كەڭەيتىلگەن جيىندا توقايەۆ ەكى مينيسترگە سوگىس جاريالادى. ولار – ۆيسە-پرەمەر – ساۋدا جانە ينتەگراسيا ءمينيسترى باقىت سۇلتانوۆ پەن اۋىل شارۋاشىلىعى ءمينيسترى ەربول قاراشوكەيەۆ.
پرەزيدەنت ەلىمىزدەگى قانت تاپشىلىعىن ءسوز ەتىپ، بۇرىن پايدالانۋعا بەرىلگەن جەتى قانت زاۋىتىنىڭ بۇگىندە تەك تورتەۋى جۇمىس ىستەپ تۇرعانىن سىنادى.
اۋىل شارۋاشىلىعى مينيسترلىگى قىزىلشا قانتىنىڭ ۇلەسىن 6 ەسەگە – 2026 جىلعا قاراي 7-دەن 43%-عا دەيىن ارتتىرۋدى جوسپارلاپ وتىر. دەگەنمەن، سوڭعى 4 جىلدا قانت قىزىلشاسىنىڭ القابى ۇشتەن بىرگە قىسقارىپ كەتكەن.
– قازاقستان قانت يمپورتىنا 90% تاۋەلدى. بۇل جەردە ەاەو اياسىنداعى شەشىمگە جۇگىنۋگە بولادى، ءبىراق قالاي بولعاندا دا بۇل ۇكىمەت تاراپىنان جاسالعان ورەسكەل قاتەلىك. سوندىقتان ولار مەملەكەتتىڭ ۇستانىمىن قورعاعان جوق. سوندىقتان مينيسترلەر – باقىت سۇلتانوۆ پەن ەربول قاراشوكەيەۆكە سوگىس جاريالايمىن، – دەدى قاسىم-جومارت توقايەۆ.
پرەزيدەنت ينفلياسيانى تۇراقتاندىرۋ كەرەكتىگىن ايتىپ، ۇكىمەت جۇمىسىن سىنعا الدى.
– ءقازىر ينفلياسيانىڭ شارىقتاپ كەتۋى ەڭ كۇردەلى ماسەلە بولىپ وتىر. باعانىڭ وسۋىنە ازىق-تۇلىك ينفلياسياسى اسەر ەتتى. ونىڭ دەڭگەيى 19،2 پايىزعا جەتتى. جالپى، ازىق-تۇلىكتىڭ كەيبىر ءتۇرى بىردەن 80 پايىزعا قىمباتتادى.
ۇكىمەتتىڭ باعانى تۇراقتاندىرۋعا باعىتتالعان شارالارى ءتيىمسىز بولىپ شىقتى. ۇكىمەت ينفلياسيانى ەسكى ادىس-تاسىلمەن توقتاتقىسى كەلەدى. ونىڭ وزىندە بيۋدجەتتەن قوسىمشا قاراجات ءبولىپ، باعانى جاساندى تۇردە عانا رەتتەپ وتىر. ياعني، قىمباتشىلىقتىڭ سەبەبىمەن ەمەس، سالدارىمەن كۇرەس ءجۇرىپ جاتىر.
ال، شىن مانىندە، كەرىسىنشە بولۋى كەرەك. ۇكىمەت بار جاۋاپكەرشىلىكتى وڭىرلەرگە ارتىپ قويدى. ولار اكىمشىلىك رەسۋرستى پايدالانىپ، دۇكەندەردى ارالاپ ءجۇر، باسقا تاسىلدەر جانە جاڭا يدەيالار جوق. مۇنداي جۇمىس ەشقاشان ءتيىمدى بولعان ەمەس. ءبىر سوزبەن ايتقاندا، نارىق زاڭدىلىعىنا ساي كەلەتىن جاڭا ۇستانىم جوق، – دەپ تۇيىندەدى توقايەۆ.
