Jyl sońyna deıin «Balapan» baǵdarlamasynyń aıasynda balabaqshamen qamtý deńgeıin 90,4 paıyzǵa jetkizý kózdelýde. Bul týraly Arys qalasynyń ákimi Murat Qadyrbek málim etti.
Budan bólek, Dermene aýyldyq okrýginde 150 jáne 200 oryndyq 2 orta mekteptiń qurylys jumystary bekitilgen kestege sáıkes júrgizilýde. Nysandar 2018 jyldyń tamyz aıynda paıdalanýǵa beriletin bolady.
Aıta keterligi, óńirde balamaly energıa kózderin óndiretin jobalar qolǵa alynyp keledi.
– Qojatoǵaı aýyldyq okrýginde «KAZ GREEN TEK SOLAR» JSHS mekemesi men fransýzdyq «URBASOLAR» kompanıasy birlesken kún sáýlesi arqyly balamaly energıany óndirýmen aınalysatyn zaýyt salynady. Jalpy qýattylyǵy 14 MVt. quraıtyn stansıanyń qurylysy aǵymdaǵy jyly bastalady. Bul joba 30 adamdy jumyspen qamtamasyz etpek, – dedi Murat Bolatuly.
Sonymen qatar, óńirde bıyl túıe sút ónimin óndiretin «Jelmaıa» aýylsharýashylyǵy óndiristik kooperatıvi qosymsha daıyn ıogýrt ónimderi men túıe júnin presteý sehyn iske qosýdy josparlaýda. Sondaı-aq, aımaqta túıe sútin kóbeıtý maqsatynda jalpy quny 3,5 mln. teńgeni quraıtyn óndiristik qýaty 300 tonnalyq qurama jem shyǵaratyn seh ashylmaq.
Eldi mekenderdiń ınfraqurylymyn damytý maqsatynda 1 mlrd. 716 mln. teńgege «Otyrar», «Ońtústik», «Naýryz» turǵyn aýdandarynda ınfraqurylym qurylysy júrgizilgen. Aldaǵy 2018-2025 jyldar aralyǵynda qalanyń 26 eldi mekenin tabıǵı gazben qamtamasyz etý josparlanýda.
