ۇقشۇ باس حاتشىسى يمانعالي تاسماعامبەتوۆ الەمدى دۇرلىكتىرگەن كروكۋس سيتي حوللدا بولعان لاڭكەستىك شابۋىلدىڭ ۇيىمعا مۇشە ەلدەرگە اسەرى تۋرالى ايتتى، دەپ حابارلايدى Dalanews.kz.
وتكەن اپتادا ب ا ق وكىلدەرىنە بەرگەن سۇقباتىندا ول تەرروريزم جاڭا سيپاتقا يە بولىپ، ۇلتارالىق جانە ءدىنارالىق الاۋىزدىقتىڭ كۇشەيۋىنە اكەپ سوقتىراتىن گيبريدتى قارۋ رەتىندە قولدانىلىپ جاتقانىن اتاپ وتكەن. بۇل جولى ۇقشۇ-عا مۇشە ەلدەردىڭ ساياسي ارەكەتىنە باعاسىن بەردى.
"بارلىق مەملەكەت لاڭكەستىك ارەكەتتى ايىپتاپ، بولعان جاعدايعا قايعىرا كوڭىل ايتتى. قىلمىسكەرلەردى ۇستاۋ وپەراسياسىنا بەلارۋس مەملەكەتى اتسالىستى. ۇيىمعا مۇشە ەلدەر اتىشۋلى قىلمىسقا قاتىستى وقيعالاردى بۇقارالىق اقپارات قۇرالدارىندا بەلسەندى تۇردە جاريالادى. ويتكەنى ترانسۇلتتىق تەرروريزم - ۇيىمعا مۇشە ەلدەردىڭ ورتاق ماسەلەسى. وداقتاس ەلدەر ەۋرازيادا بولىپ جاتقان سوڭعى گەوساياسي وزگەرىستەر ولاردىڭ ءارقايسىسى ءۇشىن ءقاۋىپتى ەكەنىن جاقسى ءتۇسىندى "، - دەدى تاسماعامبەتوۆ “Interfax” اگەنتتىگىنە بەرگەن سۇقباتىندا.
ايتۋىنشا، تەراكت ۇيىمداستىرۋشىلارى ەتنوسارالىق الاۋىزدىقتى قوزدىرۋ ارقىلى رەسەي مەن ورتا ازيا ەلدەرىنىڭ ىنتىماقتاستىعىنا بارىنشا زالال كەلتىرۋدى كوزدەگەن.
"بەيبىت تۇرعىندارعا جاسالعان شابۋىلعا باعا بەرۋ جان-جاقتى ءوربۋى مۇمكىن. ولاردىڭ كوپشىلىگىن قابىلداۋ اۋىر. لاڭكەستەردىڭ باستى ماقساتى ۇلتتىق ۇكىمەت پەن قوعامدىق قاۋىپسىزدىكتىڭ ۇرەيىن ۇشىرۋ ەمەس ەدى. قىلمىسكەرلەردىڭ نەگىزگى ماقساتى رەسەي مەن ورتا ازيا ەلدەرىنىڭ اراسىنا ىرىتكى سالۋ بولدى"، - دەيدى ول.
وسى تۇستا تاسماعامبەتوۆ اتالمىش جاعدايدا سالقىنقاندىلىقپەن ارەكەت ەتۋگە شاقىردى. رەسەيدىڭ كوشى-قون ساياساتىنا قانداي دا ءبىر كەدەرگى جاسالسا، بۇل ەڭبەك ميگرانتتارىنىڭ ەلدەن كەتۋىنە اسەر ەتۋى ابدەن مۇمكىن.
"ەموسيونالدى ارەكەتتىڭ سوڭى وكىنىشكە ۇلاسۋى مۇمكىن. ويتكەنى بەيبىت تۇرعىنداردىڭ جاپپاي قىرىلۋىنا نەگىز بولعان قايعىلى وقيعالار، ءار ازامات ءوزىن وسال سەزىنگەن كەزدە، بيلىككە ساياسي شەشىمدەر قابىلداۋعا بارىنشا قولايسىز جاعداي جاساۋ ءۇشىن جاسالادى. دەمەك مۇنىڭ وتە جاعىمسىز ءارى ۇزاققا سوزىلاتىن سالدارى بولۋى مۇمكىن.
ماسەلەن، وتكەن اپتادا كوپشىلىگىمىز مۇنى ءارتۇرلى ۇلت وكىلدەرى اراسىنداعى قايشىلىق دەڭگەيىندە بايقادىق. سوندىقتان رەسەيدىڭ ۇلتتىق جانە كوشى-قون ساياساتىنداعى جاعدايدىڭ تۇراقسىزدانۋىنا جول بەرمەۋ قاجەت.
ورتا ازيا ەلىنەن كەلگەن ەڭبەك ميگرانتتارىنا قىسىم جاسالسا، بۇل ولاردىڭ رەسەيدەن جاپپاي كەتۋىنە تۇرتكى بولادى. ماسەلە، ايماقتىڭ رەسەي ەكونوميكاسىنا كەرى اسەرىن تيگىزۋىندە عانا ەمەس، ەڭ الدىمەن وداقتاس ەلدەردە ورىسفوبيالىق جانە انتيرەسەيلىك كوڭىل-كۇي قالىپتاسادى. ال بۇل ءوز كەزەگىندە مەملەكەتارالىق قاتىناستارعا سىنا قاعادى. وسىلايشا، "كروكۋس سيتي حوللداعى" لاڭكەستىك ارەكەتتىڭ باستاماشىلارى ءوز ماقساتىنا ءبىر تابان جاقىنداي تۇسەدى"، - دەدى تاسماعامبەتوۆ.
