Aldymen óńir basshysy Jańa Qaraton aýyldyq okrýginiń turǵyndarymen kezdesý ótkizip, kentte atqarylǵan jumystar men aldaǵy josparlar týraly qysqasha baıandady. Sonyń ishinde, Memleket basshysynyń «Jańa Qazaqstan: Jańarý men jańǵyrý joly» atty Joldaýynda júktelgen mindetterge de toqtalyp, turǵyndardy Prezıdenttiń bastamalaryn birlese júzege asyrýǵa shaqyrdy.
– Aýdannyń ózekti máselelerin jaqsy bilemiz, olardy sheshý úshin aýdan ákiminiń usynystaryna sáıkes arnaıy is-sharalar qabyldandy.
Jańa Qaraton kentine barlyǵy 38 shaqyrym avtokólik joldaryna qaıta jańǵyrtý josparlandy. 2021 jyly kentke 19 shaqyrym jol tóselse, bıyl ol jumystar jalǵasýda. Byltyrǵy jyly Jańa Qaraton kentiniń kire-beris jol boıyndaǵy eski jaryq kózderin 25 svetodıodty shamdarǵa aýystyrý jumystary júrgizilse, 2022 jyly 200 dana svetodıottyq shamdary aýystyrylady. Balbyraýyn, Bolashaq, Maıtóbe kóshelerine tranformator ornatý máselesi byltyrǵy jyly sheshildi. Odan bólek, kentti abattandyrý maqsatynda 2 aıaldama, 10 kóshe oryndyqtary, 10 qoqys jáshikteri jáne vorkaýt alańyn ornatý jumystary jasaldy, – degen oblys ákimi, budan bólek, kentke kárizdik tazartý, Mádenıet úıin salý, kóshelerge jaryq júrgizý, taǵy da basqa ózekti máselelerdi sheshý boıynsha jasalyp jatqan jumystar týraly aıtty.
Jıynda turǵyndar jumys oryndaryn ashý, kósheni jaryqtandyrý, kamera ornatý, kógaldandyrý men qurylys sapasyna qatysty saýaldar qoıyp, oblys basshysy jaýap berdi.
Máselen, «Baldyrǵan» bala baqshasynyń horeografy Aıgerim Magazova Mádenıet úıin salý máselesin kóterdi. Oblys ákimi Mahambet Dosmuhambetov Jańa Qaraton kentine Mádenıet úıin salý úshin qajetti qujattar daıyndalyp jatqanyn jetkizdi.
Sondaı-aq, 2-6 kvartaldaǵy úılerge gaz qubyryn tartýdy suraǵan Tilektes Aıtjanovaǵa atalǵan jumysarǵa jobalaý-smetalyq qujattamasy jasalǵanyn, saraptama qorytyndysy shyqqan soń qarajylandyrý kózi qarastyrylatynyn aıtty.
Odan soń oblys ákimi kent turǵyndaryn jeke suraqtary boıynsha da qabyldady.
Al, Qulsary qalasynda ótken turǵyndarmen kezdesýde oblys ákimi Mahambet Dosmuhambetov halyqtyń ál-aýqatyn arttyrý baǵytynda aýdanda istelip jatqan jumystar týraly qysqasha baıandap ótti.
– Bilim berý salasy boıynsha byltyrǵy jyly aýdan ortalyǵynda 580 oryndyq №6 orta mektep jáne Qulsary qalasyndaǵy Jylyoı tehnologıalyq munaı jáne gaz kolejine 60 oryndyq jataqhana qurylys jumystary aıaqtalyp, tapsyryldy. Ústimizdegi jyly Qulsary qalasyndaǵy 300 oryndyq №5 mektep qurylysy júrgizilýde, nysandy qyrkúıek aıynda tapsyrý josparda tur. Sonymen qatar, Qulsary qalasynda Bereke yqsham aýdanyna 600 oryndyq mektep qurylysyn TSHO kompanıasynyń «Igilik» baǵdarlamasy aıasynda salý úshin usynys berildi. Qurylysyn 2023 jyly júzege asyrý josparlanýda. Densaýlyq saqtaý salasyn odan ári jaqsartý maqsatynda byltyrǵy jyly 200 oryndyq modýldik aýrýhana salyndy. Qulsary qalasynan 75 orynǵa arnalǵan aýdandyq ortalyq aýrýhana qurylysy bıylǵy jyldyń sońyna deıin aıaqtalady. Óńir turǵyndaryn jaıly baspanamen qamtamasyz etý úshin «Nurly jer» baǵdarlamasy aıasynda Qulsary qalasyndaǵy «Atyraý» yqsham aýdanyndaǵy 100 páterlik 3 turǵyn úıdiń jáne demeýshiler esebinen Qulsary qalasynda 60 páterlik 1 turǵyn úıdiń qurylystaryn bıylǵy jyldyń aıaǵyna deıin aıaqtaý josparda tur. Osy úıler iske qosylǵanda 360 otbasyny úımen qamtylatyn bolady, – degen óńir basshysy Mahambet Dosmuhambetov aýdannyń ınfraqurylymyn damytý, áleýmettik nysandardyń sanyn kóbeıtý, turǵyn úımen qamtý sıaqty aýdan halqy úshin ózekti máseleler boıynsha atqarylyp jatqan ózge de jumystar, josparlanǵan is-sharalar týraly habardar qyldy.
