«Búgin elimizdiń tarıhynda bir eleýli ýaqytta kezdesip otyrmyz. Jańadan Túrkistan oblysy qurylyp, Túrkistan oblysy oblys ortalyǵy mártebesin aldy. Túrkistannyń damýy, bolashaǵy qalaı bolady degen suraq boıynsha áńgimelesemiz. Birinshiden, meniń tapsyrmam boıynsha arnaıy úkimettik komısıa qurylyp, jumys istedi» degen Elbasy sol komısıa basshysynyń esebin tyńdady. Elbasyǵa Túrkistan qalasyn damytý jónindegi josparyn baıandaǵan QR Premer-Mınıstriniń birinshi orynbasary Asqar Mamın Bas josparǵa laıyq úzdik joba anyqtalǵanyn málimdedi.
«Túrkistan qalasynyń bas josparyn ázirleýge qatysty xalyqaralyq konkýrs uıymdastyryldy. 22 usynystyń ishinen úzdik joba tańdaldy. Tańdalǵan joba sizdiń tapsyrmańyzda qoıylǵan talaptarǵa tolyǵymen sáıkes keledi. Sonyń ishinde Túrkistannyń tarıxı qundylyqtaryn saqtaý, odan ary kórkeıtý, Qoja Axmet Iassaýı kesenesi negizinde mádenı-rýxanı ortalyqty saqtaý jáne ákimshilik-iskerlik ortalyqty qurýǵa erekshe kóńil bólindi» dedi Asqar Mamın.
Májiliste Túrkistan oblysynyń ákimi Janseıit Túımebaev oblystyń damýy, áleýmettik-ekonomıkalyq kórsetkishteri jóninde baıandama jasady. Onyń aıtýynsha, 2018 jyldyń 8 aı qorytyndysy boıynsha óńirde negizgi áleýmettik-ekonomıkalyq kórsetkishterdiń ósimi saqtalǵan. Aýyl sharýashylyǵynyń jalpy ónim kólemi 250 mlrd. teńgege jetip, ótken jyldyń sáıkes kezeńimen salystyrǵanda 103,6%-dy quraǵan. Mal basy artyp, 3500 tonna et eksporttalǵan. Kókónis, kartop, baqsha daqyldarynan 2,7 mln. tonna ónim jınalyp, rekordtyq kórsetkishke qol jetkizildi. 500 myń tonnaǵa jýyq ónim Reseı, Belarýs, Latvıa, Germanıa memleketterine eksporttalsa, 1 mln. tonnasy elimizdiń soltústik óńirlerine jóneltildi. Ónerkásip óniminiń kólemi 286,1 mlrd. teńgeni qurap, ótken jylmen salystyrǵanda 21 mlrd.teńgege artty. Óńir ekonomıkasyna 142 mlrd. teńge ınvestısıa baǵyttaldy. Qazir oblysta qurylys jumystary qarqyndy júrgizilýde. 8 aıda qurylys kólemi 66,2 mlrd. teńgege jetip, ósim 105,8% boldy. Barlyq qarjylandyrý kózderinen turǵyn úı qurylysyna 21,2 mlrd. teńge ınvestısıa baǵyttaldy. 291,8 myń sharshy metr turǵyn úı, ıaǵnı, 1922 páter iske berildi. Ótken jyldyń tıisti kezeńimen salystyrǵanda ósim 137,6%-dy qurady. Osy derekterdi baıandaǵan ol oblys ortalyǵyn Túrkistan qalasyna kóshirý baǵytyndaǵy jumystar men qalany damytý jónindegi josparlarǵa da toqtaldy.
«Sizdiń «Túrkistan oblysyn qurý, ákimshilik ortalyǵyn Túrkistan qalasyna kóshirý týraly» Jarlyǵyńyz boıynsha tıisti jumystar atqarylyp jatyr. Memlekettik organdardy jaıǵastyrý úshin Túrkistan qalasynan qajetti 25 ǵımarat belgilendi Turǵyn úı máselesin shuǵyl sheshý úshin jergilikti búdjet esebinen Túrkistan jáne Kentaý qalalarynda 1 956 páterli 33 turǵyn úıdiń (122 myń sharshy metr) qurylysyn bastap kettik. Búginde Túrkistan qalasyn damytý, týrısik áleýetin kóterý baǵytynda keshendi is-sharalar qolǵa alynyp, otandyq jáne sheteldik kásipkerlermen kelissózder júrgizilip, nátıjesin berip jatyr. Keshe ǵana 28 qyrkúıekte Túrkistan qalasynda 1-shi «Kóne Túrkistan – jańa múmkindikter» atty halyqaralyq ınvestısıalyq jáne týrısik forýmy ótti. Atalǵan forýmǵa 17 shetel jáne otandyq 500-ge jýyq adam qatysty. Nátıjesinde 1,7 mlrd.AQSH dollaryn quraıtyn 17 qujatqa qol qoıyldy» dedi oblys ákimi.
Baıandamalardy tyńdaǵan Elbasy «Biz búgin Túrkistandy jańa oblysa ortalyǵy retinde aıaǵynan tik turǵyzý máselesimen jınalyp otyrmyz. Qazir memlekettik organdar Túrkistanǵa kóship, jumys istep jatyr. Endi Túrkistandy halyqaralyq deńgeıdegi qalaǵa aınaldyrý úshin Úkimet pen oblys ákimdigi myna máselelerge nazar aýdarýlary tıis. Birinshiden, óńirdiń qarjylyq turaqtylyǵyn arttyrý kerek. Oblystan Shymkent qalasy bólinip shyqqannan keıin bújeti ekige bólindi. Sondyqtan búdjetti tolyqtyrý úshin jańa kiris kózderin, búdjetti molaıtý joldaryn tabý qajet. Ekinshiden, jumyspen qamtamasyz etý, kásipkerlikti damytý máselesi nazarda bolǵany jón. Jurtshylyqqa jappaı kásipkerlikpen aınalysýdy úıretken jón. Túrkistandaǵy qurylys alańdary men jumys oryndarynda ózimizdiń jastar jumyspen qamtylýy tıis» degen Elbasy aýyl sharýashylyǵyn odan saıyn damytyp, ónimderdi óńdep shetelge eksporttaý mindetin júktedi. Sonymen qatar, kólik-logıstıka qyzmetin damytyp, týrızmge serpin berý kerektigine toqtaldy. Túrkistandy elektr qýatymen, gazben, sapaly kólik joldarymen, áleýmettik nysandarmen jáne aýyz sýmen qamtý máselelerin sheshý jóninde de tapsyrma berdi. Balamaly qýat kózderin damytýdy júktedi.
Aktıv májilisinde Qazaqstannyń Qurmetti jýrnalısi Baıdýlla Qonysbek Elbasynyń Túrkistanǵa degen erekshe yqylasy men qamqorlyǵyna el atynan alǵys aıtsa, M.Áýezov atyndaǵy Ońtústik Qazaqstan memlekettik ýnıversıtetiniń stýdenti Vıktorıa Cherkashına da jastarǵa memleket tarapynan kórsetilip jatqan qoldaýlarǵa rıza ekendigin jetkizdi.
Túrkistandy damytý jónindegi alqaly jıynda Memleket basshysy Túrkistan qalasyn túrki áleminiń mádenı-rýhanı ortalyǵy retinde damytý jónindegi bas jospardyń tujyrymdamasyn maquldaý jáne «TURKISTAN» arnaıy ekonomıkalyq aımaǵyn qurý jónindegi tarıhı Jarlyqtarǵa qol qoıdy.
Túrkistan oblysy ákiminiń baspasóz qyzmeti
