1 qazanda Qazaqstandaǵy Halyqaralyq valiýta qory missiiasynyń basshysy Nikolia Blanshe negizgi memlekettik organdarmen, sonyń ishinde Parlament, Ulttyq bank, Ulttyq ekonomika ministrligi, Qarjy ministrligi jáne basqa da múddeli taraptarmen birqatar kezdesý ótkizdi. Sonyń birinde HVQ missiiasynyń basshysy bank qyzmetin retteýge bailanysty problemalarǵa keńinen toqtaldy, dep jazady Dalanews.kz.
Ol problemalyq bankter máselesin retteýge baǵyttalǵan qymbat jobalar jaiynan qanyq ekenin, bul sharalar memlekettik sektor men biýdjettiń qyrýar qarjysyn qaqqanyn basa atap ótti.
"Aldyńǵy qatardaǵy ozyq tájiribeler bankterdi qutqarý úshin memlekettik aqshany múldem paidalanbaýdy ýaǵyzdaidy. Mundaǵy jaǵdai zańnamalarǵa ózgerister engizýdi jáne QNRDA men Ulttyq bankpen tyǵyz yntymaqtastyqty talap etetinin kórip otyrmyz. Qatty daǵdarysty jaǵdailarda Úkimet problemaly bankterdiń máselesin kóp nemese az kólemde bolsyn, sheshýge at salysýy kerek bolady. Qazir mundai jumystar júrgizilip jatyr. Bul baǵytta bizdiń qoldaýymyzben qol jetkizilgen tiisti progress bar", - deidi Nikolia Blanshe.
Jalpy, elimizdiń bank sektory úlken ózgeris aldynda tur. Prezidenttiń tapsyrmasy boiynsha "Bankter týraly" jańa zań jobasy ázirlenip jatyr. Soǵan qaraǵanda, múmkin Blanshe atap kórsetkendei, endi memleket bank sektoryn qutqarýǵa burynǵydai qyrýar qarjy bólýdi doǵarar!..
PS Jýyrda Qarjy naryǵyn retteý jáne damytý agenttigi Ulttyq banktiń qaýlysymen halyqaralyq agenttikterdiń kredittik reitingter bóliginde sheteldik satyp alýshylar men qazaqstandyq bankterdiń ielerine qoiylatyn talaptardy belgileitin anyqtamalardy daiyndady. Qujat Ashyq normativtik-quqyqtyq aktiler portalyna qoǵamdyq talqy úshin 14 qazanǵa deiin ornalastyryldy. Onda sheteldik investorlardyń qazaqstandyq bankterdi satyp alýy úshin jaǵdailardy jeńildetý sharalary qarastyrylǵan. Mamandar bul ózgeristerdi taǵdyry aldyńǵy aptada sheshilip qalýy tiis Bereke Bank-ti katarlyq Lesha banktiń satyp alýymen bailanystyrady.
