Memleket basshysy Qasym-Jomart Toqaev búgin kólik salasy qyzmetkerlerin kásibi merekesimen quttyqtap, olardy elimizdiń damýyna eleýli úles qosyp jatqan naǵyz eńbek adamdary dep atady, dep habarlaidy Dalanews.kz Aqordaǵa silteme jasap.
"Memleket úshin kólik salasynyń strategiialyq mańyzy airyqsha. Bul – aiqyn nárse. Kólik júiesi – árbir eldiń damýynyń kórinisi. Onsyz ekonomikanyń alǵa basýy múmkin emes. Sondyqtan bul salaǵa biz asa mańyzdy basymdyq retinde qaraimyz. Kólik quraldary – ekonomikanyń qozǵaýshy kúshi, ósip-órkendeý kepili desek, artyq bolmaidy. Elimizdiń osy saladaǵy múmkindikteri mol, tipti, biregei deýge bolady. Qazaqstan – Eýraziiadaǵy negizgi tranzittik habtyń biri. Biz qazir Transkaspii halyqaralyq kólik baǵdaryn belsendi túrde damytyp jatyrmyz. Bul – Qytai, Ortalyq Aziia jáne Eýropa arasynda taýar jetkizýdiń tóte joly. Byltyr Sian qalasynda kólik-logistika ortalyǵyn ashtyq. Ony "Bir beldeý, bir jol" atty jahandyq bastama aiasynda Qytai elimen birlesip júzege asyrdyq. Bul qadam halyqaralyq júk tasymalyn arttyrýǵa septigin tigizýde", – dedi Qasym-Jomart Toqaev.
Prezident Qazaqstan aýmaǵy arqyly ótetin dálizderdiń infraqurylymyn birtindep jaqsartý qolǵa alynǵanyn aitty.
"Logistika ortalyqtary jáne qoimalar salynýda. Temir jol qurylysy jandanyp jatyr. Osyndai mańyzdy sharalar syrtqy saýda ainalymyn ulǵaitýǵa múmkindik beredi, ekonomikany órkendetýge yqpal etedi. Biyl "Dostyq – Moiynty" temir jolynyń ekinshi jelisi salynyp bitedi. Sonyń arqasynda júk kólemi bes ese artady. Osy aýqymdy jobany, negizinen, óz jumysshylarymyz júzege asyryp jatqanyn da atap ótý qajet. Sondai-aq jyl sońynda Almaty beketin ainalyp ótetin temir jol iske qosylady. Nátijesinde júkteme azaiyp, júk jetkizý merzimi qysqarmaq. Kólik-tasymal salasy ozyq, zamanaýi jáne básekege qabiletti bolýy kerek. Sol sebepti, aldaǵy ýaqytta elimizdegi temir joldyń uzyndyǵyn edáýir arttyrý kózdelip otyr. On bir myń shaqyrym temirjoldy jóndeý jumysy jalǵasady. Jańadan 5 myń shaqyrym jol salý jáne ony jańǵyrtý josparlanýda. Qazir Trans-Qazaqstan temirjol dálizi aýqymdy jobasy qolǵa alyndy. Meniń tapsyrmammen uzyndyǵy 323 shaqyrym bolatyn "Moiynty – Qyzyljar" temirjoly salynyp jatyr. Budan bólek, "Darbaza – Maqtaaral" jáne "Aiagóz – Baqty" temirjol ótkeliniń qurylysy qarqyndy júrýde", – dedi Memleket basshysy.
Qasym-Jomart Toqaevtyń pikirinshe, taǵy bir mańyzdy baǵyt – mashina jasaý sektory. Álemniń eń ozyq kompaniialaryn tarta otyryp, jergilikti óndiristi damytý ózekti.
"Qazir Qazaqstanda sheteldik úzdik kompaniialar jumys isteidi. Men jyl basynda Astanadaǵy elektrovoz qurastyrý kásipornyna bardym. Onda júk jáne jolaýshylar tasymaldaityn elektrovoz ben qosalqy bólshekter shyǵarylyp jatyr. Eń bastysy, osyndai mańyzdy jumysty óz mamandarymyz atqarýda. Memleket mundai jobalarǵa jan-jaqty qoldaý kórsete bermek", – dedi Prezident.
Memleket basshysy áýe qatynastaryn damytý kólik saiasatyndaǵy basym mindetterdiń biri ekenin atap ótti.
