Keńeitilgen jiynda Toqaev eki ministrge sógis jariialady. Olar – vitse-premer – Saýda jáne integratsiia ministri Baqyt Sultanov pen Aýyl sharýashylyǵy ministri Erbol Qarashókeev.
Prezident elimizdegi qant tapshylyǵyn sóz etip, buryn paidalanýǵa berilgen jeti qant zaýytynyń búginde tek tórteýi jumys istep turǵanyn synady.
Aýyl sharýashylyǵy ministrligi qyzylsha qantynyń úlesin 6 esege – 2026 jylǵa qarai 7-den 43%-ǵa deiin arttyrýdy josparlap otyr. Degenmen, sońǵy 4 jylda qant qyzylshasynyń alqaby úshten birge qysqaryp ketken.
– Qazaqstan qant importyna 90% táýeldi. Bul jerde EAEO aiasyndaǵy sheshimge júginýge bolady, biraq qalai bolǵanda da bul Úkimet tarapynan jasalǵan óreskel qatelik. Sondyqtan olar memlekettiń ustanymyn qorǵaǵan joq. Sondyqtan ministrler – Baqyt Sultanov pen Erbol Qarashókeevke sógis jariialaimyn, – dedi Qasym-Jomart Toqaev.
Prezident infliatsiiany turaqtandyrý kerektigin aityp, Úkimet jumysyn synǵa aldy.
– Qazir infliatsiianyń sharyqtap ketýi eń kúrdeli másele bolyp otyr. Baǵanyń ósýine azyq-túlik infliatsiiasy áser etti. Onyń deńgeii 19,2 paiyzǵa jetti. Jalpy, azyq-túliktiń keibir túri birden 80 paiyzǵa qymbattady.
Úkimettiń baǵany turaqtandyrýǵa baǵyttalǵan sharalary tiimsiz bolyp shyqty. Úkimet infliatsiiany eski ádis-tásilmen toqtatqysy keledi. Onyń ózinde biýdjetten qosymsha qarajat bólip, baǵany jasandy túrde ǵana rettep otyr. Iaǵni, qymbatshylyqtyń sebebimen emes, saldarymen kúres júrip jatyr.
Al, shyn máninde, kerisinshe bolýy kerek. Úkimet bar jaýapkershilikti óńirlerge artyp qoidy. Olar ákimshilik resýrsty paidalanyp, dúkenderdi aralap júr, basqa tásilder jáne jańa ideialar joq. Mundai jumys eshqashan tiimdi bolǵan emes. Bir sózben aitqanda, naryq zańdylyǵyna sai keletin jańa ustanym joq, – dep túiindedi Toqaev.
