Qazaqstanda birinshi ret ashylǵan McDonald's-tegi uzyn-sonar kezek batys baspasózine de ilindi. Sonymen birge Almaty álemdegi arzan qalalardyń qataryna da kiripti.
Amerikanyń New York Post gazeti "Jylqy eti men qymyz – halqynyń eń jeńsik taǵamy sanalatyn ári Sasha Baron Koenniń keiipkeri "Borat" týǵan Ortalyq Aziianyń shaǵyn elinde seisenbi kúni McDonald's óziniń alǵashqy meiramhanasyn ashty" dep jazdy. Gazet Qazaqstanda amerikalyq Starbucks kofehanalar jelisi men Frantsiianyń Carrefour sýpermarketter jelisi ashylǵanyn da habarlaǵan.
Ulybritaniianyń Daily Telegraph gazeti "Keshe Qazaqstannyń astanasynda alǵashqy McDonald's ashyldy, fri kartoshkasy, biýrger men McDonald's jelisiniń quramy qupiia tuzdyǵynyń dámin alǵash tatyp kórý úshin jurt uzaq-sonar kezekke turdy. Bul kórinis 2006 jyly komediialyq film áigili etken oidan shyǵarylǵan qazaqstandyq tilshi Boratqa "Amerikany uly elge ainaldyrǵan nárse" retinde sózsiz unar edi" dep jazady.
Ulybritaniianyń Mirror gazetiniń "McDonald's jelisiniń Qazaqstandaǵy alǵashqy meiramhanasy ashylý rásimine júzdegen adam keldi, biraq as mázirinde ulttyq taǵam joq" degen maqalasynda erterekte qazaqstandyq McDonald's meiramhanasynyń qojaiyny biznesmen Qairat Boranbaev ishinde jylqy eti bar "qazaqtyń ulttyq taǵamdary" bolady dep ýáde etkenin jazady.
Al Ulybritaniianyń Daily Mail gazetiniń jazýynsha, Economist Intelligence Unit institýty Almatyny álemdegi turmys deńgeii eń arzan qalalar qataryna qosqan. Eń arzan qalalar tiziminde Almatydan bólek, Zambiianyń Lýsaka, Úndistannyń Bangalor men Bombei, Aljirdegi Aljir qalalary engen. Álemniń eń qymbat qalalary qatarynda Singapýr, Tsiýrih, Gonkong, Jeneva jáne Parij atalǵan.
