استانادا ماسا مەن شىبىن-شىركەيگە جانە وزگە دە جاندىكتەرگە قارسى كەڭ اۋقىمدى دەزينسەكسيالىق جۇمىس ءجۇرىپ جاتىر. جۇمىس ەكى اۋىسىمدا وتەدى،- دەپ حابارلايدى Dalanews.kz ەلوردا اكىمدىگىنىڭ باسپا ءسوز قىزمەتىنە سىلتەمە جاساپ.

قازىرگى ۋاقىتتا قالاداعى كىشى جانە ءىرى سۋ ايدىندارى وڭدەلىپ ءبىتتى. بۇدان بولەك، قوسىمشا 300-گە جۋىق سۋ قويماسى مەن باتپاقتى اۋماقتار انىقتالىپ، دەزينسەكسيالىق وڭدەۋدەن ءوتتى.

"اتالعان شارالار جاندىكتەردىڭ سانىن ازايتۋعا باعىتتالعان. جۇمىس كەشكى ساعات 21:00-دەن تاڭعى 04:00-گە دەيىن جۇرگىزىلەدى جانە ءار كەزەڭ ايىنا 20 كۇنگە سوزىلادى. جالپى 6 كەزەڭ قاراستىرىلعان، قازىرگى ۋاقىتتا وڭدەۋدىڭ ءۇشىنشى كەزەڭى باستالدى"، - دەلىنگەن حابارلامادا.

جۇمىسقا ارنايى دايىندىقتان وتكەن، قاۋىپسىزدىك تەحنيكاسى بويىنشا نۇسقاۋلىق العان كاسىبي دەزينفەكتورلار تارتىلعان.

كەڭ اۋقىمدى وڭدەۋ بارىسىندا پيك، باسقارۋشى كومپانيالار، ميب، سونداي-اق ءبىلىم بەرۋ، دەنساۋلىق ساقتاۋ، مادەنيەت، سپورت، قۇرىلىس مەكەمەلەرى، بازارلار، ساۋدا ۇيلەرى جانە وزگە دە ۇيىمدار جەرتولەلەردى اباتتاندىرۋ، قۇرعاتۋ جانە دەزينسەكسيالىق وڭدەۋ ارقىلى بۇل شاراعا بەلسەندى اتسالىسۋى قاجەت.

اكىمدىك دەزينسەكسيا كەزىندە وڭدەلىپ جاتقان اۋماققا بارماۋدى جانە وڭدەۋ كەزىندە تەرەزەلەردى جابۋدى ۇسىندى.