Disney arnasynyń burynǵy juldyzy Kelam Ýorti jasandy intellekt (AI) kómegimen marqum adamdardyń virtýaldy beinelerin jasaityn qosymshasy úshin qatań synǵa ushyrady, dep habarlaidy Dalanews.kz.
Dailymail taratqan aqparatqa sáikes, 34 jastaǵy Ýorti X jelisinde jarnamalyq videony jariialaǵan.
Onda: "Ómirden ótken jaqyndarymyz bolashaǵymyzdyń bir bóligi bola alsa she?" - dep jazylǵan.
Óner iesi Gollivýd prodiýseri Rassel Geizermen birge qurǵan kompaniiasy “adamzattyń tiri muraǵatyn” jasaýdy maqsat etip otyrǵanyn atap ótti.
Daýly jarnama ne týraly?
Jelide qyzý talqyǵa túsken jarnamada júkti áiel 2wai qosymshasy arqyly marqum anasynyń jasandy beinesimen tildesedi.
Videonyń jalǵasynda virtýaldy ájeniń jańa týǵan nemeresine ertegi oqyp otyrǵany, balany mektepten kútip alatyny, tipti bolashaqta onyń óz balasynyń dúniege kelýi týraly áńgimelesetini kórsetiledi.
Rolik sońynda áiel anasynyń beinesin jasaý úshin bar bolǵany úsh minýttyq videosyn júktegeni aitylady. Ekranda: “2wai arqyly úsh minýt – máńgige ainalady” degen uran shyǵady.
Áleýmettik jeli qoldanýshylarynyń reaktsiiasy
Jeli qoldanýshylary bul ideiaǵa túbegeili qarsy shyqty. Kópshiligi ony “eń sátsiz bastamalardyń biri” dep atasa, endi biri “zulym, jalǵan ári adamshylyqtan aiyratyn qosymsha” dep baǵa berdi.
Synǵa qalǵan 2wai (oqylýy — two way) qosymshasy qazirdiń ózinde App Store arqyly iOS qurylǵylarynda qoljetimdi. Ol paidalanýshylarǵa “HoloAvatar” dep atalatyn virtýaldy beinelerdi jasaýǵa múmkindik beredi.
Qosymshada daiyn keiipkerler de bar. Máselen, jeke jattyqtyrýshy Dariýs, astrolog Selesta, aspaz Lýka.
Kompaniia tipti Ýiliam Shekspir men VIII Genrihtiń beinesin jasap qoiǵan.
Alaida eń daýly tusy - ómirden ótken adamdy úsh minýttyq videomen tolyqtai “qaita tiriltýi”.
Kompaniia bul tehnologiianyń qalai jumys isteitini jóninde eshqandai naqty túsinikteme bermegen. Tipti jýrnalisterdiń suraqtaryna da jaýap qatpaǵan.
Qoǵamnyń alańdaýshylyǵy
Marqum adamdardy jasandy intellekt arqyly “qaita tiriltý” ideiasy qoǵamda úlken alańdaýshylyq týdyrdy.
X jelisinde qoldanýshylardyń biri: “Qaiǵyny tabys kózine ainaldyrý – adamshylyqqa jat”, - dep jazdy.Taǵy biri ashýlanyp: “Eger bireý meni AI arqyly tiriltse, qarǵys aitar edim”, - dedi.
Tehnologiiany synaýshylar bul jaǵdaidy Black Mirror serialynyń “Be Right Back” epizodymen uqsastyǵyn birden baiqady. Onda qaiǵydan qan jutqan áiel qaitys bolǵan súiiktisiniń tsifrlyq kóshirmesin jasaidy. Atalǵan seriiada tehnologiiaǵa shamadan tys senýdiń qaýpi týraly baianadalady. Biraq qoldanýshylardyń pikirinshe, 2wai komandasy bul eskertýdi elemegen kórinedi.
“Black Mirror-dyń eń qorqynyshty epizodyn startapqa ainaldyrýǵa kimniń batyly jetti?” - dep jazdy olar.
Kópshilik AI arqyly marqumdardy “tiriltý” adamnyń psihologiiasyna salmaq túsirýi múmkin ekenin aitady. Sonymen qatar jurt marqum adamnyń beinesi men daýysy kompaniianyń jarnama nemese kommertsiialyq maqsatynda paidalanýynan qorqady.
