– «اMANAT» الەۋمەتتىك ادىلدىك قاعيداتىن ورنىقتىرۋعا ءاردايىم باسا ءمان بەرەدى. مەملەكەتتىلىكتى نىعايتۋ جانە ەل بىرلىگىن بەكەمدەۋ – ۇيىمنىڭ ايرىقشا ميسسياسىنىڭ ءبىرى. وتكەن سەزدە پارتياعا رەبرەندينگ جاساۋ قولعا الىندى. سونداي-اق، ونى ينستيتۋسيونالدىق تۇرعىدان جاڭارتۋ جۇمىسى باستالدى. پارتيا بۇل مىندەتتەردى ورىنداۋعا دەرەۋ كىرىسىپ كەتتى. ناقتى ناتيجە بار، وزگەرىستەردى ءقازىردىڭ وزىندە كورىپ وتىرمىز. وسى قارقىندى باسەڭدەتپەي، جۇمىستى ودان ءارى جالعاستىرۋ كەرەك، – دەدى مەملەكەت باسشىسى.
پرەزيدەنت ناۋرىز ايىنىڭ ورتاسىندا قازاقستان حالقىنا ارناعان جولداۋىندا ساياسي رەفورمالاردىڭ اۋقىمدى باعدارلاماسىن ۇسىنعانىن ەسكە سالدى. سونىمەن قاتار بىردەن كونستيتۋسياعا ەنگىزىلەتىن وزگەرىستەر مەن تولىقتىرۋلاردىڭ جوباسىن دايىنداۋ جونىندە اۋقىمدى جۇمىس باستالعانىن، ونسىز جوسپارلانعان ساياسي رەفورمالاردى ءتيىمدى جۇزەگە اسىرۋ مۇمكىن ەمەس ەكەنىن اتاپ ءوتتى.
– كونستيتۋسيالىق رەفورمانىڭ ماقساتى – ەلىمىزدى ساياسي تۇرعىدان ودان ءارى جان-جاقتى جاڭعىرتۋدىڭ بەرىك ىرگەتاسىن قالاۋ. وتكەن اپتادا كونستيتۋسيالىق كەڭەسكە تۇزەتۋلەر جوباسى جولداندى. ونىڭ قابىلدانۋى مەملەكەتتىك ينستيتۋتتاردى قۇرۋدىڭ جانە قىزمەتىنىڭ مۇلدە جاڭا ۇلگىسىن – جاڭا قازاقستاندى قۇرۋعا مۇمكىندىك بەرەدى. ازاماتتار تاراپىنان: «جاڭا قازاقستان دەگەنىمىز نە؟»، - دەگەن ساۋال ءجيى قويىلىپ ءجۇر. مەنىڭ ويىمشا، بۇل سۇراققا قىسقا دا نۇسقا جاۋاپ بەرۋگە بولادى. جاڭا قازاقستان دەگەنىمىز – شىن مانىندە ادىلەتتى قازاقستان. ازاماتتارعا الەۋمەتتىك ادىلدىك جەتىسپەيتىنىن مويىندايىقشى. قاراپايىم حالىقتىڭ مۇددەسى ۇنەمى ەلەنە بەرمەيدى، كەيدە، ءتىپتى ادىلەتسىزدىك مەملەكەتتىك اپپارات وكىلدەرى تاراپىنان دا جاسالىپ جاتادى. ازاماتتاردىڭ مەملەكەتتىك مەكەمەلەرگە سەنىمسىزدىگى وسىدان تۋىندايدى. سوندىقتان «AMANAT» پارتياسىنىڭ الدىندا وسى ولقىلىقتاردىڭ ورنىن تولتىرۋ مىندەتى تۇر. ازاماتتىق قوعام مەن بيلىك اراسىنداعى دانەكەر بولۋ ءۇشىن سىزدەر حالىق وكىلدەرىمەن ەتەنە جۇمىس ىستەۋلەرىڭىز كەرەك، – دەدى قاسىم-جومارت توقايەۆ.
