شىمكەنت قالاسىنداعى ءال-فارابي اتىنداعى عىلىمي-امبەباپ كىتاپحاناسىندا تانىمال جازۋشى مارحابات بايعۇتتىڭ تۋعانىنا 80 جىل تولۋ قۇرمەتىنە «مارحابات» جۋرنالى مەن «Markhabat.kz» اقپاراتتىق پورتالىنىڭ تانىستىرىلىمى ءوتتى.
ادەبي باسقوسۋ حالىقارالىق «الاش»، «تۇركى الەمىنە قىزمەتى ءۇشىن» سىيلىقتارىنىڭ، «پاراسات»، «بارىس» وردەندەرىنىڭ يەگەرى، قازاقستاننىڭ ەڭبەك سىڭىرگەن قايراتكەرى مارحابات بايعۇتتىڭ شىعارماشىلىعىن دارىپتەيتىن كورمەنى تاماشالاۋدان باستالدى.
كەلەلى جيىنعا تۇركىستان وبلىسى اكىمىنىڭ ورىنباسارى ەرتاي التايەۆ، شىمكەنت قالاسى اكىمنىڭ ورىنباسارى سارسەن قۇرانبەك، حالىقارالىق «الاش» سىيلىعىنىڭ يەگەرى، ايگىلى اقىن نارماحان بەگالى ۇلى، تۇركىستان وبلىستىق ارداگەرلەر كەڭەسىنىڭ ءتوراعاسى جەڭىسبەك ماۋلەنقۇلوۆ، شىمكەنت قالالىق ءماسليحاتىنىڭ ءتوراعاسى باحادىر نارىمبەتوۆ، ءو.جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتىنىڭ رەكتورى مىندەتىن اتقارۋشى گۇلجان سۇگىربايەۆا، مەملەكەت جانە قوعام قايراتكەرلەرى، ارداگەرلەر مەن زيالى قاۋىم وكىلدەرى، قالامگەردىڭ اسىل جارى قىزداركۇل پەرنەباي قىزى، پەرزەنتى اقليما، ءىنىسى نىشان بايعۇت، سونداي-اق وقىرمان قاۋىم قاتىستى.
باسقوسۋدى «مەدياكراتيا» قوعامدىق بىرلەستىگىنىڭ ءتوراعاسى، بەلگىلى جۋرناليست، وبلىستىق ءماسليحات دەپۋتاتى عالىمجان ەلشىباي جۇرگىزىپ وتىردى. ال جۋرنالدىڭ باس رەداكتورى ورالحان ءداۋىت جۋرنال مەن اقپاراتتىق پورتالدى تانىستىردى.
مارحابات بايعۇتتىڭ جاناشىرلىعىن كورىپ، اقىل-كەڭەس، باعىت-باعدار العان شاكىرتتەرى، جاس قالامگەرلەر اتىنان اقىندار مۇقاعالي كەنجەتاي ۇلى مەن سەزىم مەرگەنباي ولەڭدەرىن وقىپ، ادەمى اسەرگە بولەدى. كلاسسيكتىڭ ءوزى ورىنداعان ءانى مەن سۇقباتتارىن بەينەتاسپادان تاماشالاعان كوپشىلىكتىڭ كوڭىلى تولقىدى.
جامبىل وبلىسىنان كەلگەن ءبىر توپ قالامگەر مارحابات بايعۇتپەن ەرەكشە بايلانىستا بولعان شەرحان مۇرتازانىڭ كوپتومدىق جيناقتارىمەن بىرگە وبلىس اكىمى ەربول قاراشوكەيەۆتىڭ قۇتتىقتاۋىن قوسا تاپسىردى.
«مارحابات» جۋرنالى ەكى مىڭ دانا تارالىممەن شىعادى. جازىلۋ يندەكسى – 76104.
