UQShU bas hatshysy Imanǵali Tasmaǵambetov álemdi dúrliktirgen Krokýs Siti Hollda bolǵan lańkestik shabýyldyń uiymǵa múshe elderge áseri týraly aitty, dep habarlaidy Dalanews.kz.
Ótken aptada BAQ ókilderine bergen suqbatynda ol terrorizm jańa sipatqa ie bolyp, ultaralyq jáne dinaralyq alaýyzdyqtyń kúsheiýine ákep soqtyratyn gibridti qarý retinde qoldanylyp jatqanyn atap ótken. Bul joly UQShU-ǵa múshe elderdiń saiasi áreketine baǵasyn berdi.
"Barlyq memleket lańkestik áreketti aiyptap, bolǵan jaǵdaiǵa qaiǵyra kóńil aitty. Qylmyskerlerdi ustaý operatsiiasyna Belarýs memleketi atsalysty. Uiymǵa múshe elder atyshýly qylmysqa qatysty oqiǵalardy buqaralyq aqparat quraldarynda belsendi túrde jariialady. Óitkeni transulttyq terrorizm - uiymǵa múshe elderdiń ortaq máselesi. Odaqtas elder Eýraziiada bolyp jatqan sońǵy geosaiasi ózgerister olardyń árqaisysy úshin qaýipti ekenin jaqsy túsindi ", - dedi Tasmaǵambetov “Interfax” agenttigine bergen suqbatynda.
Aitýynsha, terakt uiymdastyrýshylary etnosaralyq alaýyzdyqty qozdyrý arqyly Resei men Orta Aziia elderiniń yntymaqtastyǵyna barynsha zalal keltirýdi kózdegen.
"Beibit turǵyndarǵa jasalǵan shabýylǵa baǵa berý jan-jaqty órbýi múmkin. Olardyń kópshiligin qabyldaý aýyr. Lańkesterdiń basty maqsaty ulttyq úkimet pen qoǵamdyq qaýipsizdiktiń úreiin ushyrý emes edi. Qylmyskerlerdiń negizgi maqsaty Resei men Orta Aziia elderiniń arasyna iritki salý boldy", - deidi ol.
Osy tusta Tasmaǵambetov atalmysh jaǵdaida salqynqandylyqpen áreket etýge shaqyrdy. Reseidiń kóshi-qon saiasatyna qandai da bir kedergi jasalsa, bul eńbek migranttarynyń elden ketýine áser etýi ábden múmkin.
"Emotsionaldy árekettiń sońy ókinishke ulasýy múmkin. Óitkeni beibit turǵyndardyń jappai qyrylýyna negiz bolǵan qaiǵyly oqiǵalar, ár azamat ózin osal sezingen kezde, bilikke saiasi sheshimder qabyldaýǵa barynsha qolaisyz jaǵdai jasaý úshin jasalady. Demek munyń óte jaǵymsyz ári uzaqqa sozylatyn saldary bolýy múmkin.
Máselen, ótken aptada kópshiligimiz muny ártúrli ult ókilderi arasyndaǵy qaishylyq deńgeiinde baiqadyq. Sondyqtan Reseidiń ulttyq jáne kóshi-qon saiasatyndaǵy jaǵdaidyń turaqsyzdanýyna jol bermeý qajet.
Orta Aziia elinen kelgen eńbek migranttaryna qysym jasalsa, bul olardyń Reseiden jappai ketýine túrtki bolady. Másele, aimaqtyń Resei ekonomikasyna keri áserin tigizýinde ǵana emes, eń aldymen odaqtas elderde orysfobiialyq jáne antireseilik kóńil-kúi qalyptasady. Al bul óz kezeginde memleketaralyq qatynastarǵa syna qaǵady. Osylaisha, "Krokýs Siti Holldaǵy" lańkestik árekettiń bastamashylary óz maqsatyna bir taban jaqyndai túsedi", - dedi Tasmaǵambetov.
Saiasi qairatker bul keleńsiz jait UQShU-ǵa qandai da bir keri áserin tigizbeitinin, uiym mundai qiyndyqtarǵa tótep berýge qabiletti ekenin alǵa tartty.
"Biz aityp otyrǵan másele jalpy áskeri-saiasi yntymaqtastyq salasyna qatysty emes. Alaida biz janama táýekelder bar. UQShU hatshylyǵy osyǵan alańdaýly. Meniń oiymsha, Reseidegi kóshi-qon jáne ulttyq saiasatqa bailanysty týyndaǵan krizis, Orta Aziianyń birqatar memleketine áser etýi múmkin. Biraq bul uiym jumysyna áser ete almaidy. Sózsiz, UQShU lańkesterdiń nazarynda júrgeni anyq. Máskeýdegi lańkestik árekettiń artynda turǵandar osy arqyly uiym jumysyn aqsatýdy da kózdegen bolar. Degenmen, bul júieniń irgetasy óte tózimdi jáne mundai qiyndyqtarǵa tótep bere alady", - dedi ol.
Eske salaiyq, 22 naýryzda belgisiz bireýler Máskeýdegi Krokýs Siti Holl kontsert zalynda adamdarǵa oq jaýdyrdy. Keiin kontsert zalynda órt shyqty. Sebebi oq atqandar granata jarǵany belgili boldy. Qazir negizgi toǵyz kúdikti ustaldy.
Atys "Piknik" rok-tobynyń kontsertine birneshe minýt qalǵanda bastalǵan bolatyn.
"Zalda júrgen adamdar atystan qorǵaný úshin birden jerge jatyp qorǵandy. Keminde 15-20 minýt jerde jatyp, aqyryndap syrtqa shyǵa bastady. Kóbi qashyp úlgerdi", - dep jazdy sol kezde reseilik arnalar.
Buǵan deiin Máskeý qalasynyń aýdandyq sotyna Krokýs-Ekspo saýda oiyn-saýyq ortalyǵynda aýqymdy terroristik akt jasady degen kúdiktiler ákelingen bolatyn. Keiinirek Basman aýdandyq soty terrorister tobyna qatysty aldyn ala tergeý organdarynyń bultartpaý sharasyn tańdaý týraly ótinishin qaraýǵa kiristi.
Aita keteiik,buǵan deiin UQShU bas hatshysy Imanǵali Tasmaǵambetov Máskeý oblysyndaǵy Krokýs Siti Hollda bolǵan teraktide qaza tapqandardyń týystaryna kóńil aitqan bolatyn.
"Máskeý oblysyndaǵy Krokýs Siti Holl kontsert zalynda oryn alǵan adamgershilikke jatpaityn lańkestik áreket týraly tereń ókinishpen bildik. Qaiǵyly oqiǵa júregimizdi syzdatty. Terakt saldarynan beibit turǵyndar qaza taýyp, jazyqsyz adamdar jaralandy. Biz bul qatygez, aqtaýǵa kelmeitin qylmysty qatań aiyptaimyz. Biz sizdermen birge qatty qaiǵyramyz. Jeke óz atymnan jáne Ujymdyq qaýipsizdik sharty uiymy Hatshylyǵynyń atynan qaza bolǵandardyń jaqyndaryna kóńil aityp, zardap shekkenderdiń tezirek saýyǵyp ketýine tilektestik bildirýge ruqsat etińizder", — dep jazǵan bolatyn Tasmaǵambetov Telegram arnasynda.
