen etene jumys isteý, olardyń shottaryn buǵattap, jazalaýdyń ornyna aldyn-ala túsindirý, dıalog qurý kózdelgen edi. Qazirgi jaǵdaı boıynsha, salyqtyq ákimshilendirýdiń barynsha jeńildegenin, oǵan sıfrlik tehnologıalardyń jetistikteri qoldanyla bastaǵanyn kórip otyrmyz. Komıtet deregi boıynsha, «Salyqbot» chat-botynda 109,5 myń paıdalanýshy tirkelip, 44 myńnan astam ótinish óńdelgen. Al 2023 jyldyń qazan aıynda beıne baılanys arqyly konsýltasıa berý boıynsha pılot iske qosyldy.
Salyq komıteti 2025 jyldan bastap murnynan shanshylatyn bolady. Sebebi, bir jyldan keıin halyqtyń barlyǵy deklarasıa tapsyra bastaýy tıis. Saýaty barlar tapsyratyn shyǵar, biraq aýyl men bazarda júrgen adam, onyń ishinde ınterneti ustamaıtyn halyq qaıtpek? Osy máseleni salyq komıtetiniń qalaı sheshetinin kelesi jyly kóretin bolamyz.
