Jańa oqý jyly qarsańynda memleket áleýmettik kómekke muqtaj otbasy balalarynyń mektepke tolyqqandy daiyndalýy úshin qarjylai qoldaý kórsetedi. Bul kómekti «Barshaǵa mindetti bilim berý» qory men «Mektepke jol» respýblikalyq aktsiiasy aiasynda alýǵa bolady, dep habarlaidy Dalanews.kz.
Kómek kimderge beriledi?
Atalǵan qarjylai qoldaýdy myna sanattaǵy otbasylar ala alady:
Ataýly áleýmettik kómek (AÁK) alatyn otbasylar;
Jan basyna shaqqandaǵy tabysy kúnkóris deńgeiinen tómen otbasylar;
Tótenshe jaǵdaiǵa tap bolǵan otbasylar;
Jetim balalar men ata-anasynyń qamqorlyǵynsyz qalǵan balalar.
Qarjylai kómektiń kólemi ár óńirdegi kúnkóris deńgeiine bailanysty belgilenedi. Máselen, 2025 jyldyń maýsym aiyndaǵy málimet boiynsha respýblika boiynsha ortasha kúnkóris minimýmy – 58 655 teńge. Almatyda – 58 202 teńge, Astanada – 58 874 teńge, Shymkentte – 54 569 teńge, eń joǵarysy – Mańǵystaý oblysynda (63 744 teńge).
Ótken jyly berilgen qarjynyń ortasha kólemi 43 400 teńgeni quraǵan. Ár oblys pen qala óz biýdjetine sáikes kómektiń naqty somasyn bekitedi.
Kómekti qalai alýǵa bolady?
Memlekettik kómekti rásimdeý úshin tómendegi qujattar qajet:
Ata-ananyń jeke kýáliginiń kóshirmesi;
Balanyń týý týraly kýáligi;
Ataýly áleýmettik kómek alatyny týraly anyqtama nemese tabysyn dáleldeitin basqa da qujattar.
Qujattar mektep ákimshiligine nemese jergilikti bilim bólimine tapsyrylady. Sondai-aq, bul kómekti egov.kz portaly nemese jumyspen qamtý ortalyqtary arqyly da rásimdeýge bolady. AÁK alýshylarǵa qujat jinaýdyń qajeti joq, olar úshin rásimdeý jeńildetilgen.
Qarjy arnaiy bank kartasyna aýdarylady jáne tek balanyń mektepke qajetti kiim-keshegi men keńse taýarlaryn satyp alýǵa jumsalýy tiis. Basqa maqsatqa paidalanýǵa qatań tyiym salynady.
Kómek alǵannan keiin 10 jumys kúni ishinde satyp alǵan zattardyń chekterin jáne balanyń satyp alynǵan kiim-keshek, quraldarmen túsken fotoesebin mektepke ótkizý mindetti. Eger qarajat basqa maqsatqa jumsalǵany anyqtalsa, ata-ana jaýapkershilikke tartylýy múmkin.
Qosymsha kómekti qaidan alýǵa bolady?
Memlekettik qoldaýdan bólek, demeýshiler men metsenattar esebinen qosymsha kómek alýǵa bolady. Ol úshin www.atamekenim.kz portalyndaǵy «Mektepke jol» arnaiy bóliminde ótinish qaldyrý qajet. Bul platforma arqyly jyl boiy ótinish qabyldanyp, demeýshiler tarapynan naqty kómek kórsetiledi. Ótinishter Ulttyq bilim berý derekqory arqyly tekserýden ótedi.
«Áleýmettik ámiian» platformasynda ázirge tek materialdyq kómek (kiim-keshek, qural-jabdyq) qarastyrylǵan. Aqshalai kómek bul platforma arqyly berilmeidi.
Mektepke daiyndyq úshin berilgen qarajat maqsatty kómek bolyp tabylady jáne tek belgilengen erejelerge sai paidalanylýy tiis ekenin esten shyǵarmaǵan jón.