"Búkil el boiynsha aviatsiia infraqurylymyn jańǵyrtý úshin keshendi jumys júrgizilip jatyr. Mysaly, ótken jyly Almaty, Shymkent jáne Qyzylorda qalalarynda jańa terminaldar iske qosyldy. Áýejailardyń ótkizý qabileti aitarlyqtai artty. Buryn Almaty áýejaiy jylyna 2,5 million jolaýshyǵa ǵana qyzmet kórsete alatyn. Búginde bul kórsetkish 14 millionǵa deiin ulǵaidy. Meniń tapsyrmammen Zaisanda, Katonqaraǵaida jáne Kendirlide úsh jańa áýejai salynyp jatyr. Arqalyq áýejaiy qalpyna keltirile bastady. Mundai jobalardyń júzege asýy jolaýshylar nópirin kóbeitip qana qoimaidy. Sonymen qatar logistika, týrizm, saýda jáne basqa da qosalqy salalardyń damýyna serpin beredi. Áýe reisteriniń geografiiasyn keńeitý maqsatynda turaqty túrde júieli sharalar qabyldap jatyrmyz. Qazirgi kezde Qazaqstannyń 30-dan astam elmen tikelei áýe qatynasy bar. Biraq bul az. Atalǵan baǵyttaǵy jumys jalǵasady", – dedi Memleket basshysy.
Qasym-Jomart Toqaevtyń aitýynsha, aldaǵy mańyzdy mindet – áýe arqyly júk tasymalyn damytyp, Qazaqstandy aimaqtaǵy jetekshi aviatsiialyq habqa ainaldyrý.
"Úkimet ulttyq júk tasymaldaýshy áýe kompaniiasyn qurý týraly josparyn málimdedi. Jalpy, elimizdegi azamattyq aviatsiia men áýe arqyly júk tasymalyn damytý máselesi tek kólik qyzmeti retinde qarastyrylmaidy. Onyń aýqymy odan áldeqaida keń. Bul – elimizdiń ekonomikalyq ósimine, halyqaralyq arenadaǵy ornyna jáne egemendigine tikelei áser etetin strategiialyq vektor", – dedi Prezident.
Memleket basshysy avtokólik joldarynyń sapasyn jaqsartýǵa qatysty aýqymdy jumys júrgizilip jatqanyna nazar aýdardy.
"Byltyr 7 myń shaqyrym avtokólik joly paidalanýǵa berildi. Taldyqorǵan – Óskemen, Qaraǵandy – Almaty, Aqtóbe – Atyraý – Astrahan baǵytyndaǵy kúre joldar jańǵyrtyldy. Jergilikti avtokólik joldary da jóndelip jatyr. Mundai aýqymdy jumys el tarihynda birinshi ret iske asatyn boldy. Budan bólek, basqa da iri jobalar júzege asyrylyp jatyr. Ótken jyly halyq kópten kútken Buqtyrma sý qoimasyndaǵy kópir ashyldy. Bul – Qazaqstandaǵy eń uzyn kópir. Osy ótkel eki oblysty jáne jeti aýdandy bailanystyrady, sondai-aq Qytai men Reseidi jalǵaidy. Shaqpaq baba asýynda elimizdegi eń alǵashqy týnnel iske qosyldy. Shyn máninde, "Jol – tirshilik kózi, jol bar jerde qainaǵan ómir bar" dep beker aitylmaǵan. Osy nysandardyń igiligin eń aldymen halyq kóredi. Sapaly jol azamattardyń ál-aýqatyn arttyrýǵa yqpal etedi. Jalpy, Qazaqstanda kólik-tranzit salasy qarqyndy damýda. Bul – ózderińiz siiaqty azamattardyń qajyrly eńbeginiń jemisi. Qazir osy salada 770 myńnan astam adam jumys isteidi. Sizder adal qyzmet etip, elimizdi kórkeitýge mol úles qosyp júrsizder. Men búgin barlyq kólik salasy qyzmetkerlerine shynaiy rizashylyǵymdy bildiremin. Biz bir el bolyp zań men tártipke baǵynatyn Ádiletti Qazaqstandy quryp jatyrmyz. Bul – memleketimizdiń bolashaǵy úshin óte mańyzdy jumys, ony mindetti túrde oryndaýymyz kerek. Kólik salasy mamandary óz mindetterin minsiz atqaryp, memlekettik mańyzy bar iske belsendi túrde atsalysyp keledi. Aldaǵy ýaqytta da el igiligine qyzmet etesizder dep senemin. "Eńbek etken elden yrys ketpeidi" deidi halqymyz. Eńbekqorlyq pen kásibilik – órkenietti qoǵamǵa tán qasietter. Eńbek adamy eń joǵary marapatqa laiyqty", – dedi Qasym-Jomart Toqaev.
Saltanatty jiynda "Qazaqstannyń Eńbek Eri" ataǵy "Qazaqstan temir joly" kompaniiasynyń ardageri Qaltai Sámbetovke berildi
Ol 66 jyl úzdiksiz jumys istep, temirjol salasyn jáne kólik infraqurylymyn damytýǵa zor úles qosqan. Eń joǵary memlekettik nagrada kólik salasynyń ókiline alǵash ret tabystalyp otyr.
