Qazaqstan Respýblikasy Qarjylyq monitoring agenttigi «QazTemirTrans» AQ-nyń burynǵy vitse-prezidenti Azamat Kapenovke qatysty qyzmettik ókilettikterin asyra paidalaný jáne aqsha qarajatyn jymqyrý faktileri boiynsha sotqa deiingi tergep-tekserý júrgizip jatyr, dep habarlaidy Dalanews.kz.
Tergeý amaldaryna sai, Kapenov qyzmettik jaǵdaiyn paidalana otyryp, júk vagondaryn basqarý qyzmetterin kórsetý kezinde bailanysy bar kompaniialarǵa zańsyz artyqshylyqtar jasaǵan.
Saldarynan «QazTemirTrans» AQ-ǵa 5,2 mlrd teńgeden astam mólsherde zalal keltirilgen.
Qazirgi ýaqytta Azamat Kapenovke halyqaralyq izdeýge jariialanǵan. Sotpen oǵan qatysty «qamaýda ustaý» túrindegi bultartpaý sharasy sanktsiialanǵan.
Keltirilgen zalaldy óteý jáne zańsyz alynǵan aktivterdi qaitarý maqsatynda Bas kólik prokýratýrasy «Dostyq» stantsiiasyndaǵy terminaldy sotqa deiin tárkileý týraly ótinish joldaǵan.
Astana qalasynyń qylmystyq ister jónindegi aýdanaralyq sotynyń qaýlysymen atalǵan múlik memleket kirisine ótkizildi.
Tergeý jalǵasyp jatyr.
Qazaqstan Respýblikasynyń Qylmystyq-protsestik kodeksiniń 201-babyna sáikes ózge málimetter jariialaýǵa jatpaidy.
Eske salaiyq, buǵan deiin izdeý jariialanǵan Azamat Kápenov Birikken Arab Ámirlikterinde jasyrynyp júrýi múmkin ekeni aityldy. Bul týraly aqparat «Vyhod k moriý» telegram arnasynda paida bolǵan edi.
Telegramdaǵy málimet boiynsha, bul týraly aqparat reseilik «Magistral» júiesinde paida bolǵan. «Magistral» - el ishinde qoǵamdyq kólik jolaýshylarynyń qozǵalysyn jáne olardyń Resei Federatsiiasynyń Memlekettik shekarasynan ótýin tirkep otyratyn júie. «Vyhod k moriý» Kápenov Máskeýden Dýbaiǵa 2023 jyldyń 22 shildesinde ushyp ketip, qaitadan oralmaǵanyn jazady.
