Qazaqstanda mektep oqýlyqtaryn daiyndaý, saraptamadan ótkizý jáne sapasyn baqylaý tártibi jańartyldy. Bul ózgerister QR Joǵary aýditorlyq palatasy júrgizgen memlekettik aýdittiń qorytyndysynan keiin engizildi, dep habarlaidy Dalanews.kz.
Aýdit orta bilim berý júiesin damytýǵa jáne onyń sapasyn arttyrýǵa bólingen biýdjet qarajatynyń tiimdi paidalanylýyn qamtyǵan.
Ótken jyldyń aqpan aiynda júrgizilgen tekserý nátijesinde oqýlyqtar men oqý-ádistemelik keshenderdi (OÁK) ázirleý, saraptaý jáne basyp shyǵarý úderisinde birqatar júieli másele anyqtalǵan.
Osyǵan bailanysty QR Oqý-aǵartý ministrligine qoldanystaǵy qaǵidalarǵa ózgerister engizý jóninde naqty tapsyrmalar berildi. Atap aitqanda, oqýlyqtardy daiyndaý, synaqtan ótkizý, monitoringteý jáne basyp shyǵarý tártibin qaita qaraý mindetteldi.
Qandai negizgi ózgerister engizildi?
Jańartylǵan erejelerde birqatar túbegeili jańashyldyq kózdelgen:
– ýákiletti organnyń jekelegen baspalarǵa aldyn ala suraý salmai-aq taqyryptyq jospardy bekitýi;
– taqyryptyq jospardy mindetti túrde ashyq jariialaý talaby;
– avtorlyq ujym quramyna keminde úsh bilikti mamandy engizý normasy (tiisti bilimi men tájiribesi bolýy shart);
– oqýlyqtarǵa saraptamalyq baǵa berýdiń naqty ári ólshenetin kriteriilerin bekitý;
– oqýlyqtardy jańartýdyń bes jyldyq merzimin saqtaý úshin sapany monitoringteý tásilderin qaita qaraý.
Ózgerister qashan bekitildi?
Atalǵan jańalyqtar QR Oqý-aǵartý ministriniń 24 qarashadaǵy buiryǵymen resmi túrde bekitildi.
Jańartylǵan normalar:
– taqyryptyq jospardy qalyptastyrý tártibin;
– avtorlyq ujymǵa qoiylatyn talaptardy;
– saraptamalyq baǵalaý ólshemsharttaryn;
– oqýlyqtar men OÁK sapasyn monitoringteý rásimderin naqty reglamentteidi.
Protsester avtomattandyrylady
Endi taqyryptyq jospar avtomatty túrde qalyptastyrylady. Baspalar men ázirleýshiler ótinimderdi Respýblikalyq ǵylymi-praktikalyq bilim mazmunyn saraptaý ortalyǵynyń www.bmso.kz internet-resýrsy arqyly beredi.
Sondai-aq oqýlyqtar men elektrondy oqýlyqtardy daiyndaý tek quramynda arnaiy oqytý kýrstarynan ótken ǵalymdar, ádiskerler jáne pedagogter bar avtorlyq ujym arqyly júzege asatyny naqty bekitildi.
Taǵy qandai ózgerister bolmaq?
Ministrlikke qosymsha mindetter de júkteldi. Atap aitqanda:
– mektep kitaphana qorlaryn esepke alý jáne baqylaý;
– oqýlyqtar men OÁK-ni saraptamaǵa qabyldaý protsesterin tolyq avtomattandyrý tapsyryldy.
Nátije qandai bolady?
Joǵary aýditorlyq palata málimetinshe, qabyldanǵan sharalar:
– oqýlyqtar men oqý-ádistemelik materialdardyń sapasyn arttyrýǵa;
– adami faktor men sýbektivti sheshimder yqpalyn azaitýǵa;
– qatelik táýekelderin tómendetýge;
– oqý materialdarynyń ýaqytyly jańartylýyn qamtamasyz etýge múmkindik beredi.
