Elimizdi ornyqty damytý, demokratiialyq qaǵidattardy nyǵaitý jáne saiasi júieni keshendi jańartýda konstitýtsiialyq reformanyń tarihi ári strategiialyq mańyzy zor. Búgin Senat Tóraǵasy Máýlen Áshimbaev Jetisý oblysynyń turǵyndarymen kezdesý barysynda osyndai pikir bildirdi, dep habarlaidy Dalanews.kz.
«Jańa Konstitýtsiia jobasyna bailanysty respýblikalyq referendým – Prezidentimiz Qasym-Jomart Kemeluly Toqaevtyń eldi aýqymdy ári júieli jańǵyrtý baǵdaryn iske asyrý jolyndaǵy tarihi kezeń. Elimizdiń bolashaǵyna qatysty mańyzdy sheshimderdi azamattardyń tańdaýyna súiene otyryp qabyldaý demokratiia qaǵidattaryna adaldyqtyń aiqyn kórinisi ekeni anyq. Konstitýtsiialyq reformanyń basym mindeti – Táýelsizdikti nyǵaitý jáne azamattardyń ál-aýqatyn arttyrý. Osyǵan bailanysty jańa Konstitýtsiia jobasynda zań ústemdigi men quqyqtyq tártipti kúsheitýge, azamattardyń quqyqtary men múddelerin qorǵaýǵa, sondai-aq, eldiń ornyqty damýyna basymdyq berilgen», – dedi Máýlen Áshimbaev.
Ol sondai-aq damýdyń negizgi baǵdary – adam kapitalyn jetildirý, memlekettilikti, Táýelsizdik pen egemendikti nyǵaitý, sondai-aq, ishki saiasi turaqtylyq pen qoǵamdyq kelisimdi saqtaý Konstitýtsiia jobasynda naqty belgilengenin tilge tiek etti.
«Jańa Konstitýtsiianyń basty ereksheligi onyń adamǵa baǵdarlanýy ekenin airyqsha atap ótken jón. Azamattardyń quqyqtary men múddelerine nazar aýdarý memlekettik saiasattyń ózegine ainalyp otyr. Ata Zań jobasynda adam quqyqtary deklarativti ereje emes, mańyzdy qaǵidattar jáne naqty mindetter retinde qarastyrylǵan. Bul – sapaly bilimge qoljetimdilik, tiimdi densaýlyq saqtaý júiesi, áleýmettik qorǵaý jáne ár azamattyń óz áleýetin iske asyrýyna múmkindik berý sekildi baǵyttardy qamtidy. Osy qaǵidattardy júzege asyrý barlyq institýttardyń – Quryltaidyń, Úkimettiń, ákimdikter men máslihattardyń, sondai-aq, azamattyq qoǵam ókilderiniń birlesken kúsh-jigerin talap etedi. Mundai qadamdar – el igiligi jolyndaǵy ortaq jaýapkershiliktiń jarqyn kórinisi ekeni anyq», – dedi Palata Tóraǵasy.
Máýlen Áshimbaev sondai-aq óńirdegi kásiporyn jumysshylarymen jáne sharýalarmen kezdesti. «Hilnichenko jáne K» sharýa qojalyǵyndaǵy talqylaýdyń kún tártibinde – inkliýziia, etnosaralyq kelisim jáne azyq-túlik qaýipsizdigi jónindegi ózekti máseleler qamtyldy. Parlament depýtattary «Asar» sporttyq-ońaltý kesheniniń infraqurylymymen jáne «ASMA Industrial ltd» ónerkásip akkýmýliatorlaryn shyǵaratyn zaýyttyń qyzmetimen tanysty.
