جاڭا وقۋ جىلى قارساڭىندا مەملەكەت الەۋمەتتىك كومەككە مۇقتاج وتباسى بالالارىنىڭ مەكتەپكە تولىققاندى دايىندالۋى ءۇشىن قارجىلاي قولداۋ كورسەتەدى. بۇل كومەكتى «بارشاعا مىندەتتى ءبىلىم بەرۋ» قورى مەن «مەكتەپكە جول» رەسپۋبليكالىق اكسياسى اياسىندا الۋعا بولادى، دەپ حابارلايدى Dalanews.kz.
كومەك كىمدەرگە بەرىلەدى؟
اتالعان قارجىلاي قولداۋدى مىنا ساناتتاعى وتباسىلار الا الادى:
اتاۋلى الەۋمەتتىك كومەك (ااك) الاتىن وتباسىلار؛
جان باسىنا شاققانداعى تابىسى كۇنكورىس دەڭگەيىنەن تومەن وتباسىلار؛
توتەنشە جاعدايعا تاپ بولعان وتباسىلار؛
جەتىم بالالار مەن اتا-اناسىنىڭ قامقورلىعىنسىز قالعان بالالار.
قارجىلاي كومەكتىڭ كولەمى ءار وڭىردەگى كۇنكورىس دەڭگەيىنە بايلانىستى بەلگىلەنەدى. ماسەلەن، 2025 جىلدىڭ ماۋسىم ايىنداعى مالىمەت بويىنشا رەسپۋبليكا بويىنشا ورتاشا كۇنكورىس مينيمۋمى – 58 655 تەڭگە. الماتىدا – 58 202 تەڭگە، استانادا – 58 874 تەڭگە، شىمكەنتتە – 54 569 تەڭگە، ەڭ جوعارىسى – ماڭعىستاۋ وبلىسىندا (63 744 تەڭگە).
وتكەن جىلى بەرىلگەن قارجىنىڭ ورتاشا كولەمى 43 400 تەڭگەنى قۇراعان. ءار وبلىس پەن قالا ءوز بيۋدجەتىنە سايكەس كومەكتىڭ ناقتى سوماسىن بەكىتەدى.
كومەكتى قالاي الۋعا بولادى؟
مەملەكەتتىك كومەكتى راسىمدەۋ ءۇشىن تومەندەگى قۇجاتتار قاجەت:
اتا-انانىڭ جەكە كۋالىگىنىڭ كوشىرمەسى؛
بالانىڭ تۋۋ تۋرالى كۋالىگى؛
اتاۋلى الەۋمەتتىك كومەك الاتىنى تۋرالى انىقتاما نەمەسە تابىسىن دالەلدەيتىن باسقا دا قۇجاتتار.
قۇجاتتار مەكتەپ اكىمشىلىگىنە نەمەسە جەرگىلىكتى ءبىلىم بولىمىنە تاپسىرىلادى. سونداي-اق، بۇل كومەكتى egov.kz پورتالى نەمەسە جۇمىسپەن قامتۋ ورتالىقتارى ارقىلى دا راسىمدەۋگە بولادى. ااك الۋشىلارعا قۇجات جيناۋدىڭ قاجەتى جوق، ولار ءۇشىن راسىمدەۋ جەڭىلدەتىلگەن.
قارجى ارنايى بانك كارتاسىنا اۋدارىلادى جانە تەك بالانىڭ مەكتەپكە قاجەتتى كيىم-كەشەگى مەن كەڭسە تاۋارلارىن ساتىپ الۋعا جۇمسالۋى ءتيىس. باسقا ماقساتقا پايدالانۋعا قاتاڭ تىيىم سالىنادى.
كومەك العاننان كەيىن 10 جۇمىس كۇنى ىشىندە ساتىپ العان زاتتاردىڭ چەكتەرىن جانە بالانىڭ ساتىپ الىنعان كيىم-كەشەك، قۇرالدارمەن تۇسكەن فوتوەسەبىن مەكتەپكە وتكىزۋ مىندەتتى. ەگەر قاراجات باسقا ماقساتقا جۇمسالعانى انىقتالسا، اتا-انا جاۋاپكەرشىلىككە تارتىلۋى مۇمكىن.
قوسىمشا كومەكتى قايدان الۋعا بولادى؟
مەملەكەتتىك قولداۋدان بولەك، دەمەۋشىلەر مەن مەسەناتتار ەسەبىنەن قوسىمشا كومەك الۋعا بولادى. ول ءۇشىن www.atamekenim.kz پورتالىنداعى «مەكتەپكە جول» ارنايى بولىمىندە ءوتىنىش قالدىرۋ قاجەت. بۇل پلاتفورما ارقىلى جىل بويى ءوتىنىش قابىلدانىپ، دەمەۋشىلەر تاراپىنان ناقتى كومەك كورسەتىلەدى. وتىنىشتەر ۇلتتىق ءبىلىم بەرۋ دەرەكقورى ارقىلى تەكسەرۋدەن وتەدى.
«الەۋمەتتىك ءاميان» پلاتفورماسىندا ازىرگە تەك ماتەريالدىق كومەك (كيىم-كەشەك، قۇرال-جابدىق) قاراستىرىلعان. اقشالاي كومەك بۇل پلاتفورما ارقىلى بەرىلمەيدى.
مەكتەپكە دايىندىق ءۇشىن بەرىلگەن قاراجات ماقساتتى كومەك بولىپ تابىلادى جانە تەك بەلگىلەنگەن ەرەجەلەرگە ساي پايدالانىلۋى ءتيىس ەكەنىن ەستەن شىعارماعان ءجون.