سونىمەن قاتار كونستيتۋسياعا ەنگىزىلگەن وزگەرىستەر مەن تولىقتىرۋلار ەلدىڭ بۇكىل ساياسي ارحيتەكتۋراسىن كەشەندى تۇردە قايتا قاراۋعا، بيلىك تارماقتارى اراسىنداعى تەجەۋ مەن تەپە-تەڭدىكتىڭ نەعۇرلىم تەڭگەرىمدى جۇيەسىن قۇرۋعا باعىتتالعانىن ايتتى. پرەزيدەنتتىڭ پىكىرىنشە، ءبىز سۋپەرپرەزيدەنتتىك باسقارۋ تۇرىنەن تۇبەگەيلى باس تارتامىز، پارلامەنت پەن ءماسليحاتتاردىڭ وكىلەتتىگىن كۇشەيتەمىز. پارتيالىق-ساياسي جۇيەنى جاڭعىرتۋ – باسىم باعىتتىڭ ءبىرى.
مەملەكەت باسشىسى پارتيالار مەن سايلاۋ تۋرالى زاڭنامالاردى ليبەراليزاسيالاۋ قوعامنىڭ ءرولىن كۇشەيتەدى. بۇل – بيلىكتىڭ بارلىق دەڭگەيىندە قابىلداناتىن شەشىمدەرىنە قاتىستى. پرەزيدەنتتىڭ پايىمىنشا، ازاماتتاردىڭ داۋىسى ءۇشىن باسەكە كۇشەيىپ، ساياسي ۇدەرىستەردىڭ قارقىنى مەن مازمۇنى وزگەرەدى.
– جالپى العاندا، پارتيالىق الاڭدا سەڭ قوزعالعانىن كورىپ وتىرمىز. «Adal» پارتياسىنىڭ «اMANAT» پارتياسىمەن بىرىگۋ جونىندەگى باستاماسى – باستالعان وزگەرىستەردىڭ جارقىن كورىنىسى. «Adal» پارتياسىنىڭ جەتەكشىلەرى مەن مۇشەلەرىنە وسى ماڭىزدى شەشىمدەرى ءۇشىن ريزاشىلىعىمدى بىلدىرەمىن. جاڭا قازاقستاندى قۇرامىز دەسەك، ەلگە جاناشىر قوعامدىق-ساياسي كۇشتەردىڭ ءبارى جۇمىلۋى كەرەك. بۇل رەتتە، پارتيالاردىڭ ءوزارا ءتىل تابىسىپ، ساياسي جۇيەنى دامىتۋى اسا ماڭىزدى. سوندىقتان، «Adal» پارتياسىنىڭ باستاماسىن قولداپ، ونىمەن بىرىككەن ءجون دەپ سانايمىن. «Adal» – ءوز جاقتاستارى بار، قالىپتاسقان پارتيا. ساياسي باسەكە ارتىپ كەلە جاتقان قازىرگى كەزەڭدە مۇنىڭ ايرىقشا ءمانى زور، – دەدى قاسىم-جومارت توقايەۆ.
جيىندا مەملەكەت باسشىسى جاۋاپتى ءارى اسا ماڭىزدى كەزەڭگە قادام باسقانىمىزعا توقتالدى. پرەزيدەنتتىڭ ايتۋىنشا، كونستيتۋسيالىق رەفورما – تاۋەلسىزدىك تاريحىنداعى جاڭا بەلەس. مۇنىڭ ءبارى ۋاقىت تالابىنان جانە قوعام سۇرانىسىنان تۋىنداپ وتىر.
