الەۋمەتتىك مەديسينالىق ساقتاندىرۋ قورىنىڭ (ءامسق) باسشىسى ايدىن قۇلسەيىتوۆ  مونيتورينگتىڭ جاڭا جۇيەسى ەنگىزىلگەننەن كەيىنگى العاشقى ناتيجەلەردى مالىمدەدى، دەپ حابارلايدى Dalanews.kz.

ونىڭ ايتۋىنشا، كورسەتىلگەن قىزمەتتەر بويىنشا تولەمگە جىبەرىلگەن بۇزۋشىلىقتاردى اۆتوماتتاندىرىلعان تۇردە انىقتاۋ سەنىمدىلىگى ايتارلىقتاي ارتقان. بۇرىن اقاۋلاردىڭ جارتىسىنان كوبىن ساراپشىلار قولمەن تىركەسە، ەندى ولاردىڭ باسىم بولىگى اقپاراتتىق جۇيە ارقىلى انىقتالادى.

"ەندى العاش رەت "جالعان كورسەتكىشتەر" (قىزمەت كورسەتۋ فاكتىلەرىن قولدان جازۋ) اۆتوماتتى رەجيمدە تىركەلىپ وتىر. مونيتورينگ پروسەسىنىڭ اشىقتىعى مەن ەسەپتىلىگىنىڭ ارتۋى قىزمەت كورسەتۋشىلەردىڭ ءتارتىبىن نىعايتتى: جالعان كورسەتكىشتەردىڭ سانى بىرنەشە ەسە ازايدى"، – دەدى قۇلسەيىتوۆ ۇكىمەت وتىرىسىندا.

قور باسشىسى الگوريتمدەردى ۇزدىكسىز جەتىلدىرۋ ارقىلى بۇزۋشىلىقتاردى تولىق ءارى ناقتى انىقتاۋ مۇمكىندىگى كۇشەيىپ كەلە جاتقانىن اتاپ ءوتتى.

"باقىلاۋ ساپاسىن ارتتىرۋ ءۇشىن تالداۋ تەتىكتەرىن تۇراقتى تۇردە جەتىلدىرۋ قاجەت. ماسەلەن، قىركۇيەك ايىندا ءۇش جاڭا فورمالدى-لوگيكالىق باقىلاۋ ەنگىزۋ ارقىلى 502 ملن تەڭگەگە بۇزۋشىلىق انىقتالدى"، – دەپ ناقتىلادى ءامسق باسشىسى.

قور دەرەگىنشە، جاڭا جۇيە ىسكە قوسىلعاننان بەرى جالعان كورسەتكىشتەردى انىقتاۋ دەڭگەيى بىلتىرعى جىلمەن سالىستىرعاندا 19 ەسەگە ارتقان، ال ولاردىڭ ناقتى سانى 17 ەسەگە قىسقارعان. بۇل، باسشىنىڭ ايتۋىنشا، حالىققا كورسەتىلەتىن مەديسينالىق كومەكتىڭ ساپاسى مەن قولجەتىمدىلىگىنە تىكەلەي اسەر ەتەدى.

ايدىن قۇلسەيىتوۆتىڭ سوزىنشە، سيفرلىق باقىلاۋ العاشقى ناتيجەسىن بەرىپ ۇلگەرگەن. ەگەر ماۋسىم ايىندا پيلوتتىق كەزەڭدە مەديسينالىق ۇيىمداردىڭ 44%-ىندا جالعان كورسەتكىشتەر تىركەلسە، تامىزعا قاراي بۇل كورسەتكىش 18%-عا دەيىن تومەندەگەن.

اسىرەسە ءىرى بۇزۋشىلىقتار بويىنشا ناتيجەلەر ايقىن بايقالادى: 200 اەك-تەن (2025 جىلى – 786 400 تەڭگە) اساتىن جالعان كورسەتكىشتەرى بار مەديسينالىق ۇيىمداردىڭ سانى 43-تەن نولگە دەيىن ازايعان.