Áleýmettik meditsinalyq saqtandyrý qorynyń (ÁMSQ) basshysy Aidyn Qulseiitov monitoringtiń jańa júiesi engizilgennen keiingi alǵashqy nátijelerdi málimdedi, dep habarlaidy Dalanews.kz.
Onyń aitýynsha, kórsetilgen qyzmetter boiynsha tólemge jiberilgen buzýshylyqtardy avtomattandyrylǵan túrde anyqtaý senimdiligi aitarlyqtai artqan. Buryn aqaýlardyń jartysynan kóbin sarapshylar qolmen tirkese, endi olardyń basym bóligi aqparattyq júie arqyly anyqtalady.
"Endi alǵash ret "jalǵan kórsetkishter" (qyzmet kórsetý faktilerin qoldan jazý) avtomatty rejimde tirkelip otyr. Monitoring protsesiniń ashyqtyǵy men eseptiliginiń artýy qyzmet kórsetýshilerdiń tártibin nyǵaitty: jalǵan kórsetkishterdiń sany birneshe ese azaidy", – dedi Qulseiitov Úkimet otyrysynda.
Qor basshysy algoritmderdi úzdiksiz jetildirý arqyly buzýshylyqtardy tolyq ári naqty anyqtaý múmkindigi kúsheiip kele jatqanyn atap ótti.
"Baqylaý sapasyn arttyrý úshin taldaý tetikterin turaqty túrde jetildirý qajet. Máselen, qyrkúiek aiynda úsh jańa formaldy-logikalyq baqylaý engizý arqyly 502 mln teńgege buzýshylyq anyqtaldy", – dep naqtylady ÁMSQ basshysy.
Qor dereginshe, jańa júie iske qosylǵannan beri jalǵan kórsetkishterdi anyqtaý deńgeii byltyrǵy jylmen salystyrǵanda 19 esege artqan, al olardyń naqty sany 17 esege qysqarǵan. Bul, basshynyń aitýynsha, halyqqa kórsetiletin meditsinalyq kómektiń sapasy men qoljetimdiligine tikelei áser etedi.
Aidyn Qulseiitovtyń sózinshe, tsifrlyq baqylaý alǵashqy nátijesin berip úlgergen. Eger maýsym aiynda pilottyq kezeńde meditsinalyq uiymdardyń 44%-ynda jalǵan kórsetkishter tirkelse, tamyzǵa qarai bul kórsetkish 18%-ǵa deiin tómendegen.
Ásirese iri buzýshylyqtar boiynsha nátijeler aiqyn baiqalady: 200 AEK-ten (2025 jyly – 786 400 teńge) asatyn jalǵan kórsetkishteri bar meditsinalyq uiymdardyń sany 43-ten nólge deiin azaiǵan.
