23 naýryzǵa qaraǵan túni Máskeýdegi Crocus City Hall kontsert zalynda keminde úsh adam atys shyǵaryp, ondaǵan adam qaza tapty, - dep habarlaidy Dalanews.kz.
Sońǵy málimetter boiynsha, terakt saldarynan 60 adam qaza tapqan. Odan bólek, 115 adam zardap shekken, onyń 60-ynyń jaǵdaiy aýyr.
Teraktke qatysty Aqorda málimdeme jasady. Aqorda málimdemesinde Qazaqstan Máskeýdegi beibit azamattarǵa qarsy terroristik aktini qatań aiyptaityny aitylǵan.
Prezident terrorizmdi múlde aqtaýǵa bolmaidy dep sanaidy. Ol BUU-ǵa múshe memleketterdi jazyqsyz azamattarǵa qarsy zorlyq-zombylyqtyń bul túrine biraýyzdan qarsylyq tanytýǵa shaqyrady. Toqaevtyń tapsyrmasy boiynsha, qajet bolǵan jaǵdaida, Qazaqstannyń quqyq qorǵaý organdary reseilik áriptesterine kómek kórsetedi.
Sonymen qatar, Qazaqstan Prezidenti lańkestik áreket kezinde azamattardyń qaza tabýyna bailanysty Resei prezidenti Vladimir Pýtinge kóńil aitty.
Al Ǵylym jáne joǵary bilim ministrliginiń málimetinshe, Reseide "Bolashaq" jáne "500 ǵalym" baǵdarlamasy boiynsha búginde 32 qazaqstandyq azamat bilim alyp jatyr, 24 stipendiat Máskeýde. Olardyń eshqaisysy zardap shekken joq. Barlyq stipendiattar bailanysqa shyqqan.
Qazaqstannyń Syrtqy ister ministrligi de zardap shekkender arasynda qazaqstandyqtar joq ekenin málimdedi.
Telegram arnalarda teraktke Ýkrainanyń qatysy baryn jazǵandar bolǵan. Bul aqparatqa qatysty Ýkraina málimdeme jasady.
Ýkraina prezidenti Vladimir Zelenskiidiń keńse jetekshisiniń keńesshisi Mihail Podoliak "Krokýs siti holldaǵy" teraktke Ýkrainanyń qatysy joǵyn aitty.
"Naqtysyn aitaiyn. Ýkrainanyń bul jaittarǵa eshqandai qatysy joq", - deidi Podoliak.
Bul týraly "Strana.ua" basylymy jáne "Ýkraina Seichas" telergam arnasy habarlady.
