– «AMANAT» áleýmettik ádildik qaǵidatyn ornyqtyrýǵa árdaiym basa mán beredi. Memlekettilikti nyǵaitý jáne el birligin bekemdeý – uiymnyń airyqsha missiiasynyń biri. Ótken sezde partiiaǵa rebrending jasaý qolǵa alyndy. Sondai-aq, ony institýtsionaldyq turǵydan jańartý jumysy bastaldy. Partiia bul mindetterdi oryndaýǵa dereý kirisip ketti. Naqty nátije bar, ózgeristerdi qazirdiń ózinde kórip otyrmyz. Osy qarqyndy báseńdetpei, jumysty odan ári jalǵastyrý kerek, – dedi Memleket basshysy.
Prezident naýryz aiynyń ortasynda Qazaqstan halqyna arnaǵan Joldaýynda saiasi reformalardyń aýqymdy baǵdarlamasyn usynǵanyn eske saldy. Sonymen qatar birden Konstitýtsiiaǵa engiziletin ózgerister men tolyqtyrýlardyń jobasyn daiyndaý jóninde aýqymdy jumys bastalǵanyn, onsyz josparlanǵan saiasi reformalardy tiimdi júzege asyrý múmkin emes ekenin atap ótti.
– Konstitýtsiialyq reformanyń maqsaty – elimizdi saiasi turǵydan odan ári jan-jaqty jańǵyrtýdyń berik irgetasyn qalaý. Ótken aptada Konstitýtsiialyq keńeske túzetýler jobasy joldandy. Onyń qabyldanýy memlekettik institýttardy qurýdyń jáne qyzmetiniń múlde jańa úlgisin – Jańa Qazaqstandy qurýǵa múmkindik beredi. Azamattar tarapynan: «Jańa Qazaqstan degenimiz ne?», - degen saýal jii qoiylyp júr. Meniń oiymsha, bul suraqqa qysqa da nusqa jaýap berýge bolady. Jańa Qazaqstan degenimiz – shyn máninde Ádiletti Qazaqstan. Azamattarǵa áleýmettik ádildik jetispeitinin moiyndaiyqshy. Qarapaiym halyqtyń múddesi únemi elene bermeidi, keide, tipti ádiletsizdik memlekettik apparat ókilderi tarapynan da jasalyp jatady. Azamattardyń memlekettik mekemelerge senimsizdigi osydan týyndaidy. Sondyqtan «AMANAT» partiiasynyń aldynda osy olqylyqtardyń ornyn toltyrý mindeti tur. Azamattyq qoǵam men bilik arasyndaǵy dáneker bolý úshin sizder halyq ókilderimen etene jumys isteýlerińiz kerek, – dedi Qasym-Jomart Toqaev.
Sonymen qatar Konstitýtsiiaǵa engizilgen ózgerister men tolyqtyrýlar eldiń búkil saiasi arhitektýrasyn keshendi túrde qaita qaraýǵa, bilik tarmaqtary arasyndaǵy tejeý men tepe-teńdiktiń neǵurlym teńgerimdi júiesin qurýǵa baǵyttalǵanyn aitty. Prezidenttiń pikirinshe, biz sýperprezidenttik basqarý túrinen túbegeili bas tartamyz, Parlament pen máslihattardyń ókilettigin kúsheitemiz. Partiialyq-saiasi júieni jańǵyrtý – basym baǵyttyń biri.
Memleket basshysy partiialar men sailaý týraly zańnamalardy liberalizatsiialaý qoǵamnyń rólin kúsheitedi. Bul – biliktiń barlyq deńgeiinde qabyldanatyn sheshimderine qatysty. Prezidenttiń paiymynsha, azamattardyń daýysy úshin báseke kúsheiip, saiasi úderisterdiń qarqyny men mazmuny ózgeredi.
