Astanada masa men shybyn-shirkeige jáne ózge de jándikterge qarsy keń aýqymdy dezinsektsiialyq jumys júrip jatyr. Jumys eki aýysymda ótedi,- dep habarlaidy Dalanews.kz elorda ákimdiginiń baspasóz qyzmetine silteme jasap.
Qazirgi ýaqytta qaladaǵy kishi jáne iri sý aidyndary óńdelip bitti. Budan bólek, qosymsha 300-ge jýyq sý qoimasy men batpaqty aýmaqtar anyqtalyp, dezinsektsiialyq óńdeýden ótti.
"Atalǵan sharalar jándikterdiń sanyn azaitýǵa baǵyttalǵan. Jumys keshki saǵat 21:00-den tańǵy 04:00-ge deiin júrgiziledi jáne ár kezeń aiyna 20 kúnge sozylady. Jalpy 6 kezeń qarastyrylǵan, qazirgi ýaqytta óńdeýdiń úshinshi kezeńi bastaldy", - delingen habarlamada.
Jumysqa arnaiy daiyndyqtan ótken, qaýipsizdik tehnikasy boiynsha nusqaýlyq alǵan kásibi dezinfektorlar tartylǵan.
Keń aýqymdy óńdeý barysynda PIK, basqarýshy kompaniialar, MIB, sondai-aq bilim berý, densaýlyq saqtaý, mádeniet, sport, qurylys mekemeleri, bazarlar, saýda úileri jáne ózge de uiymdar jertólelerdi abattandyrý, qurǵatý jáne dezinsektsiialyq óńdeý arqyly bul sharaǵa belsendi atsalysýy qajet.
Ákimdik dezinsektsiia kezinde óńdelip jatqan aýmaqqa barmaýdy jáne óńdeý kezinde terezelerdi jabýdy usyndy.
