Qazaqstan mektepterinde jańa bilim standarty synalyp jatyr, al onyń nátijeleri oqytý baǵdarlamalaryna ózgeris engizýi múmkin. Bul týraly Oqý-aǵartý ministri Juldyz Súleimenova depýtattardyń oqý júktemesiniń kóptigine qatysty synyna jaýap bere otyryp málimdedi, dep habarlaidy Dalanews.kz.
Jańa standarttyń aprobatsiiasy júrip jatyr
Ministrdiń aitýynsha, elde jańa bilim berý standarty boiynsha tájiribelik synaq jeltoqsan aiynyń sońyna deiin jalǵasady. Aprobatsiia aiaqtalǵannan keiin nátijeler taldanyp, jańartylǵan oqý baǵdarlamalary ázirlenedi.
"Qazir qoǵam men sarapshylardyń bastaýyshtaǵy matematika mazmunyna, sondai-aq lingvistikalyq jáne jaratylystaný baǵytyndaǵy pánderge qatysty oryndy suraqtary bar. Bul usynystar mamandarmen birlese talqylanyp jatyr", – dedi Súleimenova.
Qandai pánder birigýi múmkin?
Talqylanyp jatqan ózgeristerdiń biri – qoldanystaǵy standartqa sáikes matematika men geometriia pánderin biriktirýge bailanysty. Bul shara oqý baǵdarlamasyn yqshamdap, pándik júktemeni azaitýǵa baǵyttalǵan.
Fizikany, himiiany jáne biologiiany biriktirýge ministr qarsy
Sonymen qatar, Juldyz Súleimenova bilim berý salasyndaǵy eń kóp pikirtalas týdyrǵan usynystardyń biri – fizika, himiia jáne biologiiany «jaratylystaný» ataýymen bir pánge biriktirý ideiasyna qatysty óz ustanymyn ashyq aitty.
"Men bul bastamany qoldamaimyn. Fizika, himiia jáne biologiia – jeke-jeke oqytylýy tiis negizgi, irgeli pánder. Olar bir ǵana blokqa biriktirilmeýi kerek", – dedi ministr.
Ministrlik óz usynystaryn ázirlep jatyr
Súleimenovanyń aitýynsha, qazirgi maqsat - oqýshylardyń júktemesin azaita otyryp, oqý sapasyn tómendetpeý. Ministrlik pánderdi saqtap qalý jóninde óz usynystaryn daiyndaýda jáne sheshimder sarapshylardyń pikiri men oqýshylardyń múddesin eskere otyryp qabyldanady dep ýáde berdi.