– مەن بۇعان دەيىن پارتيا ءتوراعاسى لاۋازىمىنان بوساپ، ۇيىم قاتارىنان شىعاتىنىمدى ايتتىم. وسى ۇيعارىمدى جۇزەگە اسىراتىن كەز كەلدى. بۇگىننەن باستاپ «AMANAT» پارتياسىنىڭ ءتوراعاسى رەتىندە وكىلەتتىگىمدى توقتاتىپ، پارتيادان شىعۋ تۋرالى شەشىم قابىلدادىم. بۇل قادامنىڭ سيمۆولدىق ءمانى بار. وسى ورايدا، پرەزيدەنت سايلاۋىندا ماعان سەنىم ارتىپ، قولداعاندارىڭىز ءۇشىن بارشاڭىزعا العىسىمدى ايتامىن. سونداي-اق، جاۋاپتى ساتتە پارتيا تىزگىنىن سەنىپ تاپسىرعاندارىڭىز ءۇشىن ريزاشىلىعىمدى بىلدىرەمىن. ءبىز بىرلەسىپ، كوپ جۇمىس اتقاردىق. دەگەنمەن، ۋاقىت ءبىر ورىندا تۇرمايدى. ءقازىر تالاي نارسە وزگەرۋدە. الدىمىزدا اۋقىمدى مىندەتتەر بار. بۇگىندە ەلىمىزدەگى بارلىق سالانى تۇبەگەيلى مونوپوليادان ارىلتۋ اسا ماڭىزدى. وسى ۇدەرىستەن ساياسي جۇيە دە سىرت قالماۋى كەرەك. مەملەكەت باسشىسى ەشبىر پارتياعا باسىمدىق بەرمەگەنى ءجون، ياعني ساياسي تۇرعىدان بەيتاراپ بولۋى قاجەت. بۇل – مەنىڭ ايقىن ۇستانىمىم، – دەدى قاسىم-جومارت توقايەۆ.
پرەزيدەنتتىڭ پىكىرىنشە، مۇنداي قاعيدا سايلاۋعا قاتىساتىن بارلىق كۇشتەرگە تەڭ مۇمكىندىك تۋعىزادى. ساياسي جۇيەدە ادىلدىكتىڭ ورناۋىنا جول اشادى. پارتيا اتقارۋشى بيلىككە تاۋەلدى بولماسا، وعان حالىقتىڭ سەنىمى نىعايىپ، بەدەلى ارتادى.
– ءقازىر ۇيىم ماجىلىستە جانە ءماسليحاتتاردا ەداۋىر باسىمدىققا يە بولىپ وتىر. سوندىقتان ۇكىمەت پەن اكىمدىكتەردىڭ جۇمىسىنا قاتاڭ باقىلاۋ جاساي الادى. پرەزيدەنت پارتيا قاتارىنان شىققانىمەن، ۇيىمنىڭ ستراتەگيالىق باعدارى وزگەرمەيدى دەپ ويلايمىن. «اMANAT» ەلىمىزدىڭ ساياسي ومىرىندە ەرەكشە ورنى بار ۇيىم رەتىندە قالا بەرەتىنى انىق. ساياساتتاعى ساباقتاستىق ساقتالىپ، پارتيا ەل يگىلىگى ءۇشىن جاساپ جاتقان جۇمىستارىن جالعاستىرا بەرەدى، – دەدى مەملەكەت باسشىسى.
قاسىم-جومارت توقايەۆ پارتيانىڭ ءتوراعاسى لاۋازىمىنا پارلامەنت ءماجىلىسىنىڭ ءتوراعاسى ەرلان قوشانوۆتى ۇسىنىپ، وعان ۇيىمداستىرۋ قابىلەتى جوعارى، تاجىريبەلى ءارى بىلىكتى ازامات دەپ باعا بەردى.
سەزد دەلەگاتتارى پرەزيدەنتتىڭ ۇسىنىسىن قولداپ، ەرلان قوشانوۆتىڭ كانديداتۋراسىنا ءبىراۋىزدان داۋىس بەردى.
مەملەكەت باسشىسى بۇگىنگى وزگەرىستەر «اMANAT» پارتياسىنىڭ زامان تالابىنا ساي جاڭارا تۇسۋىنە جول اشاتىنىنا سەنىم ءبىلدىردى.