Tórt saǵatqa jýyq sozylǵan jınalysta halyq tarapynan elýden astam suraq qoıyldy. Atap aıtqanda, jol-ınfraqurylymy, ekologıa, ár toptaǵy jandardy áleýmettik qoldaý, kógaldandyrý, aýyl sharýashylyǵyn damytý, qańǵybas ıtter máselesi, baspanamen qamtý men jumys oryndaryn ashýǵa qatysty saýaldar boldy.
Turǵyndar máselesine jan-jaqty jaýap bergen oblys ákimi jergilikti deńgeıde sheshiletin máselelerdi aýdan basshylyǵy men jaýapty basqarmalarǵa tapsyrdy. Sondaı-aq, jyldar boıy qordalanǵan keıbir problemalardy qysqa ýaqyttyń ishinde sheship berýdiń múmkin emestigin atap ótti. Oblystyq deńgeıde máselelerdi zerdelep, sheshý joldary qarastyrylatynyn, respýblıkalyq deńgeıde máselelerdi tıisti organdarǵa shesheshimin qarastyrý usynylatynan jetkizdi. Sonymen qatar, jyloılyqtardy kele jatqan naýryz meıramymen quttyqtap, jańa jyl el-jurtqa jaqsylyǵymen kelsin degen tilegin bildirdi.
Budan soń oblys ákimi jergilikti turǵyndardy jeke máseleleri boıynsha qabyldady.
«Qazaq soqyrlar qoǵamy» qoǵamdyq birlestiginiń Jylyoı aýdanyndaǵy ókili Baǵyt Masalımova múmkindigi shekteýli balalarǵa arnalǵan ońaltý ortalyǵyn salý qajettigin aıtty. M.Dosmuhambetov 150 oryndyq ońaltý ortalyǵynyń qurylysyn salý úshin jer telimi bólinip, jobalyq-smetalyq qujattamasy jasalǵanyn, qurylysyn demeýshilik arqyly osy jyly bastaý josparlanyp otyrǵanyn jetkizdi.
Al, Álı Sámenov qala aýmaǵynda ornalasqan eski úılerdi buzý jáne turǵyndardy kóshirý máselesin kóterdi. Óńir basshysy eski úılerdi buzý kezeńmen júrgiziletinin aıtyp túsindirdi. Josparǵa sáıkes, Mahambet dańǵyly boıyndaǵy 7 úı buzylyp, Atyraý yqsham aýdanyndaǵy salynyp jatqan 3 qatarly 60 páterlik úıge kóshirý josparda ekenin aıtty.
Kezdesý bastan aıaq ákimdiń «Feısbýk» jáne «Instagram» áleýmettik jelilerdegi resmı paraqshalarynan tikeleı efırde kórsetildi.
Oblys ákimimen kezdesý ótetindigi aldyn ala buqaralyq aqparat quraldary men áleýmettik jelilerde jarıalanyp, turǵyndar qulaqtandyryldy. Turǵyndardyń oblys ákimine qoıatyn suraqtary men usynys-pikirlerin jınaqaý úshin ákimdik apparaty men arnaıy oryndarǵa jáshikter ornatylǵan bolatyn.
Aıta keteıik, turǵyndarmen kezdesýge aımaq basshysymen birge QR Prezıdent ákimshiliginiń memlekettik ınspektory Marat Igalı, oblystyq máslıhattyń hatshysy Álibek Náýtıev, sondaı-aq oblystyq basqarma basshylary men aýdan ákimi Halel Jamlov, tıisti memlekettik organ ókilderi de qatysty.
Sondaı-aq oblys ákimi Jylyoı aýdanyna jumys sapary barysynda qalada ornalasqan «Jylyoımunaıgaz» munaı gaz óndirý basqarmasy ujymyn naýryz merekesimen quttyqtady.