– Jalpy alǵanda, partiialyq alańda seń qozǵalǵanyn kórip otyrmyz. «Adal» partiiasynyń «AMANAT» partiiasymen birigý jónindegi bastamasy – bastalǵan ózgeristerdiń jarqyn kórinisi. «Adal» partiiasynyń jetekshileri men múshelerine osy mańyzdy sheshimderi úshin rizashylyǵymdy bildiremin. Jańa Qazaqstandy quramyz desek, elge janashyr qoǵamdyq-saiasi kúshterdiń bári jumylýy kerek. Bul rette, partiialardyń ózara til tabysyp, saiasi júieni damytýy asa mańyzdy. Sondyqtan, «Adal» partiiasynyń bastamasyn qoldap, onymen birikken jón dep sanaimyn. «Adal» – óz jaqtastary bar, qalyptasqan partiia. Saiasi báseke artyp kele jatqan qazirgi kezeńde munyń airyqsha máni zor, – dedi Qasym-Jomart Toqaev.
Jiynda Memleket basshysy jaýapty ári asa mańyzdy kezeńge qadam basqanymyzǵa toqtaldy. Prezidenttiń aitýynsha, konstitýtsiialyq reforma – Táýelsizdik tarihyndaǵy jańa beles. Munyń bári ýaqyt talabynan jáne qoǵam suranysynan týyndap otyr.
– Men buǵan deiin partiia tóraǵasy laýazymynan bosap, uiym qatarynan shyǵatynymdy aittym. Osy uiǵarymdy júzege asyratyn kez keldi. Búginnen bastap «AMANAT» partiiasynyń tóraǵasy retinde ókilettigimdi toqtatyp, partiiadan shyǵý týraly sheshim qabyldadym. Bul qadamnyń simvoldyq máni bar. Osy oraida, Prezident sailaýynda maǵan senim artyp, qoldaǵandaryńyz úshin barshańyzǵa alǵysymdy aitamyn. Sondai-aq, jaýapty sátte partiia tizginin senip tapsyrǵandaryńyz úshin rizashylyǵymdy bildiremin. Biz birlesip, kóp jumys atqardyq. Degenmen, ýaqyt bir orynda turmaidy. Qazir talai nárse ózgerýde. Aldymyzda aýqymdy mindetter bar. Búginde elimizdegi barlyq salany túbegeili monopoliiadan aryltý asa mańyzdy. Osy úderisten saiasi júie de syrt qalmaýy kerek. Memleket basshysy eshbir partiiaǵa basymdyq bermegeni jón, iaǵni saiasi turǵydan beitarap bolýy qajet. Bul – meniń aiqyn ustanymym, – dedi Qasym-Jomart Toqaev.
Prezidenttiń pikirinshe, mundai qaǵida sailaýǵa qatysatyn barlyq kúshterge teń múmkindik týǵyzady. Saiasi júiede ádildiktiń ornaýyna jol ashady. Partiia atqarýshy bilikke táýeldi bolmasa, oǵan halyqtyń senimi nyǵaiyp, bedeli artady.
– Qazir uiym Májiliste jáne máslihattarda edáýir basymdyqqa ie bolyp otyr. Sondyqtan Úkimet pen ákimdikterdiń jumysyna qatań baqylaý jasai alady. Prezident partiia qatarynan shyqqanymen, uiymnyń strategiialyq baǵdary ózgermeidi dep oilaimyn. «AMANAT» elimizdiń saiasi ómirinde erekshe orny bar uiym retinde qala beretini anyq. Saiasattaǵy sabaqtastyq saqtalyp, partiia el igiligi úshin jasap jatqan jumystaryn jalǵastyra beredi, – dedi Memleket basshysy.
Qasym-Jomart Toqaev partiianyń tóraǵasy laýazymyna Parlament Májilisiniń tóraǵasy Erlan Qoshanovty usynyp, oǵan uiymdastyrý qabileti joǵary, tájiribeli ári bilikti azamat dep baǵa berdi.
Sezd delegattary Prezidenttiń usynysyn qoldap, Erlan Qoshanovtyń kandidatýrasyna biraýyzdan daýys berdi.
Memleket basshysy búgingi ózgerister «AMANAT» partiiasynyń zaman talabyna sai jańara túsýine jol ashatynyna senim bildirdi.
