23 ناۋرىزعا قاراعان ءتۇنى ماسكەۋدەگى Crocus City Hall كونسەرت زالىندا كەمىندە ءۇش ادام اتىس شىعارىپ، ونداعان ادام قازا تاپتى، - دەپ حابارلايدى Dalanews.kz.
سوڭعى مالىمەتتەر بويىنشا، تەراكت سالدارىنان 60 ادام قازا تاپقان. ودان بولەك، 115 ادام زارداپ شەككەن، ونىڭ 60-ىنىڭ جاعدايى اۋىر.
تەراكتكە قاتىستى اقوردا مالىمدەمە جاسادى. اقوردا مالىمدەمەسىندە قازاقستان ماسكەۋدەگى بەيبىت ازاماتتارعا قارسى تەرروريستىك اكتىنى قاتاڭ ايىپتايتىنى ايتىلعان.
پرەزيدەنت تەرروريزمدى مۇلدە اقتاۋعا بولمايدى دەپ سانايدى. ول بۇۇ-عا مۇشە مەملەكەتتەردى جازىقسىز ازاماتتارعا قارسى زورلىق-زومبىلىقتىڭ بۇل تۇرىنە ءبىراۋىزدان قارسىلىق تانىتۋعا شاقىرادى. توقايەۆتىڭ تاپسىرماسى بويىنشا، قاجەت بولعان جاعدايدا، قازاقستاننىڭ قۇقىق قورعاۋ ورگاندارى رەسەيلىك ارىپتەستەرىنە كومەك كورسەتەدى.
سونىمەن قاتار، قازاقستان پرەزيدەنتى لاڭكەستىك ارەكەت كەزىندە ازاماتتاردىڭ قازا تابۋىنا بايلانىستى رەسەي پرەزيدەنتى ۆلاديمير پۋتينگە كوڭىل ايتتى.
ال عىلىم جانە جوعارى ءبىلىم مينيسترلىگىنىڭ مالىمەتىنشە، رەسەيدە "بولاشاق" جانە "500 عالىم" باعدارلاماسى بويىنشا بۇگىندە 32 قازاقستاندىق ازامات ءبىلىم الىپ جاتىر، 24 ستيپەنديات ماسكەۋدە. ولاردىڭ ەشقايسىسى زارداپ شەككەن جوق. بارلىق ستيپەندياتتار بايلانىسقا شىققان.
قازاقستاننىڭ سىرتقى ىستەر مينيسترلىگى دە زارداپ شەككەندەر اراسىندا قازاقستاندىقتار جوق ەكەنىن مالىمدەدى.
تەلەگرام ارنالاردا تەراكتكە ۋكراينانىڭ قاتىسى بارىن جازعاندار بولعان. بۇل اقپاراتقا قاتىستى ۋكراينا مالىمدەمە جاسادى.
ۋكراينا پرەزيدەنتى ۆلاديمير زەلەنسكييدىڭ كەڭسە جەتەكشىسىنىڭ كەڭەسشىسى ميحايل پودولياك "كروكۋس سيتي حوللداعى" تەراكتكە ۋكراينانىڭ قاتىسى جوعىن ايتتى.
"ناقتىسىن ايتايىن. ۋكراينانىڭ بۇل جايتتارعا ەشقانداي قاتىسى جوق"، - دەيدى پودولياك.
بۇل تۋرالى "سترانا.ua" باسىلىمى جانە "ۋكراينا سەيچاس" تەلەرگام ارناسى حابارلادى.
