Elimizdiń birneshe óńirinde "Mektepke jol" aktsiiasy aiasynda kórsetiletin kómekke qatysty ata-analardyń shaǵymy kóbeidi. Atyraýda kópbalaly analar ótinishteriniń qabyldanbaǵanyna narazy, al Túrkistanda turǵyndar uzyn-sonar kezekke turýǵa májbúr. Shymkentte de qoldaýǵa qol jetkize almaǵan analar ákimdikke baryp, máseleni sheshýdi talap etip otyr, dep habarlaidy dalanews.kz.
"Mektepke jol" aktsiiasy az qamtylǵan jáne kópbalaly otbasylardyń balalaryn jańa oqý jylyna daiyndaýǵa qoldaý kórsetýge baǵyttalǵan. Alaida Atyraýda osy kómekke ótinish bergen birqatar otbasy "bas tartý" týraly jaýap alǵan.
Analardyń aitýynsha, kómekke ótinish bergenderdiń arasynda tabysy tómen ári birneshe balasyn bir mezette mektepke daiyndap otyrǵan kópbalaly otbasylar bar. Alaida olardyń ótinishteri qabyldanbaǵan. Ata-analar bas tartýǵa naqty ne sebep bolǵany túsindirilmegenin jetkizdi.
"Men 11 balanyń anasymyn. Biyl alty balam mektepke barady. Joldasym jumys isteidi-istemeidi dep aita almaimyn. Aqshamyz qaryzymyz ben tamaǵymyzdan artylmaidy. Alty balany kiindirý ońai emes. Nege bas tartyp jatqanyn eshkim bilmeidi, sebebin de aitpaidy. Bizdiń ailyq tabysymyz – 200 myń teńge. Sonyń ózinde bas tartý kelip tur", - deidi kópbalaly analardyń biri.
Al Túrkistanda ata-analar mektep formasyna beriletin kómekti alý úshin uzyn-sonar kezekke turýǵa májbúr. Áleýmettik jelide taraǵan aqparatqa súiensek, qaladaǵy Mansap ortalyǵyna qujat tapsyrýǵa kelgen turǵyndar sany kún saiyn artyp keledi.
Avtordyń sózinshe, ótinish berý úshin elektrondy júie qarastyrylmaǵandyqtan, turǵyndar ortalyqqa ózderi kelip, kezek kútýge májbúr. Keibir ata-analar eki apta boiy sabylyp júrgenin, alaida áli kúnge deiin qajetti qujattaryn rásimdei almai otyrǵanyn jetkizgen.
Shymkentte de mektep formasyna qatysty másele kóterildi. Qajetti kómekti ala almaǵan bir top ana qala ákimdigine jinalyp, narazylyǵyn bildirdi.
Olar jańa oqý jyly taiap qalǵanyn aityp, qujat qabyldaý protsesin jeńildetýdi jáne máseleni jedel sheshýdi surady.
