Májilis depýtaty, "AMANAT" partiiasy fraktsiiasynyń múshesi Bolat Kerimbek Úkimetke kókpar uiymdastyrý jáne ótkizý kezindegi qaýipsizdik talaptaryn kúsheitý jóninde depýtattyq saýal joldady, dep habarlaidy dalanews.kz.
Depýtattyń aitýynsha, keiingi jyldary ulttyq sport túrine qyzyǵýshylyq aitarlyqtai artqan. Ásirese Jambyl, Túrkistan, Qyzylorda jáne Almaty oblystarynda kókpar keńinen taralǵan. Tek ótken jyldyń qarasha-jeltoqsan ailarynda bul óńirlerde 130-ǵa jýyq resmi oiyn ótkizilse, biylǵy naýryz-sáýir ailarynda olardyń sany 80-nen asqan. Budan bólek, túrli as pen toilarda uiymdastyrylatyn beiresmi kókparlar da jii ótedi.
Alaida depýtat qoldanystaǵy talaptardyń tolyq saqtalmai otyrǵanyn atap ótti. Onyń sózinshe, keibir oiyndarda qatysýshylar sany shektelmeidi, jas erekshelikteri eskerilmeidi jáne qaýipsizdik sharalary jetkilikti deńgeide qamtamasyz etilmeidi.
"Kei jaǵdaida kókparǵa birneshe júzden eki myńǵa deiin adam qatysady. Mundai jaǵdaida qaýipsizdik pen tártipti baqylaý qiynǵa soǵady", – dedi ol.
Sondai-aq depýtat kókpar attaryn daiyndaý men paidalaný tártibi naqty rettelmegenin, attarǵa kúsh kórsetý, doping qoldaný jáne ádeii soqtyǵysý sekildi jaǵdailar kezdesetinin aitty.
Májilismen bul máseleniń ózektiligin jaqynda Aqmola oblysynda bolǵan qaiǵyly oqiǵamen bailanystyrdy. 26 mamyr kúni Tselinograd aýdanynda kókpar jattyǵýy kezinde 14 jastaǵy jasóspirim attan qulap, alǵan jaraqattarynan kóz jumǵan.
Osyǵan bailanysty Bolat Kerimbek "Jappai kókparǵa" arnalǵan qaýipsizdik standarttaryn zańnamalyq deńgeide bekitýdi usyndy. Atap aitqanda, qatysýshylar sanyna shekteý engizý, meditsinalyq jáne veterinarlyq baqylaýdy mindetteý, sondai-aq kókpar uiymdastyrýǵa qatysty memlekettik organdar men federatsiianyń quzyretterin naqtylaý máselesin kóterdi.
Budan bólek, qaýipsizdik talaptaryn saqtamai nemese tiisti ruqsatsyz kókpar uiymdastyrǵan tulǵalardyń jaýapkershiligin kúsheitý qajettigin aitty.
