Shymkent qalasyndaǵy Ál-Farabi atyndaǵy ǵylymi-ámbebap kitaphanasynda tanymal jazýshy Marhabat Baiǵuttyń týǵanyna 80 jyl tolý qurmetine «Marhabat» jýrnaly men «Markhabat.kz» aqparattyq portalynyń tanystyrylymy ótti.
Ádebi basqosý halyqaralyq «Alash», «Túrki álemine qyzmeti úshin» syilyqtarynyń, «Parasat», «Barys» ordenderiniń iegeri, Qazaqstannyń eńbek sińirgen qairatkeri Marhabat Baiǵuttyń shyǵarmashylyǵyn dáripteitin kórmeni tamashalaýdan bastaldy.
Keleli jiynǵa Túrkistan oblysy ákiminiń orynbasary Ertai Altaev, Shymkent qalasy ákimniń orynbasary Sársen Quranbek, halyqaralyq «Alash» syilyǵynyń iegeri, áigili aqyn Narmahan Begalyuly, Túrkistan oblystyq ardagerler keńesiniń tóraǵasy Jeńisbek Máýlenqulov, Shymkent qalalyq máslihatynyń tóraǵasy Bahadyr Narymbetov, Ó.Jánibekov atyndaǵy Ońtústik Qazaqstan pedagogikalyq ýniversitetiniń rektory mindetin atqarýshy Gúljan Súgirbaeva, memleket jáne qoǵam qairatkerleri, ardagerler men ziialy qaýym ókilderi, qalamgerdiń asyl jary Qyzdarkúl Pernebaiqyzy, perzenti Aqlima, inisi Nyshan Baiǵut, sondai-aq oqyrman qaýym qatysty.
Basqosýdy «Mediakratiia» qoǵamdyq birlestiginiń tóraǵasy, belgili jýrnalist, oblystyq máslihat depýtaty Ǵalymjan Elshibai júrgizip otyrdy. Al jýrnaldyń bas redaktory Oralhan Dáýit jýrnal men aqparattyq portaldy tanystyrdy.
Marhabat Baiǵuttyń janashyrlyǵyn kórip, aqyl-keńes, baǵyt-baǵdar alǵan shákirtteri, jas qalamgerler atynan aqyndar Muqaǵali Kenjetaiuly men Sezim Mergenbai óleńderin oqyp, ádemi áserge bóledi. Klassiktiń ózi oryndaǵan áni men suqbattaryn beinetaspadan tamashalaǵan kópshiliktiń kóńili tolqydy.
Jambyl oblysynan kelgen bir top qalamger Marhabat Baiǵutpen erekshe bailanysta bolǵan Sherhan Murtazanyń kóptomdyq jinaqtarymen birge oblys ákimi Erbol Qarashókeevtiń quttyqtaýyn qosa tapsyrdy.
«Marhabat» jýrnaly eki myń dana taralymmen shyǵady. Jazylý indeksi – 76104.