ساياسي قايراتكەر بۇل كەلەڭسىز جايت ۇقشۇ-عا قانداي دا ءبىر كەرى اسەرىن تيگىزبەيتىنىن، ۇيىم مۇنداي قيىندىقتارعا توتەپ بەرۋگە قابىلەتتى ەكەنىن العا تارتتى.
"ءبىز ايتىپ وتىرعان ماسەلە جالپى اسكەري-ساياسي ىنتىماقتاستىق سالاسىنا قاتىستى ەمەس. الايدا ءبىز جاناما تاۋەكەلدەر بار. ۇقشۇ حاتشىلىعى وسىعان الاڭداۋلى. مەنىڭ ويىمشا، رەسەيدەگى كوشى-قون جانە ۇلتتىق ساياساتقا بايلانىستى تۋىنداعان كريزيس، ورتا ازيانىڭ ءبىرقاتار مەملەكەتىنە اسەر ەتۋى مۇمكىن. ءبىراق بۇل ۇيىم جۇمىسىنا اسەر ەتە المايدى. ءسوزسىز، ۇقشۇ لاڭكەستەردىڭ نازارىندا جۇرگەنى انىق. ماسكەۋدەگى لاڭكەستىك ارەكەتتىڭ ارتىندا تۇرعاندار وسى ارقىلى ۇيىم جۇمىسىن اقساتۋدى دا كوزدەگەن بولار. دەگەنمەن، بۇل جۇيەنىڭ ىرگەتاسى وتە ءتوزىمدى جانە مۇنداي قيىندىقتارعا توتەپ بەرە الادى"، - دەدى ول.
ەسكە سالايىق، 22 ناۋرىزدا بەلگىسىز بىرەۋلەر ماسكەۋدەگى كروكۋس سيتي حولل كونسەرت زالىندا ادامدارعا وق جاۋدىردى. كەيىن كونسەرت زالىندا ءورت شىقتى. سەبەبى وق اتقاندار گراناتا جارعانى بەلگىلى بولدى. ءقازىر نەگىزگى توعىز كۇدىكتى ۇستالدى.
اتىس "پيكنيك" روك-توبىنىڭ كونسەرتىنە بىرنەشە مينۋت قالعاندا باستالعان بولاتىن.
"زالدا جۇرگەن ادامدار اتىستان قورعانۋ ءۇشىن بىردەن جەرگە جاتىپ قورعاندى. كەمىندە 15-20 مينۋت جەردە جاتىپ، اقىرىنداپ سىرتقا شىعا باستادى. كوبى قاشىپ ۇلگەردى"، - دەپ جازدى سول كەزدە رەسەيلىك ارنالار.
بۇعان دەيىن ماسكەۋ قالاسىنىڭ اۋداندىق سوتىنا كروكۋس-ەكسپو ساۋدا ويىن-ساۋىق ورتالىعىندا اۋقىمدى تەرروريستىك اكت جاسادى دەگەن كۇدىكتىلەر اكەلىنگەن بولاتىن. كەيىنىرەك باسمان اۋداندىق سوتى تەرروريستەر توبىنا قاتىستى الدىن الا تەرگەۋ ورگاندارىنىڭ بۇلتارتپاۋ شاراسىن تاڭداۋ تۋرالى ءوتىنىشىن قاراۋعا كىرىستى.
ايتا كەتەيىك،بۇعان دەيىن ۇقشۇ باس حاتشىسى يمانعالي تاسماعامبەتوۆ ماسكەۋ وبلىسىنداعى كروكۋس سيتي حوللدا بولعان تەراكتىدە قازا تاپقانداردىڭ تۋىستارىنا كوڭىل ايتقان بولاتىن.
"ماسكەۋ وبلىسىنداعى كروكۋس سيتي حولل كونسەرت زالىندا ورىن العان ادامگەرشىلىككە جاتپايتىن لاڭكەستىك ارەكەت تۋرالى تەرەڭ وكىنىشپەن بىلدىك. قايعىلى وقيعا جۇرەگىمىزدى سىزداتتى. تەراكت سالدارىنان بەيبىت تۇرعىندار قازا تاۋىپ، جازىقسىز ادامدار جارالاندى. ءبىز بۇل قاتىگەز، اقتاۋعا كەلمەيتىن قىلمىستى قاتاڭ ايىپتايمىز. ءبىز سىزدەرمەن بىرگە قاتتى قايعىرامىز. جەكە ءوز اتىمنان جانە ۇجىمدىق قاۋىپسىزدىك شارتى ۇيىمى حاتشىلىعىنىڭ اتىنان قازا بولعانداردىڭ جاقىندارىنا كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك بىلدىرۋگە رۇقسات ەتىڭىزدەر"، — دەپ جازعان بولاتىن تاسماعامبەتوۆ Telegram ارناسىندا.
